Lexique Provençal

Dans cette rubrique, des poèmes sont offerts à la lecture des internautes.

Sant Jan à Allauch...

Vaqui Sant Jan, Sant Jan d’estiéu !
Siguen countènt car ges de niéu
Vèn entela la vouto bluro
D’aqueste jour que gaire duro.

Lou counse Segne Povinèlli
Que viéu segound leis Evangèlli
Duerbe lou sèr lou festenau
Pèr la remèsso de la clau.

Alor entàntou trège jour,
Parié dins tout lou grand miejour,
Sara lei decan dóu vilàgi
Que menaran lou roumavàgi.

Lei jogo van à la seguido ;
Prènon lei bocho d’assalido.
Dins lei tubet mant’ un jouvènt
Van escoumete soun argènt.

Souto taulo dins lei barlan
Lei càcou e leis archelan
Tìron dei plan sus la coumèto
En pantaiant à cènt bihèto !

Que siègu’ au Round, sout Nouesto Damo,
Au Resada qu’a boueno famo,
Vo encar au Panorama,
Tóutei lei van sai qu’abrama !

S’auve dei mot gròs coum’ un bras
Dei maugrabiéu salas e gras
Dei jurjo garço, un pau puto
A fa ferni lei basaruto !

Mai à Marsiho dins la bouco
Lou gromot toujour encouco.
Alor aqui que sian d’ Alau,
Pèr l’escorno fasèn chalau !

Pas proun d’entèndre « èèè…moun vié ! »
Que regalo lou gengivié,
S’entènd « …couioun de cag’ à ràgi … »
Que pèr l’auriho es un ramàgi.

Lou dijóu après lei bocho
Se l’avié jamai de bambocho,
L’avié dei gèns en plen mitan
Que ti fasien grand chamatan.

Recampa de davans lou bar
Fàci la glèis’ e soun relarg
Si tenié lou mast de coucagno
Que li pensa, t’ai la pissagno,

E mi venié la cagarello
De m’ engaugna uno moustello,
Doumàci ai jamai sachu
Mounta sèns èstre rimachu !

Lou pu lóugié un cóup d’amount
Emplempougnavo dei boumboun
A pas saché de que n’en faire
Tant l’en avié penja de caire.

Lou mai que gagnavon lei joio
Car èron prim coumo d’anchoio
Eron lei nebout Cabassu
Que pas v’ un èro tripassu.

T’avien dei bras tout loungaru ;
Lei fasien gaire pataru !
Eron lei set fraire Gasello
E cafissien soun escarsello.

Metien sèi pèd tau dei mouchèto
Qu’escarlimpavon en visèto
Un cóup d’avans un cóup d’arrié
Lou pege fin, qu’èron gourrié.

Lei falié vèire, esquiróu,
Coumo tressautàvon dóu sóu
Dins un envans qu’à la cimello
Arribàvon sènso poujello !

Alor prenien tóutei lei joio
Agafado de biscamboio.
Un cóup fini, entour dóu mast
Avien dauba coumo dei cast,

Emé dei pouest e quatre cléu
Mountado sus d’un carruléu.
Aqui falié pesca endùstri
Dei paquetoun bèu coumo d’ùstri.

Que meraviho lei gansado
E leis embaisso dei bouitado.
Tout acò d’un biais daricat
Fach pèr dei man fouero pecat,

Bessai lei det d’un farfadet,
D’uno fado sus soun bidet,
Bessai d’un àngi que courduro,
Que fa dei nous, dei perfiluro.

Après d’eiço venien lei saco
Que barravian em’ un’ estaco.
Li anavian adins de drech
Lei pèd quicha car èr’ estrech !

Si metian tóutei au depart
E quand trounavo lou petard
Courrian fouele sus la grand plaço
En s’embrouncant dins la boujasso…

Lou pourmié èro lou fèni
Qu’avié agu aquest’ engèni
De courre lèu sènso toumba
De tèsto pouncho au caladat !

Après d’acò duvian furna
Tèsto pouncho dins un grand plat
‘Mé la lengo dins de farino
Que n’en avié bèn un’ eimino,

Se pèr cóup d’astre uno pèço
La trouberian ‘m’ uno Lucrèço
Pèr eimàgi de soun patac
Que sensa vendrié deis ubac.

De fach, l’avié gaire d’argènt :
N’avien abena lou sourgènt !
Avian la fach’ enfarinado
Lèst à fregi tal ‘un’ aurado !

