Lexique Provençal

Dans cette rubrique, des poèmes sont offerts à la lecture des internautes.

Acènt dóu Miejour

D’acènt, n’en ai iéu ? Avès un brave fègi ?
Pèr que questo favour ? Qu’es aquéu privilègi ?
Se vous disiéu qu’es vàutrei, pecaire, gèns d’Uba,
Que d’acènt n’avès un, qu’es gaire bèn trouba !
Es sai-que tant verai, que deis Aup à Mar Grando,
Lei paìs óucitan qu’àimon de fa lou brando,
Dìson à qu vóu saupre, que …’fan, parlas pounchu,
A vous faire lei bouco, acò es bèn sachu,
Coum’ un cuou de galino, vo queste d’un estrùssi,
Quand vèn de faire l’uou, cridant coum’ un alùssi !
Avès bell’ afourti que semblan dei limbèrt,
Nàutrei vous recassan que sias touei d’arnavèrt !
E puei acò s’aprèn à la façoun de vèire,
Car noun avé d’acènt, pèr vàutreis, ausissèire,
Es èstre de Paris vo d’un endrech ansin
Qu’engoulissès finalo voucalo emé grand trin !
Pèr aqui es parié ; e faire de musico
Emé chascun dei mot, es de nouesto pratico.
E cha souen que lei dian : de quour’ en quour’ es plang,
Puei douço meloudìo que si mouvejo plan.
Tant, póu faire l’auboi, à soun tour lou sautèri.
Mai li vèn de peta en milo refresquèri,
Quand sa gamo subran s’encagno, pren lou goun,
Semblant d’uno chavano, la raisso, lou bouioun !
Aquèlei que n’an ges d’acènt, lei fau bèn plagne
Doumàci l’empourta sarié-ti en Espagne,
L’acènt de soun oustau, queste de soun paìs,
Es un pau enmena lou déuve de soun nis,
La terro de sèi camp, de soun vènt l’alenado
Que lou mòssi sus mar cregne tant lei boufado.
Es coumo, se pega à sèi souié tacha,
Empourtavo sa fango sènso pas gamacha.
L’acènt enfin pèr nàutrei, es aqueste bagàgi
Enveirènt mai tant dous quand parten en vouiàgi.
Es pèr aquest que pèno, quour’ es puei eisila,
Sa lèngo qu’engouloupo, que n’en pòu parfila
Touei lei mot à cha un d’uno façoun lóugièro,
La grana d’espressien que chanudo l’encièro
Emé d’eimàgi bèu que bàion lei susour
E que pouarge à l’armo la pas e la mansour.
Avé l’acènt pèr nàutrei, es dins la charradisso,
Parla de soun paìs em’ embriagadisso,
Sènso n’en pipa mot, sèns descriéure soun cèu,
En diant de cavo vaigo sèns lacha lou moucèu !
Capoun de souart … que noun, jamai aurai vergougno
De l’acènt de moun brès qu’encar encuei mi vougno !
Jamai au grand jamai renegarai l’acènt
Que de Bourdèus à Vènço boufo dins chasque vènt,
E que dins lou miejour, de Prouvènço à Gascougno,
Dei valado d’Itàli que rèn lei desvergougno,
Au lunchan Limousin coum’ au gai Lengadó,
Fa trelusi lei fraso d’un soulèu à cha mot.
N’en rougìssi pas brico de far de zistoun zèsto,
Quand dins uno counverso dùvi leva la crèsto.
Vouéli que moun acènt siegue retrounissènt
Clar sounor e dindant, un tantinet brusènt,
Mai jamai mau-après, mau-courtès de sèis àrri,
E qu’un bouen parisèn pourrié crèire vulgàri.
Que cha mot prounouncia pouesque faire bèu-bèu,
E qu’enfin si teissèsson li que soun rababèu.
Voudriéu que moun acènt siégue sus moun auriho,
À far bavariha toueis aquéstei bourdiho,
Que crèson dins Marsiho que de parla pounchu
Li baio d’impourtànci e nous douno lou chut !
Èbè mèi bouens ami, s’engànon lei pelucre
Quand ‘mé soun acènt faus, noun cèrcon que lou lucre.
Nouest’ acènt es rèn mai qu’un troues de galoubet
Que cha noto a soun mot que danso en reboumbet.
Duvrien aquélei gèns, tau coum’ uno preguièro,
Escouta nouest’ acènt à ginoui e pèr tièro,
En luego nous mourga e sèmpre si trufa
De noueste biais de dire qu’a rèn d’agourrufa.
Nouest’ acènt a lou chic de met’ ei babihàgi
Dei raioun de soulèu qu’esclàron lei visàgi.
Semblo quouro parlan, que la mar vai e vèn
Dins un balans eterne. De mai pèr lei jouvènt
Li douno l’èr d’aquéu que li dìson Batiste,
Doumàci es tranquile. E quand lou nóumon Tiste,
Es que soun bèl acènt li baio de barnis
Eitant coum’ à l’aucèu que canto sus soun nis.
Esperas ; es pas tout ! Quouro dian dei fadèso
Es coumo se vesias d’un’ arlatènco l’èso,
Sa cap’ en poulounèso, soun riban de velous,
Que fai d’èlo uno rèino deis ue blu nègre blous.
L’acènt es un mirau qu’a milo marroumbrino,
E au soulèu trelus quand caufon lei champino,
Apound’ à uno dicho un glas qu’es benvengu
Que lèvo la pepido quand l’estiéu es vengu.
L’a dei milien d’eimàgi dins nouesto charradisso.
’Mé l’acènt poudès vèire lei plour dei tamarisso,
L’oulivié que rasino quand toumbon sèi rampau,
L’óudour d’un pan de sège qu’a couina à prepau,
Dei picoun sèns peluco, lei prefum deis aràngi,
Que soun coumo l’encèns que dessègno leis àngi.
E vouei dins nouest’ acènt poudès tout magina,
Lou soulèu e la mar, un cèu alumina
En subre d’un vilàgi que quicho sèi carrièro
Pèr miés leis apara e li faire fresquièro.
Poudès puei entrevèire un poulit bastidoun
Sèi paret blanc de caus, si téule, soun pradoun,
Lei nèblo dei cigalo que brusìsson dins l’aire,
Dounant ei paìs d’O la mansour d’uno maire.
Enfin pèr tout vous dire, ’mé l’acènt dóu miejour,
Avès dintre lei mot l’oumbro dei troubadour.
Avès dins chasco rimo, lei soubro d’uno lèngo
Que se fasèn pas mèfi, de la mar i valèngo,
Pourrié desaparèisse, s’esvali pèr toujour
Quand pèr aro es encaro dóu bèu la reflamour.

Pierre Dominique Testa, lou 13 de jun 2013.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?