Lexique Provençal

Dans cette rubrique, des poèmes sont offerts à la lecture des internautes.

En Chino 1

Luen eilalin, luen luen en Chino,
Ai vouiaja, que mi pegino,
Pèr ana puei vèire moun fiéu
Au paìs dei nègo-bouen-diéu.
Counoueissés la bago espousiho,
’Questo qu’un jour à n’uno fiho,
Li dounan pèr sacra lou jour
Qu’ensen si proumeten l’amour.
Èbè vous n’en vau counta v’uno
Coumo n’avès auvi deguno !
Àtou, bessai que tirara de long …
Mai que li fa, bord qu’es tant bon
D’escriéure sèis aventuro
Que sèmpre de fiéu en courduro
S’encadènon coum’ en un jue
Que lei atous mèton lou fue !
Anen, zóu escoutas moun istòri
E siguessias tout ententòri !
Ero en óutobre, en plen mitan
Dóu mès. E càspi, d’aquest an
Douei milo dès, ‘mé moun espouso
Que s’es bravoun’ es pougnejouso,
Ve, poudian gaire si teni
De ploura sèns si counteni.
Machinavian souvènt lou Ouèbou
Pèr sus d’Eskaip, de noueste Sèbou
Qu’es l’escais-noum de Sebastian,
Vèire sa caro de crestian.
Aaa moun Diéu, vai, vous v’assegùri :
L’aven passa lou mau d’endùri !
Quant de còup si sian marfoundu
De lou sèntre luen, rescoundu
Alin dins leis ubac de Chino
Qu’es lou paìs dei nivoulino,
Dei nèblo, dei segarés espes,
Que rèn que li pensa, tenés,
Mi vèn leis àrci, la trambloto
De mi bandi dins uno cloto !
Auriéu manca puei en degun,
Vous v’escoumèti dès countr’ un !
Enfin, poudian pas si resóuve
De si planta coumo douei rouve,
Pega de davant lou veira
D’espera de long’ à gueira !
Mai de l’autre coustat dóu mounde,
Emai sa nouvièt’ en abounde
Li faguèsse bais e poutoun,
Noueste fiéu coum’ un fouletoun,
Un jour nous larguè à la lèsto
Que pèr elèi sarié ’no fèsto,
S’acetevian de vouiaja
Sèns pèr eitant desbagaja,
E de veni dins sèi planuro
Ounte la fre li es tant duro
E que la caud, s’acò li prèn,
Vous couino sus plaç’ à de rèng !
Aiaiai, qunt paìs la Chino !
Zóu mai va dire : m’estransino !
E sabés : de vous racounta
Sèns m’espragna, sènso coumta,
Mi douno d’alo pau coumuno
Que n’en sènti à cha uno
Sèi grand vèlo si desplega
Pèr pousqué puei m’apetuga,
Avera lei sànteis auturo,
Que tout pouèto si l’empuro.
…Après qu’aguessian chamata,
Fin fin ensèn tout barata,
Li counfessant que de countùni
Mi desfautavo la pecùni,
M’ assegurè emé gentun
Que dóu vouiàgi lou toutun,
Eu lou prendrié tout à sa cargo
Que siegue lou manja, la jargo.
Si n’enchautavo bèn dóu près
De nouéstei croumpo z-e dei frès.
Verai d’argènt n’avien à bóudre
Eitant coum’ a de jus lou fóudre.
Doumàci pèr iéu, nous diguè
Que tressautè tout sus d’un pèd,
« Lou principau es de vous vèire, »
« Mai noun que mi siguès devèire »
« En quaucarèn qu’es voulentié »
« Que vous va pouàrgi ’mé plasé. »
Tant ba tant fa, vaqui qu’en Chino
Parten touei quatr’ en treboulino,
Que sas, vous diéu qu’avian lou couar
Que dins lou pitre batié fouart !
Qu’es brave moun fiéu ’mé sa frumo.
Doumàci à soun acoustumo,
Nous venguèron prendr’ en Alau
Pèr vouiaja sènso trebau.
Aguessias vist à Marignano
Lou troupèu que dins leis andano
Fourmavian emé nouéstei sa
Sus d’un carrióu qu’avian fissa.