Mai es pas tout ! Sus la grand plaço,
Lou coumita, de boueno raço
Avié tibla un long treiau
Tóussu d’un sabènt feisseiau,

Que l’avien agafa bèn fouart
A un arganèu jamai touart,
Ount li penjavo nóu dourguèto
Barnissad’ un pau verdèto,

Que duvian em’ uno machourlo
Que si l’acano lei chichourlo,
Roumpre la tarraio d’un tuert
Que sas, lou fasian de bescouer !

Doumàci d’acò embrega
Nous semblavo de renega
L’amour qu’avian dei cav’ enciano
Que lei gasta èro uno dano !

Mai ve, sabés, à la debuto
Erian crentous davans la buto,
E zóu, ma fisto l’anavian,
Que lei gerlèto lei roumpian,

E lei badaire entanterin
Dins lei recaire, matouchin,
Nous encouravon de sèi chamo,
Que mountavon à Nouesto Damo.

Un cóup lei crugo fendasclado,
Subran si prenian ‘no gisclado
D’eigasso que l’avié adins
Que fuguèsse miour de vin !

Venié lou jue dei massapan
Vo dei boueito de fèrri blanc,
De magnin li dìson mai d’àutrei
Qu’èro tout palié pèr nous-àutrei.

Lei duvian tóutei ‘mé dei balo
Bandido pèr un’ espingalo,
Lei faire caire sus lou sóu
Dins un brusas que trasié póu.

L’avié bessai bèn d’àutrei jue
E l’istavian fins à la nue.
Mai aquélei dins ma memento
M’an escapa e rèn sourgento.

Ero pas de gaieta d’amo
Que lou sèr à la calamo,
Rintravian chascun à soun siéu
Ero caudet, èro l’estiéu.

Lou vinto tres, qunt jour que sié
Lei mesteirau ‘mé lei masié
Lei carretié, fasien la fèsto
Pèr la carrièro emé brudèsto.

Tre que la nue èro toumbado
Lei fifre jugavon l’aubado.
Acoumpaina dei galoubet,
Dei tambourin, dins lei tubet

Siervien lou darrié pastagat
A sèi chalant coum’ au clergat.
E lèu lèu au Bar dei Cigalo
Ount’ esperavo la chouralo

Ansin que tóutei lei dansaire
E un mouloun de barrulaire.
Tóutei puei si recampavian
Souto la beilé dei gabian.

Que d’aquest tèms, elèi tambèn
Buvien un canoun d’aig’-ardènt.
Aro em’ un varbau t’empègon,
E sèmblo que si n’en delègon !

Verai que soun dei founciounàri
Mai souvènt soun dei coussàri !
Mai ve, anen, fasen avans
E reprenen lou dous balans

Dei bèllei fèsto de Sant Jan
Que l’aiòli e lou bajan
Si manjavon dins lei carrièro
Emé chascun sus sa bandièro

Un feisset de flour dei prado
À la coulour de sa valado.
Lei fiho pouarton lou capéu
Qu asiga, qu tiro-péu,

Puei si soun meso un faudiéu
Emé un caracot badiéu !
N’i a qu’an la coueif’ à la fregato :
Es de segur pas de burato,

Mai es de bello valenciano
Broudado ‘mé de merinjano,
Tout acò au pount d’Agoubert
Car vènon de Castèu Goumbert,

Qu’es aqui qu’an counserva
Lou miour biais pèr s’atrenca.
Mai encuei an pas mes sa jupo
Car fa tróup caud : es pas sa cupo !

An preferi ‘mé la bricolo
S’assiéuna puei à l’espagnolo
Emé un jupoun de meissoun
Que met lei jouein’ en boulissoun !

An mes sèi basse de coulour
Emé dei règo, ‘mé dei flour,
An sounc’ uno camié courtèto
Que li tremouelon douei poussèto,

Que demàndon dins soun coursàgi
Dei caranchouno dei chaspàgi,
Dei man endùstri pèr l’amour
Que douno e gau e cremour.

La majo part d’escambarloun
Sus dei chivau qu’an d’escaloun,
Móunton de galis sus la croupo
Car rìscon rèn, an boueno poupo !

