Lexique Provençal

Dans cette rubrique, des poèmes sont offerts à la lecture des internautes.

Pantai....

Moun armo s’en vai luen dins dei rauso celesto
E moun couers, esvani, las de mìlei batèsto,
Si làiss’ amouliga pèr sèi pantai de tèsto
Aqui que l’ a jamai ni dùbi ni moulèsto.

Questo vid’ enfre iéu mi pouarge dei viàgi
Que chascun à de rèng, souto sèis acatàgi
La nuech de tout soun long, après fouess’ abenàgi,
Póu fair’ en un pantai que mèn’ au pivelàgi.

Li siéu esta adès que soulet penequàvi.
Jacu sus ma litocho, proumèti que pensàvi
A rèn de rèn, pas mai, que puei mi destesàvi
Dóu trabai de fóussat que tant lou pantaiàvi.

Boutas, es pas eisa d’entamena sa jouncho
Adematin tant d’ouro, que vous poudès de trouncho
Cabussa dins l’estable e v’ ana testo pouncho
Espeta la paret que de bóuso vous vouncho !

Seguramen qu’après tant d’ouro d’esperfouart,
Que n’avès la trambloto vous fasènt cambitouart,
Noun vous vèn qu’uno idèio, sai-que, es un pau couard,
Es de vous ajassa em’ un certe counfouart.

Un cóup que sias aqui coucha e closco vuejo
E que de faire obro, noun avès pus l’envejo,
Alor poudès parti, se pas rèn vous traquejo,
Dins lou mounde d’enaut vo d’adins qu’espacejo.

Devenes plen lóugié, sèns pes, coum’ uno plumo.
E dins un viravóu, qu’acò v’ es pas coustumo,
Vous troubas à l’en cóup dins un lue qu’embaufumo,
E dins un qu’à rebous, de sa verta vous tumo !

Eici dins questo jasso sèns relèu, sènso brido,
Sèns degun bescountour, sèns degun’ avalido,
Lou soul fach de pensa, d’avé uno sentido,
Vous douno de l’esta sènso n’en faire crido.

Alouro cabussas dins la souem benurouso,
Que la voudrias sèns fin de longo countuniouso.
Lei bras souto lou frount, la caro mouligouso
Emploumbado au linçóu que la mudo febrouso.

Aqui, siau, resquihas, linsas douçamenet
Coumo dins de coutoun, subre d’un caminet
D’uno estranjo mansour qu’a ni terme fousquet
Nimai dei raro luencho, ni counfin mau-clouet.

Subran sias pus sus terro… Au Cèu li sias pancaro !
Sias coum’ entre mitan, vanegant d’aro d’aro
À l’en cóup emé d’aise, dins un lue sèns’ emparo
Ount tout es mouvedis, ount tout es en tantaro.

Aqui coum’ en ganarro lei cavo s’encadènon
S’enmèsclon à bèl èime, s’abrivon e s’arènon,
Dins un brand fouligaud, apasia s’asserènon
E zóu mai que pus fouart, ve-lei que si foursènon.

Quouro dins uno brefounié que pau s’amaisso,
Quouro dins un garagai sènso gès d’antibaisso,
Sias tragu dins d’avènc que fasès d’ iss’-abaisso,
Pèr vous trouba subran quiha sus d’un bau-baisso.

Ço verai pèr lou couers, es verai pèr l’ausido.
Car s’auvès un ramàgi d’aucèu à nue falido,
Vo se d’un roussignóu presas leis estampido,
A la subit’ espèto lou bruch d’un’ assalido.

Erias quiet, tranquile dins un móuve de pas
Sèns balans d’un relògi que vous fagu’ un ticas,
Vaqui pas que tout càmbio e que dins un boumbas
Vous atroubas tanlèu en fugid’ en percas !!!

Alour’ aqui, emai siegue pas voulountàri
Qu’em’ espountaneuta devengués temeràri,
Placas aquéu fracas dins qu’un saut, qu’un esvàri
Pèr vous vèir’ asseta, entaula em’ un pàri,

Souto d’uno verdesco, à counta dei fadèso
Qu’es l’estiéu, que fa caud, e que d’uno cervèso
Engoulissés la moufo emé un’ aviadèso
Que v’ es pas coustumièro, sèns vous n’en fa susprèso !

Aro li cresés bèn à n’aquesto bavacho ;
E n’en sias tant segur, que sèns’ uno gamacho,
Aplempougnas lou vèire, parié voueste cardacho,
E au moument de la bèure, la bièro d’uno tracho,

Zóu mai vous atroubas nada dins la Mar Grando,
Luen dins lei pirenéu ’m’ un’ armado en desbrando,
E auvès peramount l’oulifant que remando
Eila à Rouncesvaus, de Rouland la damando.

Avès sèns lou vougué, escambarla lou tèms,
Car dins aqueste mounde sias pas jamai enfren.
Leis annado, lei segle prènon lou mume tren
Que filo, filo lèu sai-que dins lou Neiènt.

Aqui l’a lou Grand Carle, que de sa soubeiranço
Douge cènts an d’après, counoueissen la grevanço
D’avé leissa soun fiéu pèr mitan la matanço
Si fair’ escourtega dins un’ orro calanço.

Au founs de voueste lié, l’a tout que si reviro,
Avès lei tressusour, e la póu vous treviro.
Lei batèsto, lei guerro, lou sang, tout vous eniro,
E voudrias defugi lou trach d’aquesto biro,

Que vesés, que travèsso aqui toucant l’espàci,
Alor mandas lei man pèr v’ apara la fàci,
Tressautas de l’esmai e d’un gèst eficàci,
Embandissés à dia l’assalido…e Diéu gràci,

Vouest’ esperit s’en vai, fai l’areto, vai plan,
Floutèjo sus lei sègle coumo fai lou milan
Quouro soul dins l’asur, desplègo nègre e blanc
Soun grand couers de coussàri deis alo de gigant.