Aurias dich qu’erian uno bando
De bóumian que fan puei sèi gando.
Enfin brèu, prenen l’avioun
Qu’avié pus rèn à reacioun !
Iéu n’en menàvi pas làrge.
Á l’arrisco de sembla barje,
Sourtèri lèu moun capelet
Que recitèri tout soulet.
Subran prenguèri la pahoulo,
Quand l’avioun de bat en goulo,
Drèissè la tèsto dins lou cèu
Coumo pèr jougne lou soulèu.
E vouei… la bèsti s’envoulavo
E pèr lei nièu, soulo s’anavo,
Tout’ esbrihaudanto d’arcié
De fèrri, de vèire, de lumenié.
E èro tant autoumatico
Que lou pilot emé sa clico
Si proumenavon pèr mitan
Dins la trevado aqui plan plan,
Leissant l’Aucèu fusa dins l’aire
Ansin sènso degun menaire !
…Lou vouiàgi fuguè courtet,
Just mai d’uno ouro acò durè.
Nous pourgiguèron un degout d’aigo,
Douei bescuchèli à gousto vaigo !
Arriberian puei à Orly,
Que duguerian jusqu’à Roisy,
Zóu mai parti, qu’aqui ma fisto
L’avié de davans nouesto visto,
Eitant d’avioun gigantas
Que brout d’erbo dins un mas.
Aaaa de Bouen Diéu… e puei lou mounde …
A mouloun…e en abounde !!!
De pertout, aguessias cresu
Que d’un fourniguié desroumpu,
Sourtien coumo d’uno man fado,
Dei mihié de fournigo quichado,
Si butassant ’mé sèi carruòu,
Arramba coumo dei buou !
E nàutrei dins ’questo prèisso
Li leisserian pas nouest’ adrèisso,
Car passo que t’ai vist moun bèu,
S’enreguerian en tanto lèu,
Dins un long courredou sourne
Destraucant coum’ en un fourne,
Souto d’un inmens’ escrouncèu
’Mé dei couroundo e deis arcèu.
Aqui dins questo catedralo
Facho de fèrri dei coulour palo,
S’entieravon dei grand guisquet
‘Mé sèi banco de mié paret
Recuberto de velousado,
Bèn tiblado, sèns ersejado.
Que duvien nous apasima
Fin que pousquèsson vidima
Nouéstei papeiret menèbre
Emé nouéstei passapouart nègre.
Iéu parlàvi coum’ en Alau
Au mitan d’aqueste pelau !
Si l’avanquiguerian touei quatre,
Sèns s’aprèissa, sènso si batre.
Mai quand lou joueine moussurot
Veguè l’aussado dei balot,
Lou noumbre dei saco dei tasco
Que s’empielavon misco masco,
Si rasclejè lou gargamèu
E róugi coum’ un coucoumèu
Nous faguè que risejavo
De mié cantèu que gamachavo :
« - Èbè avès carga lou muou… »
« Que m’a tout l’èr d’un roumpe-cuou ! »
« Mai mount ’anas ’mé tant d’afaire »
« Sias-ti bóumian, sias barrulaire ? »
« Ouuuu, mai moun brave, fa moun fiéu, »
« Qu’aro sentié lou recaliéu »
« Li mounta eis arcanèto, »
« E li douna subran lei roueito …»
« - Lou vouiàgi sara long »
« Li respoundèri tout de bon »
Car vouliéu carma la sausso
Que prenié d’ande e fasié d’ausso.
’Qui reluquèri Sebastian
Pèr qu’à n’aqueste lampian,
Li rabeissèsse pas sa frimo
E li faire de sa rimo
Rengouli lei quàuquei mot,
’Mé un taquet gròs coum’ un plot
En plen mitan de la figuro
Que l’ amaisèsse soun auturo.
Lei frumo avien gacha lou sóu
Car coumençàvon d’avé pòu
Counoueissènt de noueste jouve
Soun estampaduro de rouve,
E que partié au quart de tour
Quand li caucigàvon l’ounour.
Lou gabian darrié de sa banco
S’aplantè nèt, metè la tanco
A sèi paraulo de mesprès
Que moun fiéu avié coumprès.