Lei fau vèire, coumo soun bello
Aquélei chato en damisello.
E lei garçoun, quéstei meinas ;
Fernissènt, à visto de nas,

Si sènte que soun bèn countènt .
De lei mena : soun calourènt,
Car aqui subr’ en couverturo
An puei bessai à voues escuro,

Trouba aquesto fiançado
Que n’en faran sa mouierado.
Quant i’ a agu de mot d’amour,
Aquéstei, d’este proumié jour,

Que si soun dich sus l’esquinau
D’un d’aquélei tant gròs cavau,
Qu saupra puei un cóup lou dire
Emé seriéu, sènso pas rire,

Que Sant Jan, s’es esta aposto
Presènt lou jour de Pantecosto,
N’en es pas mèns maridadou,
Pèr lei jouvènt soun nisadou.

Mai perseguen noueste relat
Que dèu tout dire sèns aflat.
Tre que la nue es puei toumbado
Pouden faire la pegoulado.

Lei gèns dóu coumita dei fèsto
Destribuìsson à la lèsto
A qu n’en vóu, un douei pegoun
Que bras en l’èr, boustigoun,

Aubouron tau coum’ un fanoun,
Coumo lou drapèu d’un menoun.
En uno vouto, ‘m’uno brouquèto
Gisclant soun fue, sèi beluguèto,

Touei leis estajan dóu vilàgi
Enciéuclon, van à ‘arrambàgi,
Dóu mouestre que viéu dins lei gourg
Qu’aperavans l’avié lei four

Qu’aqui la croio li cousié
Que fasié tant e tant d’ensié.
La vaquito la garamaudo
Emé sèis ue que fan bihaudo.

A l’esquinau fach d’esmeraudo
Que soun escaumo esbrihaudo.
A soun endavans, lei bachas,
Lei tambourin en brand’ abas,

Emé lei fifre, galoubet,
Destrassóunon dins lei tubet,
Quéstei qu’accouidassa à taulo
Em’ un chicouloun, sèns paraulo,

Chìmon de tant qu’an la lignoto,
Leis ue redoun de sa febroto.
Subran tau coumo dei poustèu
S’aubóuron, van de cantèu,

E sens saupre ço que n’en es,
Si mèsclon au fube qu’espes,
S’esperlongo dins lou vilàgi
Óublidous de sèi carpignàgi.

Bessai que sàbon pas l’encavo,
Ni lou camin, nimai l’enclavo.
Mai li van, jouious, empega,
Que tout aro pèr vanega,

Li faudrié bèn quatre cledat
Pèr qu’aguèsson soun roudat.
En passant dins la grand carrièro
Lei bachùcon lei repetièro

Enfin aquélei dóu flouclòri
Que pèr Sant Jan encuei fan flòri
‘Mé leis arlatenco qu’ensen
Coum’ un eissame, à de rèng

Pàsson souto lei rigouncèu
Que d’àutrei tiblon en arcèu.
Lei fau vèire, amarinouso,
Coum’ en parèu, lèu, countuniouso,

Envertouion sa countro danso
Entanterin qu’emé secanso,
D’àutrei desnóuson sèi grand bras
Pèr coumença d’un galant pas,

Siegue pica, siegue linsa,
Siegue francès sèmpr’ acinsa,
Uno giganto farandoulo
Souto la lus deis estindoulo.

Alor li pren la fernetègo
Ei gèns d’Alau e la petègo.
Davalon de soun trepadou
Que n’avien fa soun quihadou.

Mai la fèsto, es pèr chascun
Que làisso soul jamai degun.
Leis un prènon la man deis àutrei
‘’ Anen, venès emé nous-àutrei …’’

Crìdo subran ‘no marsihèso
À n’un qu’èro dins la soulèso.
« - Encuei, es la nue de Sant Jan, »
« Prenès la vid’ à plen de man . »

« Venès ‘mé iéu moun bèu moussu, »
« Vous moustrarai visoun visu »
« Coumo si danso la fricasso »
« Que li bàlon lei brando biasso ! »

« - Oou ma bello, mai siéu pas fouele, »
« Preferìssi de tira mouele »
« Soul dins moun recaire rejoun »
« Pulèu que de sauta pèd joun ! »

« - Èro uno brago… fadalié, »
« Tè, agantas lou cabelié »
« Puei estacas-lou à ma taio »
« Aro viéu bèn que sian en aio ! »…

E dei parèu ansin si fouarmon
Que dins la nue, ensen s’endouarmon…
O, qu’èron bèu lei jouvencèu
Que dins l’escur fan lei cadèu.

Si remiràvon dins lèis ue
Que lancejavo noun de fue,
Mai milo feisset de lumièro
Que recassavo la sournièro.

