Lexique Provençal

Dans cette rubrique, des poèmes sont offerts à la lecture des internautes.

Gèu de l'ivèr !

Verai que fai pas caud encuei dins la campagno !
Rèn qu'un grad 'ste matin maugrat d'àutei baragno
Qu'empàchon sié disènt de l'ivèr l'amassagno,
Lei vènt de brefounié que fan dansa lei sagno,
E lei fouàrtei chavano que bàion la tussagno.

La fre a fa counquisto de tout lou territòri.
Amount sus lei coulino, lei countunious ventòri
Escóubon dei fourèst sèi vèlo de pantòri,
E counglaçant lis aigo di riau z-escapatòri,
Soun boufe picadis trisso lou fèr cicòri.

Tout aro lou Mistrau calo sèis alenado,
Que fouarto, tempestouso, dins sèi 'scapamountado,
Pourrien descabessa lei pibo artisounado,
Lei pinastre gigant dei com' esfoulissado,
E derraba lei roure dei rasig' enfounsado.

Dins lou valoun tepu touto l'animaudiho
Courre si recata dins sèi trau d'escoundiho.
E l'auro, ras de sóu, enintro, s'envediho
Pèr miés jala lei brout dei mato de bauquiho,
Que lei làisso marfido au mié dei bouscasiho.

L'estiéu, quouro la caud à miejour vous assanco,
Es bouen si ramenta leis estendudo blanco,
Lei cim' ennevassado d'ounte leis avalanco
Entìron tout, poutènto, sèns rèn que li fè tanco,
Mai l'ivèr 'n avèn proun e lou soulèu nous manco.

Es tout gris, despuia. Es en plour la naturo !
De chasque ramelet, coum' uno perfiluro,
Dei lagrèmo de gèu, freulo z-assieunaduro,
Perlèjon, esbrihaudo, au boufe de la suro
Qu'escoub' un cèu nevous vega de faiss' escuro.

Defouero lou troupèu s'amato dins lei tousco,
Au mitan dei fourni, rescoundu dins la fousco.
Pèr cóup dins leis abroues, agànton 'no boudousco
Pèr garni sa ventresco, dei fuèio de lantousco,
Mai tout es mouart, jala ; de longo soun en bousco.

E dins la nue, bèn d'ouro, souéni 'mé la trouïno.
Arrìbon afougado, preissad', à la jassino,
Recuberto de ramo, de fueièto, de brino,
Soun tant afangoulido, que dins lei nivoulino,
Leis àuvi que bramàsson à far póu ei galino.

E tre sus lou relarg, sout' uno lagagnolo
Que lei bagn' en founsour, lei vaco dins la riolo
Qu'es que fang' e que fens, espèron, branquignolo,
Que li duèrbe la pouarto em' un cóup de picolo,
Mi regachant afrido e tenènt la lignolo !

Dins l'estable, vau, vèni, pèr alesti encaro
Leis eisino pèr móuse doumàci sai, tout' aro,
Faudra passa lou lach, l' adouba 'no destaro,
Arrenja lei barriéu e ni paro ni garo,
Durbi ei vaco lèu que davans fan emparo !

Aaaa coumo soun galoio, e coumo soun urouso
D'enintra dins sèi cello, furna lei gramenouso
Pèr destousca lei flour just un pessut fleirouso,
Tambèn s'enebria dei prefum dei cirouso,
Á la soust' aqui dintre, luen de la nèu grenouso.

Pèr l'estr' abadarnado, amìron sus la baisso,
La nèu que revouluno dins uno nevaraisso
Que fa póu, qu'esbravacho, e que sèns ges d'amaisso,
S'espessisse de longo enjusqu'ei naut baubaisso,
E que fouarm' un mantèu recurbènt touto gaisso.

Leis amelié ailas flourìsson à la mudo,
Mai lou fre achini, de sa malo mourdudo,
Lei vai rima anue à nouesto dessaupudo
Leissant leis ameloun emé soun estóussudo,
Que lèu acebenchi, van faire sa casudo.

Vèngon lei mès d'estiéu, lei fouàrtei calourasso
Emé si dardai dre que la mar lèu recasso
Pèr coungreia l'asur e lou blu deis aurasso ;
Vèngue lèu lou soulèu, lei roucas en fournasso,
Car la fre, 'n avèn proun, voulèn la calourasso !

Pierre Dominique Testa, ALLAUCH lou 1.2.2025

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?