Pèr si redèime de sa croio
Si trachè de touto sa voio
De nous faire passa proumié
Dins l’avioun fach en arcié.
L’aucèu gigant mi regachavo
E la pahoulo mi mountavo !
O boueno Mère, aqui li sian !
Diguèri fouart coum’ un gabian.
Li anavian sènso bagàgi
Qu’un tapis nègre sèns embàgi,
Nous lei avié puei carrreja
Fin à la souto, abarreja.
Gachàvi de galis ma frumo,
Coumo segound moun acoustumo.
Prenguerian puei deis escaié
Sènso boulega d’un souié :
E èlo sus questo ferramento
Si gandiguè touto countènto !
Aaa lei chato … aro, mi dires,
Qu’an l’egalita, es proun fes
Que juègon lei desmancipado,
E que lours d’uno bachucado,
Sènso que vous v’esperessias
Car sias brave un pau bounias,
Esprès, van s’espeta de rire,
E dair’ en d’àutrei soun coussire ;
Tout bèu just pèr vous countrista
Quouro es pas pèr vous regista !
Alouro vouei, vé-lei que drìhon
E coumo d’ègo coum’ endìhon !
Pèr fès pouèdon vous far passa
Pèr fada, pèr esfoutrassa,
Pèr un qu’a pu ges de memòri
Un pau-vau vo un satòri
Qu’acò es uno oucupacien
Que li agrado mai qu’un fien…
Enfin anen…que veiren Berro,
E tant…de la Chino lei terro !
Dins l’avioun, vous diéu qu’acò,
Aviéu perdu moun « alor ò ! »
Avian segui uno courado
Que gansaiavo à l’abrivado
De tant de gèns, que d’en courènt
Metien lou sóu dins lou bouiènt
E qu’en intrant en reboumbanço
D’un archimbello fasié danço.
Tre qu’enintrerian dins l’aucèu
Qu’avié lou vèntri en arcèu,
D’oustèsso e d’estiouar risèire
Nous saludèron enclausèire !
Mai lei bóugras, ’mé soun gentun,
Soun tafanàri de quichun,
Soun piés tibla en aubalèsto,
Nous bachucàvon à la lèsto
Disènt de long’ à z-auto voues,
« davanças-vous tant que poues ! »
Erian quicha coumo d’anchoio,
Coum’ à Nouvé lei pachichoio
Que màrcon dei trège dessèrt
Lei quatr’ Ordre qu’estiéu ivèr
Pouarton la buro sènso jargo
E que jamai dànson la Sargo !
Fin finalo s’asseterian
Que n’en avian proun dei gabian,
Que sas, après la butassado,
Qu’encar’ un pau d’uno acipado
Mi sariéu bèn roumpu lou nas
E leis esquino d’aut en bas,
N’en erian coufe de la prèisso
Que nous fasié frusta dei cuèisso !
S’istalan founs dins lou fautuei
Fach de platico coum’ encuei,
E regachan la damisèlo
Nous desplega en bressarèlo
Coumo fau far pèr s’escapa
Pèr cas d’escrach mau encapa,
Mi prenguè la tramountano,
Coumo s’aviéu vira campano !
« Òou, mandè ma frumo, que as »
« Que tèis ue glas fan dau en bas ? »
Mai iéu, grepi, respoundiéu gaire
Quouro subran, fendènt leis aire,
L’aucèu fusè dins lei niéu blanc
Fasènt un petan de boucan,
Que cresèri un terro-trèmo
Coum’ aqueste de San Rèmo.
« Moundiéumoundiéu….creidèri fouart »
« Tout’ aro, ve, sian tóutei mouart »
« Tant l’avioun mount’ e davalo »
« Lou cuou en bas à founs la calo. »
« Moundieu, faguèri ’ncar’ un cóup »
« Qu’aviéu ’no vertadièro póu »
« Mai coumo va qu’a puei la tèsto »
« Amount au cèu que quàsi frèsto ? »
« Èèè ’Pa, diguè alor moun fiéu »
« Que ti l’aviéu pougnu au viéu »
« Acò d’aqui es la teinico »
« Que li dian l’Aerounoutico ! »
Sus d’aquéstei mot tant savènt
Que pas grand cavo mi disien,
L’avioun rabeissè sa crèsto
Sènso pus far sèi zistoun-zèsto.