Ar’ arrìbon dins la peirièro
Questo d’Imbert devèrs Trinièro.
Li dìntron pèr grapo lei gèns,
Soun dei mihié à tout lou mèns.

E sèmpre mai lei tambourin
Lei bachas emé lei clarin
Lei viouloun e lei zambougno
Lei galoubet lei fanfougno,

Màndon alin sèi ressounanço
Soun tarabast soun alegranço.
Vaqui lei couquéu qu’à cha un
‘Mé sèi bandièro tout en un,

S’avanquìsson sus lou mitan
Dins lou bruch lou chamatan,
Pèr saluda de la coumuno,
E lou Curat que leis aduno,

E puei lou Counse Povinelli
Que sèis ajoun fan santibelli !
Un cóup qu’an passa lou pountin
Si ràmbon à la sousto d’un pin,

Si pàuson puei un moumenet,
Pèr de dire un tantinet
Qu’ alènon la frescour de l’aire,
Presant ansinto soun recaire.

Es vuei la nuech la mai courtèto
Que tre quatr’ ouro : es l’aubèto.
Lou Couns’ aganto un pegoun,
L’abr’ em’ un peirard à carboun.

Fa lou tour dóu mouloun de boues
Que dirias bèn un tavèu d’ oues.
Pren’ un moucadou de sa pòchi,
E long dóu legnié de pròch’ en pròchi,

L’eigrèj’ en l’èr tout plen de joio
Alor póu coumença la roio,
Roio de danso, ounte es rèi
Lou dansaire que saup la lèi

De la cissolo, de l’escart,
Dóu resquiha qu’es à despart.
Chasco chourmo fa sa seguido.
Prènon lou fue à l’assalido,

E bèn coustié li fan lei bano,
Li dànson fouel’ em’ engivano,
Emé l’arrisco, malurous,
De si rima qu’es douleirous

La pèu di cuèisso, lou testoun,
E l’entre-camb’ e lou mentoun !
Si deban’ alouro la Souco
La Garamaudo qu’es la mouco.

N’ i a que tambèn fan la fricasso,
Que chasque parèu à voues basso
Si li recounoueisse, ailas,
Car qu noun a soun altercas !

Lei jouvènt de Castèu-goumbèrt
Amarinous tau lei limbèrt,
Sàuton sus sèi fàussei mounturo :
Lei Chivau Frus, vaio seguro !

Elèi li Gai Farandoulaire
Fan l’arlequin’ à l’angl’ escaire,
La Couquèto lou Rigaudoun
E puei lou Grihet lei meissoun.

L’avié l’Escolo de la Mar
Que jamai rèn fasien d’asard,
Elèi èro la Mateloto
Que dansàvon emé d’escoto.

Sant Jan avié sa cacaloucho
Que degun li fasié loucho.
Tout siau, si fasien lou Pas Gré
E leis Espaso : qunt plasé !

L’Estell’ Aubagnenco, li disien,
Qu’èron uno benedicien.
Dono Reynaud la presidènto
Beilejavo emé l’empento,

Tau coumo fan lei capitàni
Que la mar, es soun soul doumàni.
Nous-àutrei lei jouvènt d’Alau
Que sara noueste quicho-clau,

Coumo passavian lei darrié
Fasian Lei Courdello, parié
Que puei tóutei leis àutrei colo
Tiblado dei quatr’ espingolo.

Aaa… qunte fue, qunto gaioro
Qunte roudau aubènc deforo !
Puei demenisse la flambour
Que làiss’ uno fouarto calour

De braso, d’un róugi ardènt,
Que vous mete dins lou bouiènt,
Tau l’infèrne dóu catachierme,
Que lei dansaire li fan terme.

Aqui lei jouve de la fèsto
Que restàvon dins lei ginèsto,
Vo que dourmien sus lei roucas
S’aubóuron tau coum’ un eigas,

E van afri planta sèis ue
Çai de davans bèn dins lou fue.
Alor ramba l’un darrié l’autre,
Degun li vai d’un cap à l’autre.

Vaqui que lou proumié s’enanço
E l’assemblado fa calanço.
Tóutei retènon soun alen
Doumàci es l’acarramen

Entre l’ome, entre lou fue
Qu’acò si fa puei en tout lue,
De saupre qu sus la matèri
Segnourèjo de man de fèrri !

Lou joueine coure, si debesclo,
Lei tambourin pìcon l’aresclo,
E lei bachas e lei tambour
Rampèlon e soun en coumbour.