Eici dins quest’ auturo sias coum’ uno ceniho,
Un gran menimouset, soubro d’un’ escoubiho,
Sènso fouarmo ni couers que jogu’ eis escoundiho,
Dins lou mounde treblaire di raive e de sèi guiho.

Linçóula d’un susàri, pèd descaus, en cantagno,
Vouletejant courous sèns l’oumbro d’un’ issagno,
Vous retroubas subran fàci d’uno barragno.
Au mitan : un pourtau, tout perlejant d’eigagno.

Un ome barbassu, caleièjo, lusèjo.
Parpeja d’un’ auriolo, sèmblo bèn que pleidèjo
Escrivènt ‘m’ un craioun…puei peralin banèjo
Dóu founs d’aquest noun-fin, un roumiéu que blanquèjo.

N’en veici encar’ un… e zou mai n’ i a qu’arribon,
En roudelet pigna, pèr fube s’amoulounon
Aqui pròchi l’ingrès, que quàuqueis un si ribon,
E, ‘mé d aigo signado, vaqui que m’aspersounon

De soun espóussoun d’or, puei d’un signe de crous,
De sèi man benedèto, d’un toun dous, arderous,
Mi dìson de paraulo que fan lei gèns urous
Quand dóu founs deis estello, pareisse deis afous

Lou Fiéu de Diéu vivènt, envirouna deis àngi
Qu’un’ inmèns’ assemblado de Sant cantant lausàngi,
Aclam’ emai venèro apara pèr d’arcàngi,
Qu’emé sèi grands espaso, càsson d’esprit estràngi.

Subran de pèr mitan, viesti en damisèlo
En jouvènt breujadis, viéu de ma parentèlo
Touei lei mouart, lei vivènt, moun grand, ma tanto Bèlo
Ansin que mèis ami, ma couralo manèlo.

Li vau à l’endavans pèr dins mèi bras lei prene,
Lei quicha sus moun couar sèns’ èstre tróup soulène
Li dire que leis àimi qu’es à pas rèn coumprene,
Quand zóu mai enca ‘n cóup, lou mume fenoumène,

Fai vira ma baudufo, e pèr tout’ embrassado
De poutoun e de frene, m’atrobi ‘m’ un’ ardado
De Diàussi banaru qu’an la couo espeiado,
La caro d’avalado, que de sèi man levado

Mi crèidon à tutet, ‘’ sian eici dins l’infèr …
Dins lou fue eternau que nous rimo lou cuèr…
Aqui l’a ges de lus que pèr un salivèr
Pouesque nous amansi e nous baia ‘n pau d’èr…’’

Cerquèri dins l’escur mount’ èro la lumièro.
Mai la troubèri pas : l’avié que la sournièro
Qu’entrumissié lou cèu…alor dei tirassièro
De nèrvi, piha-càmpi que lou remouars encièro,

Dei laire curo bóusso, murtrié, sagataire,
Dei gèns drud gair’ ounèste qu’èron deis estampaire
Emé lei qu’avien d’èr, aquélei caucigaire,
Si seguissien ansindo, pèr dins lou fue si traire.

Prenguèri la pahoulo qu’em’ elèi m’entirèsson,
Sentiéu sèi det croucu ... Voulien pas que m’aguèsson
E que sèi bras quichaire dins un tuert m’agantèsson.
Pèr iéu, afoulesi, m’ enchalié que mourèsson,

…Que pousquèssi à mèns, dóu Mèstre autissime,
Sèntre lou dous alèn, e soun regard sublime
Lou recassa de longo dins un ur bellissime
Es ço que souvetàvi en moun mènt, en moun ime.

Quour ‘au mitan d’aqui, au crus d’aquéu grouun,
Subran aperçubèri rescoundu d’arrié d’un,
Un sant viesti de blanc que fasènt balançun,
Mi paravo sa man coumo pèr soun plagnun,,,,

Mai iéu que tout bèu just, devèrs éu m’aproumàvi
E que dins un envans, foulas mi couloumàvi
Pèr defugi lou fourne, toumple sènso pecàvi,
Mi retroubèri nus, coum’ eis Indo lei sàvi,

Au mitan d’uno chourmo que soul’ uno viholo
Gancihavo de caire. Aqui en seguignolo
Sènso vergougno, chascun regachant la gabiolo
Au founs dóu courredou, tiblavo sa dourmiolo !

Dins un abourdimen sèns noum, man bousigairo,
Un troupèu d’ om’ e uno chato que bescairo,
Quilon fouart soun plasé, sa tisso charnigairo,
Que souvènt deis uman n’en fai uno bravairo.

Iéu mescla dins la tièro, de la mino marjasso,
Au moumènt d’enintra dins la tuno pourcasso,
Risèri mi mourgant dei frumo frejalasso,
Qu’adès iéu counouissèri sa pudour plan bagasso,

Lou pichounome arcu, tesa de s’espeta,
Sentiéu mounta la racho, e lei mouel’ arqueta,
Escambarlèri lèu l’arco-lié bugeta.
En fue mi bandissèri pèr plen mi deleta

Quouro à n’aquest istant, d’enaut de ma litocho,
Toumbèri sus lou sóu emé sus la cabocho,
Uno gibo tant grosso, que de faire bambocho,
Emai sié dins mi raive, mi dounè la petocho !!!

Pierre Dominique Testa lou 6 de febrié 2015.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?