Noueste sìti à gràtis "http://lexiqueprovencal.com" de l'assouciacien "l'Espai Miejournau" prepauso un leissique óucitan de Prouvènço, leis estra d'un rouman " Fino e Cesar " dins quete l'autour Pierre Dominique Testa, escrivèire, li descriéu la vido d'uno famiho à Alau entre 1890 e 1995. L'assouciacien " l'Espai Miejournau " prepauso tambèn de pouèmo que leis amaire de la telaragno pouedon manda pèr leituro publico, ansin que de mouloun de liame emé de sìti en lengo d'Ó vo que pretocon la lengo d'Ó, aparia d'adrèisso indefugiblo.
Froumàgi ! Froumàgi de Barbaraou-Rouet. De Barbaraou lei bouen froumàgi Embaussèmon d'un dous prefum Lei couel' e mume lou masàgi Enjusqu' au pue de Garlaban, Leissant flouta dins soun seiàgi, Tal' uno nebl' en refoufun, 'Questo gousto dei pasturgàgi. N'en fau segur de touto mèno, 'N i a dei redoun, 'n i a dei pounchu, Sus quàuqueis un l'a de barbèno, E 'n i a que sèmblon 'mé dei gran. Pamèns s'arrib' un' escarèno Qu'uno mousc' aguèsse poundu, Apound' un bouen goust de vermèno ! Sa past' es imo, sai cremouso. L'a quàuquei trau pèr l'eireja, E se pèr cooup es mouligouso, Soun couers si tèn sus d'un finjan, Mai l'a 'no cavo qu'es chucouso, E que souvènt póu blureja, Es sa crousto meravihouso. Es segur que nouesto fabrèjo Es uno pichouno froumajarié, Mai en degun li doun' envèjo, Tant lou trabai es alassant, Doumàci tre dous ouro mièjo Adematin 'mé vigourié, Fau s'auboura maugra la pluèjo ! De fes que l'a, l'a deis escolo Que nous màndon pèr far d'assai, Dei jouvençèu tout' uno colo, Qu'aprènon quàsi pan pèr pan, Leis argagno, lei caminolo D'éstei fourmàgi que bessai, N'en faran soun abeçarolo. Ailas, verai, lei leva d'ouro, La fre, la mousto, lou femié, L'ivèr qu'es marrido tempouro, Sèns óublida que lou gasan Es menimous, fai dounc que chouro Saran en luego de bergié, E acò en perduradouro. Adiéu lei vaco, lei froumàgi ; Adiéu la vido dóu troupèu, Adiéu mountagno, adiéu l'aupàgi, Adiéu la vido de pacan, Faudra eima leis emboucàgi, La vilo e touei sèis estampèu, E mouri luen de soun vilàgi. Pierre Dominique Testa, lou 2 de desèmbre 2023. 
|
 |
 |
|
Coumunien ... (Pierre Dominique Testa, lou 20.10.2021.) |