Subran lou chat de soun pèd dré
Prene l’auroun sènso desré,
S’envouel’ au cèu dins lei belugo
E si cremant lei parpelugo,

Tras lou brasas dins qu’uno sauto
S’aplatusso alor dins la pauto
Aqui qu’avien trach un ferrat
D’aigo pèr cas de mauparat !!!

Leis àutrei coumo d’aucèu
Li van, soun tóutei jouvencèu,
E en troupèu à sa seguido,
Au fue gigant fan l’assalido.

Pèr elèi, es vinse leis infèrne
Que de sentre en vóu l’Eterne,
Qu’aqui l’an coum’ au cap dei det
Car soun lei masc, lei farfadet

D’aqueste sèr de la Sant Jan
Que lei viei dìson abelan
Car douno pèr tout l’an l’abounde
À lei que soun gènt emai counde.

Mai demié aquésto jouvènço
N’ en i’ aguè v’ un sènso chabènço.
Avié pas courregu proun lèu
E à la lus dei soul calèu,

S’èro engana de quant de pas
Li falié à visto de nas,
Pèr pousqué sauta lei flambo
Sèns’ avanié ni d’un ni d’ambo.

En luego d’aterri d’à rèire
Coumo fasien touei lei courrèire,
D’un pas esquèr pren soun envans
Tau ti l’ aguèss’ un buto avans,

Mai dins leis aire, aiaiaiai,,,,,,
Ço que si passè… ‘cò noun sai !
Toujour es, que pèr maluranço
Si faguè uno trabucanço,

Pecairet, au mitan dei braso
Pamèns dóu fue bèn à la raso,
Que li rimè si grand chivu
E braio camié e fichut !

À la lèsto dei bràvei gèns
Lou póutirèron entandoumens
Que d’àutrei ‘m’ un ferrat plen d’aigo
Lou bagnèron d’un biais sout’ aigo.

Lou carrejèron en ambulanço
A l’ospitau em’ emenanço.
Fuguè gréu au segound degra
Encar’ encuei n’es tout pigra !

Ansin la fèsto s’acabè
Mai pu jamai lou fue sautè !
Aquesto bello quingenado
Que pèr Sant Jan, n’ es qu’ un’ aubado,

Si barro pèr la cavaucado
Lou dimenche, en matinado
Que seguisse lou jour dóu Sant,
E acò desempuei mil’ an.

A cinq ouro, à l’Eleitri
Mounte l’a tant de sicoutri,
Lei carretié emé sèi miolo,
Un à cha un en seguignolo

Arríbon qu’ adeja s’escrídon
« Òoo ‘fan de garço… » e counvídon
Leis àutrei que leis an rejoun
D’entamena lou cambajoun,

Sèns’ espera lei percheiroun
Dei busquetié qu’ em’ un tiroun
Tènon sèi bèsti toujour pàsi
Que de lei vèire dai l’estàsi.

Un cóup que tout aqueste mounde
Aguèsson vist qu’ avié l’abounde
Dei mèisse pèr lou dejuna
E dei vin pèr si l’aduna,

Si couloumèron qu’avien fam
E prenien tout à plen de man.
D’aqui souto lou çamentèri
Flouca de velous, de charchèri,

Emé sèi capèu berigoulo
Pica de flour de farigoulo,
Davàlon tau dei casco-blad
Sout’ un soulèu de trento grad,

Tóutei lei groupe fouclouri.
Tout jouious e tout coumbouri
De s’atrouba sus l’esplanado
Au mitan dei muou fènt l’aubado

Que respouendon ei bramadisso
Dei saumo luen de sa bastisso,
Si coulóumon elèi tambèn
Sus la grand taulo emé suen

Car avien póu de s’embruti
Encavo de tróup trangluti.
Subran un chafaret espèto
Sus la carrairo emé troumpèto

Cournet bachas e grosso càisso,
Que si l’apound’ emé proun d’aisso
Lei viouloun emé l’arquet
Semblant un gat qu’a lou chouquet.

Lei musicànti soun noumbrous
E bèn luen l’èstre sansougnous.
Lei d’arrié ‘mé lei taravèlo
Soun lei Cabrèt’ e cabusèlo.

N’en voulés un de bèu sinfòni
N’en vaqui v’ un sèns ceremòni !
Leis un si víron vèrs la mar :
Soun de l’Escolo de la Mar.

