Noueste sìti à gràtis "http://lexiqueprovencal.com" de l'assouciacien "l'Espai Miejournau" prepauso un leissique óucitan de Prouvènço, leis estra d'un rouman " Fino e Cesar " dins quete l'autour Pierre Dominique Testa, escrivèire, li descriéu la vido d'uno famiho à Alau entre 1890 e 1995. L'assouciacien " l'Espai Miejournau " prepauso tambèn de pouèmo que leis amaire de la telaragno pouedon manda pèr leituro publico, ansin que de mouloun de liame emé de sìti en lengo d'Ó vo que pretocon la lengo d'Ó, aparia d'adrèisso indefugiblo.
Ukrèino ! Ukrèino ! Á nouéstei pouarto, l'a la guerro ! De pertout sus touto la terro Vouélon abra un fue d'infèr Fair' espeta, Ooo desespèr, Noueste mounde que tant bèu èro, E que s'estoufo de sa mèro. Á nouéstei pouarto lei mitraluso Restountìsson e leis aubuso Dins lei campagno e lei fourest Esclàpon tout, sèns ges d'arrest. Fènt dei grand trau em' uno bruso Qu'enjusqu'eici tant nous enfuso ! Qu coumençè 'questo batèsto, Qu'au mound' entié prène la tèsto ? Despuei d'an, an mes dei canoun Sèns que degun fagu' un denoun, Sus la raro de la Russìo, Pèr lei mourga dins sa patrìo ! Coumo parlàvon pas sa lèngo Pèr lei mountagno, lei valèngo, Li an tira tau dei couniéu, Sèns destria, espountaniéu, Leis om' e frumo, deis d'enfant, Dins un chapladis d'espravant ! Mai dins lou mounde si teisàvon '' Mai que dure...'', marmoutiàvon Aquélei que fan soun gasan Mounte leis armo fan masan, Si chaiènt gaire dei famiho Aneientad' e en douliho. Acò perdurè dès annado, Mounte dei gèns à l'estoufado, Si fasien tóutei desquiha Coum' un cassun recrouquiha, Anant s'escoundre dins dei baumo L'ivèr, l'estiéu quand l'a la caumo. Mai lei sourtien à la sournièro En lònguei bando regassièro. E lei fasènt marcha au pas, Quand li prenié segound lou cas De guseja just pèr catàri, Ti lei tiràvon sèns esglàri. Touei lei paìs sabien la cavo, Mai lei cournat, lei manjo-favo, Noun disien rèn en soutaras Car coumtàvon, lei maufaras, L'argènt que móuson dóu rampòni Metènt 'quest pople à l'agòni. Après dès an de cridadisso, De long' à far sèi souscadisso, Lei Doumbassen vèrs soun vesin Si revirèron. Es ansin Que lei Rùssi, à sa rescousso, Eis Ukrenian faguèron cousso. E la guerro espetè marrido, Prenènt lei vil' à l'assalido, Semenant de pertout la mouart Qu'endaiè lei fèble, lei fouart, Sènso li destria sa vaio, Tau se fóusson de gargavaio. Tout l'óucidènt, sai gatamiaule, Fretant sèi man, doumàci aule, Fasènt mino leis ajuda, Pensèron bèn de tresmuda Soun negòci marchant de pouncho, Emé deis armo d'uno jouncho ! Á l'ouro d'uei vai de countùni Car l'a rèn coumo la pecùni Pèr faire s'alenti la pas E ourdi lei trata daspas ! Mai un jour dins 'quéstei plano Boufara fouart la Tramountano, E lei canoun e lei missilo Si teisaran e dins lei vilo, Sus lei carrièr' e balouard Si cantara sai de bouen couar Dei cansoun que voudran bachico, Luen deis armo e de sa musico. Lei cap d'estat e sèi ministre S'entaularan sèns lei traïstre, E souto lou regard de Trump E de Poutine, douei gròs grum, Zelinski seguira l'afaire Bessai renous, un bréu fougnaire ! Ensen destruiran sus lei raro De la Russìo, leis emparo De touei sèis engin atoumi Pèr sèmpr' e ar' encounsoumi, Pèr planta dei flour e deis aubre : Eiço entaia dins lou maubre ! Pierre Dominique Testa, ALLAUCH lou 17.1.2025 
|
 |
 |
|
Nouvé dóu Covid ! (Pierre Dominique Testa, lou 20.12.2020.) |