Lexique Provençal

Dans cette rubrique, des poèmes sont offerts à la lecture des internautes.

A touèi leis ensignaire oucitan de Mountpelié

Dins un membre ablanqui, vueje, en grand tristun,
Soul, quàuquei pouest poussous adournon l’embalun .
Lei paret d’un rebat dei ressouen pietadous,
Mi remandon que mai soun bate-couer isprous .

Moun lié, en plen mitan, un boulé de linçòu,
Isclèjo tout soulet dins l’espai qu’es en dòu .
Penjèri bèn au gànchou ma barèto roussenco,
Pauvèri mei libras sus lei laisso lachenco,

Mume sus lou cabès, istalèri moun Diéu,
Assajèri tambèn d’oublida meis adiéu .
Mai jamai tout acò, es proun pèr pas ploura,
Pèr sèntre moun trefouns feni de s’assoura .

Ajacu sus moun lié, la testo revessado,
Pantaìssi d’un vouiàgi aluencha dei radasso .
De clinoun, lou regard esperdu dins lou cèu,
M’esmàri sus leis aigo en repaus de moun trèu .

Que pousquèsses, moun raive, avera leis estello,
Rada dins l’aire mounde . Dins uno canestello,
Vouguèssi, voularèu frusteja leis aucèu,
Meissouna leis espigo avans que sié lou gèu .

Adounc m’empartirai n’ei raro de la terro,
Trenarai’ mé lei niéu dei tapis de moufèro,
E dei ceniho aurado derraba deis avèrs,
Agantarai lei fiéu qu’an teissu l’univèrs .

Bastirai au noun-rèn un reclaus de lumièro,
Que póurra pèr toujou mestreja la tubièro,
Que caupra pèr Amour la fugido dóu tèms,
Que dóu boui proumieren enauravo lei vènt .

Samenarai proun drud un margai primadié,
Si vieutèsson lei chato’ e lei drol’ enchalié .
De l’abadié dòu pouart, engreurai sus l’autar,
Dei fusto encrincelado de roubin, que lou flar,

Sus Marsiho’estirado au rai d’un bouen soulèu,
Gisclara dei teulat enmescla de savéu .
Esbleugissènt de róugi en faisso d’ar-de-sèdo,
Caufara la grand vilo de soun ristre de pèrlo .

O, ma douço ciéutat, qu’as vist naisse mèi rèire,
Sei trebau, seis arcié que gansaion sei crèire .
Vouguèsses, tu, capi lei revòu de moun èime,
Car l’Amour qu’ai pèr tu , vounzisse de souen lèime,

D’abord qu’enfantounet, mi bressavon tei fiho,
tei frumo emparaulado d’uno lengo en gasiho,
E qu’embabaroucha dins sei faudo en douliho,
Li voudriéu proun encaro jouga èis escoundiho .

De tout aquestou pople, auturous, parlufié,
Que brassèjo lei mot, lei sòufio’mé foulié,
Lei flourisse, lei ausso, de pèbre lei piquèjo,
De sau de soun viéi pouart, à vèlo lei coufèjo,

Voudriéu n’en treslausa, encuei lei arpejado
D’aquelo sinfounié, bello Marsihalado,
E dins leis avengudo qu’encanto lei cigalo,
Vague lou picadis dòu bachas que s’embalo .

Chanço, d’escambarloun, de pousqué d’un agach
Esperlounga sa visto sus lou mounde maufach,
Si voulent desquiha pèr dei tarminasoun
En luego dóu pais engarba la meissoun .

D’aquesto benestànci que sènti que s’aluencho
ei ressouen que sounsounon d’uno radiero aubencho,
Digo li de l’ista, felibre, digo lèu,
Que póurra ‘nca teni lou joueine balarèu .

Noun ! Va crèses pas ? La respelido mousto .
As que de lambreja long dóu Lez, dins lei brousto .
Rado vo que nous vèn sus d’un càrri famous .
Va viés pas dardaia de soun pas ufanous ?

Vai li à Mountpelié,trevo lei courredou,
D’en pertout si recampon, soun leis esparradou
Qu’esperavian que venguon . Devesson pèr carriero
Leis idèio estucho e ti van fa cachiero .

De Bourdéus, de Clermount, de Coùni e de z-Ais
Dei quatre caire de nouèstou grand pais,
De Tarbes, de Gueiret, Briançoun e Marsiho,
S’encourron lei jouvènt beure à la santo siho .

Que sieguon benesi, li qu’an mantengu viéu
Nouèstou lengàgi dre que s’enrasig’ encuèi .
Que siegon treslausa nouéstei bèus amoulaire,
Ensignaire chanu, cercaire e agusaire .

Sieguès benastruga, touto la proufessaio,
Demié nàutrei, trachigue au mitan dei bartaio,
Lou germe gréu qu’avès palica au soulèu .
Pèr acò, sieguès parpa dei lausié lei pu bèu .

Butas nous à la rodo, que sèmpre viro e torno,
Digas nous qu’es poussible que la lèngo s’adorno,
Dei zistoun e zestoun dei valèngo e dei quèi,
E ’nfiòucas nouéstei bouco ei sansogno d’encuei .

Gramàci, vàutrei touti, empuraire dóu fue .
Gramàci pèr lou lume bouleguiéu dins la nue .
Osco, oucitanìo, Prouvènço es ta fiho,
Osco moun bèu pais, à tu lei litanìo .

Pierre Dominique Testa, lou 8 de setèmbre de 2003 .

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?