Lexique Provençal

Dans cette rubrique, des poèmes sont offerts à la lecture des internautes.

Nouvèmbre 2024.

Lou vaqui qu'arribo Nouvèmbre,
Emé sèis oumbro dins lou mèmbre,
Que tre cinq ouro dóu tantost
Si creirian d'auvi leis aurost
Dei pastresso, qu'ai remèmbre,
Cantàvon sai pèr destinèmbre … pèr lei Mouart.

Ero Toussant, un tems dei fouart...
Dins lei vilàgi sèns counfouart,
Dei frumo vieio sènsi dènti,
Si desoulàvon en turmènti,
Pèr moustra sus lei balouard,
Soun visàgi sèns sèi ventouar … pèr lei Mouart.

Anavon de mas en bastido
Ploura dei gèns la despartido.
Si curbien la testo d'un vèu
Metien sa capo 'm' un fuvèu,
E dins sa man, de counsentido,
Sanclamiàvon dins l'entrumido … pèr lei Mouart.

De nue puei, partien dins d'oustau,
Encó dei paure, dei catau,
Pèr far un brout de reboustèri
E ramenta dóu Batistèri,
L'aigo signado, lou lume Sant,
Lou Sant Chrèmo beluguejant … pèr lei Mouart.

Tenien en man 'no gegerido
Qu'avien cava à nue falido,
E puei à grand cóup de coutèu,
L' avien taia sus douei cantèu
Dei caro de chichilomòchi
Qu'avien dei bano coum' un bòchi … pèr lei Mouart.

E dins li glèiso, en frenissoun
Lei capelan 'mé d'aspersoun,
Benesissien au camentèri
Lei croues dei Sant e deis arlèri,
Dei riche coumo dei pauras,
Dei bràvei gèns, dei maufaras... pèr lei Mouart.

E leis aubre dins lei champino,
V' un cha v' un, sèns treboulino,
Vuei jaunisson, pèrdon soun flar,
Soun bèu fuiard dóu toun baiard.
E dins lei riau, leis amarino,
Si soun gibla e fan l'esquino ... pèr lei Mouart.

Un jour noun l'autre, e plóu, e plóu.
Mume lou cèu prène lou dóu.
Dins la séuvo sus lei coulino,
L'a coumo de lónguei courtino,
D'un gris negrau à faire póu,
Perlo d'aigo toumbant au sóu... pèr lei Mouart.

Sus lei calado z-ubagouso,
La moufo grèio benurouso,
Verdèjo mèntre qu'es l'iver,
Béu la pluèio matin e sèr,
Fourmant 'no tèpo velousado,
Que cuèrbe touto la caussado … pèr lei Mouart.

Sus lei pouart' en davans d'oustau,
Coum' un pau un davantau,
An tibla d'inmènsei linçóu,
Nègrei tapissarié de dóu
Que rèn que de lou vèir' ansin
Ti fai lei péu tout revessin ! … pèr lei Mouart.

Coumo l'aguèsse un delubre,
Lei carrièro an viesti l'ugubre,
E sus lei plaç' e balouard,
Tout lou mounde es dins lou descouar,
Dins uno tant grando tristesso,
Que creirian toueis à confesso … pèr lei Mouart.

Mai l'endeman an óublida,
E tóutei si soun counvida
A dei defrùti à dei jogo,
Van mume bala à la vogo,
E la Toussant emai lei Mouart
Soun deja luen dins soun recouard … pèr lei Mouart.

Pierre Dominique Testa, lou 2 de nouvèmbe 2024.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?