Leis àutrei gàchon Garlaban
En fènt flisca sèi long riban.
Soun à la franco margarido
Chascun jugant à sa sentido

N’ i a fouesso qu’àimon d’èstre à l’oumbro
Souto lei fuèio encaro soumbro.
Puei à la fin quand tout vai bèn
Moun fraire Jòrgi Presidènt

Va faire mai soun long devis
Pèr que chascun prene d’avis
Doumàci à cha cavaucado
Pèr defugi la mauparado

Fau ana d’aise ‘mé mesuro…….
Lou defila, es bouen’ aguro,
Póu d’ar’ en lai s’acoumença.
Bonàdi fouesso, qu’asciença,

Van regacha, tout refreta,
Sènso jamai pas s’asseta,
Doumàci l’ouro es impourtanto
E degun devrié fa sèi panto !

Proumié lei chivau de mounturo,
Que fan sèi rèng à voues escuro.
Après leis atalàgi d’ai
Que fau buta em’ un coussai,

Puei lei muou ‘mé soun carretoun
Qu’espèron sèmpre lou bastoun.
Vèn puei leis atalàgi double
E quàuquei buou jounta pèr couble.

Aqui pèr faire roumpeduro
Lei dansaire d’uno courduro,
Emé lei fibr’ e tambourin
Fan touei un móuve cambo-fin

Emé lei bras, douei cóup en aut,
Un cóup en bas, e mai adaut !
Sèi pèd resquíhon tout tranquile
D’un biais galant e coum’ umile.

Ansin leis èrso desfielavon
E d’un cap à l’autre anàvon
Dins la carrièr’ au trepadou
D’un bèl efèt estiradou

Qu’aurié fa linguèt’ au Bóuchoi
Pèr queste jour de Sant Aloi.
Après d’aquest fube balaire
Arribàvon lei reguignaire,

Que soun lei pu grands atalàgi
De trei quatre cinq bèstio sàgi.
Soun elèi que dóu festenau,
Soun e lou nùcli e la clau !

Touei lei pacan dóu terradou
Leis aparaire ausadou
Dei raço lourdo de tiràgi
Que sa vid’ es un esclavàgi,

Soun aqui viesti de sa blodo
Broudado d’èspi ‘m’ uno rodo,
Braio nègro de gròs velous
Souié tacha tout rantelous,

Para de soun long estrivas
Que lei fan amount ei Sauvas.
Lei fau vèire coumo camínon,
Qu’emé lou fube s’avesínon.

Au tracanat de sèi cavalo
‘Mé sèi capèu dei làrgeis alo,
Sèmblon bèn lei cousin de Diéu
Tant soun urous, lou couar badiéu.

Lou proumié que duerbe lou tai
Es moun fraire qu’un gròs coussai
Li penj’ en double sus lou couele
Que pèr juga crèido « sian fouele » !

Lèu lèu recàsson sèi coulègo
Qu’ adeja lou vin empègo,
« Avèn de croio, sian d’Alau »
« À Nouesto Damo fèn chalau »

« Brave Brave… » màndon lei gèns
Qu’aplaudísson lei troubant gènt.
« Osco… » encaro fai uno vièio
Que de Manosc’ èro à la Trèio.

Que meraviho ‘quélei bèsti
Que d’ùnei an un pichoun vièsti
Sus lou malus, sus lou testoun
Flouca de riban de vetoun,

Voulastrejant dins l’aire sin
Qu’aluènchon mouissau e cousin.
L’ i a dei Coumtès qu’an bello como
Que sa sellèto es uno dromo.

Lei Boulounès en raubo blanco
An soun coulas que s’espalanco.
L’ i a d’Ardenès que soun balès
Que dins lou tèms, fasien relès

Sus lei grand routo quand lou sèr
Pèr si louga èro de fèr.
L’ i a douei Merèns qu’ an sus lei piauto
Uno mato de péu proun auto,

Que li bàio un’ elegànci
Un quicoumet de benestànci.
E lei darrié, lei Percheiroun,
Soun de tóutei, lei boujarroun

Que gusèjon coumo d’enfant
Emai siguèsson ‘strambourdant.
E alor n’i a, deis atalàgi
Pèr lou mèns sènso badinàgi,

N’ai denoumbra ‘no ribambello,
Countant carreto emé ridello,
Chivau de mount’ em’ un parèu
Aquélei qu’an un toumbarèu,

Enfin n’en feniriéu jamai
Tant soun noumbrous, trei cènt bessai !
A cha un sus lou cous s’avànçon
Mai jamai, noun si desavànçon.

