Noueste sìti à gràtis "http://lexiqueprovencal.com" de l'assouciacien "l'Espai Miejournau" prepauso un leissique óucitan de Prouvènço, leis estra d'un rouman " Fino e Cesar " dins quete l'autour Pierre Dominique Testa, escrivèire, li descriéu la vido d'uno famiho à Alau entre 1890 e 1995. L'assouciacien " l'Espai Miejournau " prepauso tambèn de pouèmo que leis amaire de la telaragno pouedon manda pèr leituro publico, ansin que de mouloun de liame emé de sìti en lengo d'Ó vo que pretocon la lengo d'Ó, aparia d'adrèisso indefugiblo.
L'Amour.... An póu que l'Amour pur li mèton dei cadèno ; Pamèns l'Amour, s'es dur, coum' uno mans' ourguèno Adus' à qu lou vièu, un bounur sèns egau, E tau coum' un aucèu que quito soun fougau, Vous fara avera un Cèu d'eterno gau. L'Amour a lou prefum deis auturo celèsto, Dei grands iéli cambu qu'aubóuron fièr sa tèsto. L'Amour a la sentour d'un etèr sènso fin D'un Paradis diven qu'a pas ges de counfin, Ounte l'umanita si couloum' à noun-fin. L'Amour, dóu jaussemin tène sa redoulènci E vous pougne lou couar tant fouart' es sa noulènci. E puei, douçamenet, enintro voueste nas : Coufèti, redounet, tau coum' un jouvenas V' enfiltro la sarvello, v' enchusclo d'aut en bas ! Au mès de mai, l'Amour, encanto lei flourèto Que si duèrbon toutuno au jue deis amourèto ; Margaiado, en coulour, péujo de soun neitar, Á sèi bèllei pampèto, un envouel d'abihard Vèn si prouvi de mèu e d'agrièro sa part. L'Amour es un estiéu, un soulèu que dardaio, Uno man que si paro, un riset que v' esgaio, L'Amour es dins l'espèro d'un pas que tourna mai Retrobo puei soun nis sènso far pu d'esmai Qu'un inmense silènci ; lei mot farien demai ! Àimi l'Amour dei gèns que fan dei caranchouno, E siguessias tróup luen, luen de soun envirouno, Vous màndon un messàgi e quàuquei mot d'amour, L'eimàgi de sèis ue, car soun couers en coumbour Noun póu pu sudura sèns vous un escabour. L'Amour fai veni bauj e perdès la canturlo ! Vous rougno la pensado à counta que dei burlo ! 'N i a que destimbourla cóurron devèrs la mar, E amount sus d'un cèngle, au mié de plour amar, Si tràson dins leis aigo au clarun dei lugar. Mai l'Amour es lumièro, la lus de nouesto terro Qu'escavarto lou mau e qu'aluencho dei guerro. L'amour vèn de l'Enaut. Sus lou boufe dei vènt Semèn' à plen de man 'queste chale poutènt, Que siguèn aganau vo que siguèn cresènt. Pierre Dominique Testa, Rouet lou 6 de julié 2026. 
|
 |
 |
|
Vengènci ! (Pierre Dominique Testa, lou 5.12.2017) |