Noueste sìti à gràtis "http://lexiqueprovencal.com" de l'assouciacien "l'Espai Miejournau" prepauso un leissique óucitan de Prouvènço, leis estra d'un rouman " Fino e Cesar " dins quete l'autour Pierre Dominique Testa, escrivèire, li descriéu la vido d'uno famiho à Alau entre 1890 e 1995. L'assouciacien " l'Espai Miejournau " prepauso tambèn de pouèmo que leis amaire de la telaragno pouedon manda pèr leituro publico, ansin que de mouloun de liame emé de sìti en lengo d'Ó vo que pretocon la lengo d'Ó, aparia d'adrèisso indefugiblo.
La dintrado 2026 deis escolo..... Dintrado 2026. Es la Dintrado deis escolo ! E se d'ùnei fan farandolo Sus lei grand plaço, dins lei court De l'aubeto à l'escabour, D'àutrei sai chóuchou, fan la bèbo Que preferìsson pèr cènt cèbo Ista au siéu de fatura, Vo sèis estable d'escura. Segur qu'aprènon à l'escolo De mounte vèn la peteirolo Sus lei pipiéu dóu galinié Quand tóutei soun à l'agounié. Li dìson coumo deis estello Dins lou cèu fan sèi ribambello, Mèntre que d'àutrei' en soun cantoun, Ìstoun souleto de plantoun ! Á vuech ouro dins leis escolo 'N i a que van faire tiro-molo ; Mai d'àutrei fouele de la gau Semblo que soun dei perdigau Courrènt au platet pèr sa grano, Car sàbon bèn qu'à la campano Que soueno fouart lou rabaié, Fau quita d'èstre rambaié ! E pèr lou proumié jour d'escolo D'ùnei an pres un' acourcholo Car van d'à pèd que soun pas luen, Toujour viesti emé grand suen. Chascun a despenja sa biasso E dintr' a remisa sèi liasso De papeiret e sèi caièr, Fènt coumo se fuguèss' aièr ! Es coum' uno fèsto l'escolo ! E se 'n i a que soun branquignolo, D'àutrei soun carme, resóuvu Á faire tout segound soun vut, Pèr èstre proumié de la classo Sèns pèr eitant far soun marjasso, Oubrant la nue coumo lou jour, Pèr tems de caud vo de frejour. Aaaa se poudiéu tourna 'à l'escolo ! Mi cenchariéu d'uno taiolo, Mi metriéu sus lou testoun Uno barreto de clinoun, E pèr ounoura ma patrìo Que vai de Mar-grand' à Marsiho, Noun parlariéu que Prouvençau, 'Mé moun acènt pica de sau ! E qu'enchau se dins l'escolo Moun regènt 'mé touto sa colo Mi charparié d'un toun amar Que siegue dilun vo dimars, Car au cap d'uno semanado, Counquista pèr leis arpejado De moun lengàgi drud de mèu, Redoun e mans' emai tant bèu, Finirié que dins nouest' escolo Chascun mandant sa clapeirolo, Noueste parla farié un tes Lei leissant tóutei tant pantes, Que devendrié uno mount-joio Ounte chascun emé sa voio, Apoundrié un mot de soun bres Vengu dei mount, dei ribeires. Bravo, bravo, la nouestr' escolo, Que tèn sus l'espal' en bricolo D'un coustat nouesto Lèngo d'O Qu'esblèujo pèr la bèuta dei mot, De l'autro la lèngo de Franço Qu'un jour faguèron aliganço, Pèr nous douna un ime grand Que dins lou mounde souen' à brand. Pierre Dominique Testa, lou 1 de setèmbre 2026. 
|
 |
 |
|
Gau de viéure ... (Pierre Dominique Testa, lou 21 de janvié 2023.) |