Lou passo-carrièro desfielo
Sèns que degun pass’ à la pielo
Bèure pèr si desasseda ,
Nimai dintra au Reseda

Pèr croumpa d’aig’ emé de glas
En brigaiant quàuquei counglas.
Tóutei lei gèns crèidon d’espaime
Sentènt qu’acò es coum’ un baime,

Que leis estac’ à sèi rasigo
Emai entr’ elèi fàguon ligo !
Doumàci demié lei carretié
Leis aselié e lei bigatié,

Aquest qu’a lei pu bèus arnèsc
E lei chivau lei mèns brousèsc
Póu de segur gagna lei joio
Que li fara crèisse sa croio !

Es Jòrgi que mai sus l’estrado
Counoueissènt touto l’encountrado,
Lei regach’ un à cha un.
Sèns prene part, sèns lejousun,

Li escandaio soun tengu,
Soun tracanat, s’es bèn tragu,
E quouro touto cav’ es boueno,
Alor soun noum pertout ressoueno.

Lou capelan en grando capo
Qu’à n’éu, l’a jamai rèn qu’escapo,
Emé soun bastoun signadou
Qu’espousco coum’ un giradou,

Lou benesisse d’aut en bas,
Finco pèr l’an, àguon la pas.
Ansin fai Guihaume Lepoutre,
Benesissènt leis ai lei póutre,

Touto bèsti qu’en lei bastido
Sièr au trabai que fai la vido.
Dins lou vilàgi fan douei tour
Emai l’ague dei bescountour,

Car lei balouard soun estrech
E lou fube, en des-e-vuech !
Mai tout acò puei s’atermino
Dins l’estrambouort de la choupino !

Sus la plaço qu’avans la guerro
Ero un fierau sounco de terro
Mounte sesié lou lavadou,
Bourda de doues abeuradou,

Si tèn ar’ un pargue gigant
Ounte si pàuvon lei vagant.
Es aqui detras l’estrado,
Que si fa la darrièr’ aubado.

Es bèn souto la muraiasso
Tout facho rèn que de caiasso,
E mounte règno encar la fouent
Que rajo d’aigo pèr de bouen,

Sièrvon aqui l’aperitiéu
Que lei gabian quand vèn l’estiéu
Li van que courron, curo-biasso,
Pèr si soubra de sèi manjasso !

Soun counoueissu, aquélei nèrvi
Soun pas dei gus, lei mal-ivèrni,
Soun pèr la mita dei bourges
Dei gèns coussu coumo n’i a ges !

Soun de la raio, que li dian !
L ‘a deis atèus, l’ a dei crestian,
Di iéu-m-en-fóuti que pantàion,
E d’ensuca puei que badàion !

Mai, garo … car quand si n’apróumon
De la taulo, si li coulóumon
D’un tau biais, que … rasclo... lou pan !
Lei bescuchèlli, lou cambajoun à plen de man,

Leis engoulísson quatecant
E sèns manièro lei bajan,
Parié leis apetissadisso,
E lei merguès e lei saucisso !

E nàutrei, ‘mé lou fifr’ en bouco,
Pèr uno fès, sian pas la mouco !
Es lou countràri que sarié :
Parié coumo lou sarraié

Anóuncio que sian au printèms,
Lou tambourin qu’es marco-tèms,
Creido bèn fouart à qu vóu saupre,
‘Mé dei ressouen finqu’ eis Escaupre,

Qu’aqui se sian encar’ en Franço
Amor d’uno vièi’ aliganço,
Sian en miejour, lou País d’O,
Que nouesto lengo, Lengo d’O,

Vai de Cóuni ei Pirenèu
E de Marsiho à Bourdèu,
Vai d’Auriac e à Toulouso
De z’Ai à Arle e à Fouiouso.

Es aro l’ouro de la brido,
Dóu Gaiardet qu’à Bedarido,
L’a lou darrié dei bourrelié
Que lei saup faire pèr mestié.

Tóutei bùvon lou pastagat,
Bèn espessous, e lou clergat
Pèr aquest jour de benuranço
Quinco pas mot sus la drihanço.

Alouro l’encant s’acoumènço.
Mai proumié, fèn souvenènço
De toueis aquélei que soun mouart
E qu’an déjà rejoun lou Pouart.

