accueilauteurassociationlexiqueouvragesassociationliensliens

Noueste sìti à gràtis "http://lexiqueprovencal.com" de l'assouciacien "l'Espai Miejournau" prepauso un leissique óucitan de Prouvènço, leis estra d'un rouman " Fino e Cesar " dins quete l'autour Pierre Dominique Testa, escrivèire, li descriéu la vido d'uno famiho à Alau entre 1890 e 1995. L'assouciacien " l'Espai Miejournau "  prepauso tambèn de pouèmo que leis amaire de la telaragno pouedon manda pèr leituro publico, ansin que de mouloun de liame emé de sìti en lengo d'Ó vo que pretocon la lengo d'Ó, aparia d'adrèisso indefugiblo.

Pluèio....countùni....










Pluèio ... countùni ...

Pregàvon fin qu'aguèsse d'aigo... !
Qu'au mès d'abriéu, fouesso primaigo
Siguèsson mes sus lei taulié
Dei marcat, e qu'emé foulié
Dei delùvi de brefounié
Toumbèsson en giscle grumaire
Sus tout l'espàndi dóu terraire !

Aro màndon dins la capello
D'à genouioun sèi raganello
Pèr aplanta dóu cèu l'eigas
Que tomb' arrage sus lei jas
'Mé sèis uiau, dins un fracas
De troun de Diéu mai espetaire
Que milo canoun aclapaire.

'N avès vougu d'aigo, de pluèio,
Dei camin mouisse 'mé sèi muèio,
Ebè ve, aro n'en avés
Emé dei nèbl' e segarés,
Que soun tant fousc e tant espés
Que si li pourrian blèu espèrdre,
Vous assegurant lèu qu'es luèrdre.

Sourtés tourna vouéstei bandièro,
Carrejas lei dins lei carrièro
Emé dei crous, dei pavaioun...
Cantas deis inne en proucessioun...
Em' un pàli fés virouioun,
Fin qu'eilamount dins leis estello
Diéu auvèsse vouesto favello.

Bessai alouro que lei raisso
S'arrestaran e que lei faisso
D'un arc-de-sèdo de velour
Desplegaran sèi sèt coulour
Dins lou toutun de soun amplour,
Pèr lou plasé deis ue, de l'amo,
Dins lou carme, dins la calamo.

Tau coum' avès fa dei preguièro
Pèr que l'aguèsse dei ribièro
Z-escumouso, dei revoulun
Qu'engoulìsson lèu d'embalun
D'aigo en giscle, dei coumoulun
De ruscle sut' eitant que fouele,
Pregas aro que tout fóusse mouele !

Qu'avèngue lei bèllei journado,
Un cèu d'asur, de bèllei prado,
Dei soulans curbi de margai,
Dei souarg' emé dei riau gai
Que ràjon dins de garagai,
Que vèngon lèu leis escourrèire,
'Mé sèi bounjour, sèis à revèire.

Qu'arribon leis ensouleiado,
Lei caro bruno, tout' usclado,
Lei chato qu'an de bras' eis ue,
Lei droulas que l' an mes lou fue
Mounte l'amour fara soun jue :
La destinado de sa vido,
Dins un' eterno counsentido.

Pregas pregas que plóugue pus
Pregas pregas, siéu à noun pus,
Doumàci toumbo.... toumbo l'aigo
Sus lei mato de bourtoulaigo,
Sus lou grame, sus lei bèulaigo,
E iéu siéu trempe dins mèis oues,
E dins moun èime : sènso voues.

Pierre Dominique Testa, lou 9 de mars 2024.
*

*
Ouro...l'Ouro que tugo... (Pierre Dominique Testa, lou 25 de julié 2015.)