Lexique Provençal

Dans cette rubrique, des poèmes sont offerts à la lecture des internautes.

Garlaban...

De matin Garlaban, clencha devèrs Aubagno
Que li dien que quand plóu, l’a tout puei que si bagno,
Si parpo de lumièro e douno la cantagno
À ‘quèlei que li van jouious ‘mé sèi coumpagno.

Subran tre que Durant mando si rai de lus
Dins la couelo es la fèsto e tóutei fan chorus :
Que siegue lei bestiolo, lei voup dins lei garrus,
Vo lei rigau lei tourdre lei jai lei mesengus.

Ailas à d’eilamount, l’a longtèms que lei cabro,
An desapareissu, e despuei tout s’envabro,
Encavo que degun vo quàsi, escalabro
Lei pendis qu’à cha jour, lou soulèu de fue abro.

Lou tèms sèmpre mai fuso… Alouro de qu’ enchau !
Lei bèsti soun en pargue au Peinau eiçavau.
E Lóulo lou bargié, emé soun assemau,
Li baio la pasturo e li trase la sau.

Dóu pue, souto la crous qu’es touto rouvihado,
Lou beuvesé alin s’estalouiro en bancado.
E quand es nue sarrado, abas dins lei masado,
Lei casau à cha un fan lum’ à la filado.

E puei zóu mai lou jour, s’aubouro dóu Levant
Atusant l’enlusido palo de l’estelan.
La naturo pren vido, tout es esbrihaudant
Garlaban s’encadièro tau coum’un soubeiran.

À miejour sus lou cèngle, dei rebat de lumièro
Gìsclon en garbo d’or, e aqui en renguièro
Lei roucas gigantas de sa bello drechièro,
Recàsson lou soulèu jusco dins lei raièro.

Eilalin peressouso, Marsiho en plen cagnard
S’ estalouiro bagasso en ribo de la mar
‘Mé sèi mouloun de plaço, carrièr’ e balouard,
Que cóuron disavèrt tóutei devèrs lou pouart.

Dóu ranque la vilasso semblo uno fourniguièro
Qu’à sèi pèd, catoulico, pouarto sus sa bandièro,
La Vièrgi de la Gàrdi mounte lei repetièro
Fan soun grand roumavàgi emé lei peissounièro.

La ciéuta fouceiano a tambèn soun drapèu !
E souvènt, auturouso, testardo de repèu,
Fai entendre sa voues e fai fouesso estampèu
Quand crido ‘’ anen l’OM ‘’ e mando sèi rampèu.

O tu, O Garlaban que regardes ti fraire :
Testo-roujo, lou Taoume, tambèn doues agachaire.
Tenés d’à mènt l’Estello au couentre dei raubaire,
De touei lei piha-càmpi que vènon de tout caire.

Sigués nouéstei custódi ; que vèngue lei nemi
Pousquessian s’auboura un quicon enclausi
Pèr lei restanca nèt. E de nous encoumbi
Que pousquèsson jamai va far sènso mouri.

De touei lei vilajoun que cènchon tèi coulino,
Qu’aguèsson à l’ubac à l’adret sèi champino,
Alau es lou pu bèu, emé sèis escalino
Que de longo an douna ei fournié sèi faiscino.

La Trèio, menimouso, es dins lou mounde entié
L’oumbro d’uno platano, un tapis, un taulié,
Emé quatre jougaire, de carto en plen julié,
Que Pagnol dins sèi filme s’en faguè trufandié.

« Tu, mi féndes lou couar…, fè Cesar à Panisso,
Escartafigo alor coum’ uno troubadisso
Dins soun jue de maniho, butant la brouiadisso,
Larguè soun rèi de cur dins un’ engaugnadisso !

Aquest recassamen « …à tu, ti féndes rèn ? »
Faguè dóu vilajoun quiha sus d’un cresten
E dei gèns dóu miejour, dei nèsci sèns’ enfren,
Que despuei soun mourga pèr soun abestiamen.

Aubagno aro n’es pus la poulido viloto
Que l’Estello Aubagnenc’ emé sa Mateloto
Li dansavo chanu sèns faire de parloto
Emé Dono Reynaud qu’en fènt sa passaroto

Moustravo dóu coustume, lou pu bèu deis atour.
Car èro la pus bello au mitan de sa court.
Pourtav’ uno couquèto en dentello de Tour,
Un bèu jupoun pica, un faudiéu ‘mé d’ajour.

Talo coum’ uno rèino, travesso la vilo.
Touei lei gèns la badàvon, car n’ i aguèsse cènt milo
De béllei prouvènçalo à cha uno à la filo,
Elo soulo avié la bèuta que respilo.

Soun noumbrous lei vilàgi qu’escoundu dins lei pin,
Fan vido de la casso coum’ amount à Peipin.
E se soun à l’uba au mié dei petelin
N’en demouero pas mèns, que sian pròchi cousin.

Roquevairo entrevau, reçaup leis aigo claro
De l’Uvèuno verdalo, car nàutrei sabèn aro
Que Santo Magdalèno ‘mé sèi lagrèm’ amaro
Coungreiè puei lou flume que rajo vuei encaro.

Lascour à d’eilamount, bèn souto lei roucas,
Pren deis èr auturous au mié deis agrenas,
E gardo dins soun nis nebla de croupatas,
Sèis enfant à la sousto de tóutei lei fracas.

La Destrousso pecairo, isto sèmpr’ un passàgi
Pèr aquéstei que fan mestié de carrióulàgi.
Pèr encuei l’autorouto lei mand’ à l’arrambàgi,
Mèntre qu’à passat tèms, l’anàvon sèns’ arràgi.

Cadolivo a vira sa caro vèrs leis Aup
Es sèns dùbi l’encavo qu’eilamount sus sèi chaup
Lei pastre quouro n’i a, fan sèis amagatau
Rescoundu dins lei mato au mitan d’un coustau.

Mimet, dei sèro nègro, es la tuto perfacho,
E sei gèns an coustumo de prene en plèno facho,
Lou vènt terrau frejas que fasié lei patacho
Si gansaia marrit à lei met’ en gamacho.

Enfin l’a Plan de cuco que desparti d’Alau
Cresè, coum’ auturouso, enfin trouba la clau
De soun independènci car si pensav’ esclau
En tant qu’avié lou fèn e l’autro lou peirau !

E acò bastè proun, en mai de sèi garrouio
Que falié aplanta, pèr qu’emé leis arsouio
Lei catau lei bourgès faguèsson sènso trouio
Abas uno ourfanello, amount uno despouio,

E despuei seissant’ an, sian noumbrous d’espera
Qu’un jour un municipe fague runifica
Lei doues part dóu vilàgi, qu’enchau s’es cratica,
Pèr qu’enfin visquessian ensen ramouiera.

Alor, tu Garlaban, veiras dins tèi coulino
L’envóu dei dindoudèto, lou quiéu dei cardelino,
Un grand niéu blanc, au cèu ti faire limousino
Pèr festeja Alau dins sa quito termino.

O tu, O Garlaban, lou pus aut de l’Estello,
La sierro de Marsiho, bellissimo cimèlo
Qu’aprivades lei fado chascuno enfantarello
Dóu pople de la mar que de longo ti bèlo,

Enrasigo nous founs en terro dóu miejour
Que pouarj’ à sèis enfant la calour de l’amour.
O tu lou soubeiran qu’ispires tant d’autour
Baio à moun esperit lei joio e la baudour.

Pierre Dominique Testa, lou 26 d’abriéu 2015.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?