Lou cridaire à cha dès franc,
Vèn noumeja l’ome abelan
Que dins lou capèu, sa bihèto,
La trai cachous d’un’ estirèto.

Après tres encant, ‘qui n’ i a basto.
Moun fraire gacho la banasto,
Se s’es emplenado de sóu
Se soun afri vo se soun móu !

« Vague un, vague dous… alor,
Toco » creido « capoun de sort »
« toco lou tambourin … » quilo
Que sa voues vol’ enjusqu’ en vilo.

E nàutrei drech subre l’estrado
Qu’aven begu à la filado
Trei vèire plen de pastagat
Que n’ an pourgi sènso paga,

Prenen lèu lèu lei galoubet,
Lei tambourin lei cimbalet,
E lei bachas e lei clinquèto,
Car de juga es puei bachèto,

Uno fès qu’avès la ganarro,
E que au frount avès la barro !
Ansin, à cha cinq, sièis encant,
Jugan ensen tout barbelant

Nouéstei moucèu lei pu poulit
Que nous vènon à l’esperit.
Dins lou fub’ es l’enebrièsso
Chascun li vai em’ ardidèsso

De si remembre de jouvènço,
Dei defunta e dei neissènço.
Aqui es lou soul jour de l’an
Que si rescouentron lei pacan,

Car dins lei mès d’ivèr d’estiéu,
Que siegue jun que siegue abriéu,
Que siegue lou marrit nouvèmbre
Que tóutei rèston dins soun mèmbre

Soun soul davans l’inmènso jouncho
Adematin tre l’aubo-pouncho,
E dins l’ estable e lou póuciéu,
Sourtant defouero lou vaciéu,

Lei menant paisse pèr lei prat
Souvènt tapa d’un encierat,
Car la pluèio noun leis espragno
Sus lei camin long lei barragno.

Alor pèr elèi questo fèsto
Es dóu bouenur ço que li rèsto.
Es tout ço qu’an de mai sacra,
Que sièguon paure vo ancra,

Qu’aguèsson un gigant de mas,
Uno baito dins un ermas,
Qu’aguèsson uno grand famiho
‘Mé dei felen, e chat e fiho,

Soun touei lei flàmei defensèire
De la Sant Jan despuei si rèire.
Que l’un manquèsse au rampèu
Acò farié un estampèu !

Car s’ es pèr rèn que l’es aussènt,
E que dóu jour s’es fach esènt,
S’es desounta pèr deis annado
Perdènt tóutei sèi cambarado.

« Vivo Sant Sant » crèidon lei jouve,
« Longo mai », fan lei viei, que brouve,
Tènon pas drech, tant soun cansa,
De touto voio desansa

Mai que testard, vouelon veni,
Car aqui soun rajouveni
De festeja la cavaucado
De St Aloi que fa prouado.

Lei tambourin sèmpre mai juegon
E dins si raive toujour vouegon.
Lou pastagat rajo à bro,
E de la glèiso à Sant Ro,

N’es qu’ inmènse fourniguié
Que brind’ à far de beluguié !
Sian quàsi tóutei plen de nasco,
Que pèr parla….tenè… zóu rasclo…

Aurian besoun d’un pau d’ajudo
Pèr garda un pau de tengudo.
Moun fraire tèn soun gaiardet :
Mai es èu que lou gardo dre !

E au moument que lou pountin
Semblo vara de l’en dedins
Uno trounado dei pu fouarto
À ti desgounfouna ‘no pouarto,

Mando subran uno bravado
Que sèco nèt leis encantado !
« Vivo la brido e Sant Aloi »
« Vivo Sant Jan toujour galoi ».

‘Qui lou mèstre dóu gaiardet
Pèr sounc’ un an tout alegret,
Pouarg’ à touto sa parentèlo
Bèn mai que pèr la Sant’ Estello,

La glòri d’èstr’ en soun vilàgi
Lou gardian d’aquest eiritàgi
Que soun puei nouéstei tradicien
Que fau garda sèmpr’ en acien.

À cha un, alouro s’en van,
Lei carretié en char-à-banc
E tóutei lei chivau de tiro
Que dapasset an fach sa giro.

Tambèn leis ai li van tranquile
D’un tracanat bèu e umile.
L’an que vèn viéuran la Sant Jan
E la brido mèso à l’encant.

A l’an que vèn, díson ensen
Si sian pas mai, siguen pas mèns.

Pierre Dominique Testa, lou bèu jour de Sant Jan 2015, 24 de jun.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?