Aro tout èro puei nourmau.
Chascun chascun’ à bèlles pau,
S’emboursàvon sus soun assèti,
Estrech, sarra, à l’esquichèti
Sèns grand espàci pèr d’avans
Nimai de larg pèr un balans.
Aguessias un cuou d’armàri
Aurias passa voueste calvàri !
Fin finalo tout fuguè siau.
Mi faguèri un cabaniau
Em’ un viésti qu’agantèri
E un chale que man-levèri.
Aqui bèn cala, m’endourmiéu
E d’uno courdurado de tradiéu
Noun jamai mi destrassounèri
Aperavans que sus l’Empèri
De Tsu His e de Confusus
Li siguèssi d’ pèd jus !
Segur qu’avian subre lou mounde
Sènso que nouest’ Aucèu si founde,
Fa de la terro un mié tour
E tout acò dins rèn qu’un jour !!!
Avian fach en circounferènci,
Ço que cresien que passe sciènci.
Pèr assaja d’èstre courtet
Dins moun raconte qu’es lounguet,
Vaqui que de Pekin la visto
Tau un miracle mi counquisto.
La vilo qu’an bateja Beijin
E que souvènt li fai jin-jin,
S’avasto luen luen enfre terro
’Mé sèi mountagno, vau e berro,
Emé sèi flume gigantas,
Que si l’atrobo dei peissas,
Espés e gròs coumo lei làmi
Qu’en l’oucean soun en grand fràmi.
L’a dei bastisso grato-cèu
Qu’an soun dabas tout en arcèu,
Dei vitro de la coulour griso,
Qu’au soulèu quouro fai Biso,
Rebaton lou flar de la mar
Coumo sout’ aigo fan lei sard.
De que dirias de sèi tèulisso
Qu’an ni gourguièro ni cournisso,
Revertegado, de galis,
Que nous mèton lou gamachis,
La bourroulo dins nouesto tèsto
Pèr noun parla que deis arrèsto,
Car soun pas de nouésteis endret
D’acò fair’ en bericouquet !
Aiaiai….nous fau descèndre
E queste cóup rèn aprehendre
De l’avioun tout fa d’arcié
Que m’avié tant douna l’ancié.
« Mai mounte sian, enca diguèri »
« Quand dins la garo mi veguèri ! »
« …Que garo faguè moun fiéu, »
« Que troubèri bèn responsiéu »
« Mai que sèis ue en ourbitalo »
« Semblàvon d’agato vert palo. »
« Es pus inmènse que Pari »
« Orli e Rouassi reuni ! »
« E lei gèns, iéu rapoundèri »
« Soun mai noumbrous qu’au batistèri »
« Quand lou vicàri capelan »
« Li bagno lou frount e lei man. »
Degun mi dira lou countràri
Aleva quàuquei turto-bàrri,
Car de Pekin l’aeroupouart
Vau quàsi mai cènt un Viei-pouart.
Pamèns si saup proun, qu’à Marsiho,
Cieutat qu’a sa souberaniho,
Jamai van recarzi lei gèns
Ni abausi encaro mèns !!!
Nàutrei sian rèn que galejaire,
Sai qu’arrougant, un péu trufaire !
Mai pèr ço qu’es de la verta,
La mesuranço e la clarta,
Marsiho es toujour la proumièro,
Emai sigu’ uno peissounièro,
A denouncia ço qu’es marrit
Enjusqu’à n’en far de rejit.
Pensas vous bèn, ami legèire,
Que ma ventur’ es de bouen crèire,
E que jamai au grand jamai
Vous mentiriéu : tout es verai !
E ço qu’ai vist vous va descrìvi,
Bèn tau coum’ es, acò v’ escrìvi.
N’en erian à la descricien
Puei dei chinès en proucecien,
Quand souarton d’un aerouplano
E qu’encoumbìsson leis andano.
Aqui l’a ges de courredou,
Es un grouun d’esmarradou
Ounte l’a milo Canebièro
Que fan cafour ’mé dei carrièro
Larjo e long coumo lou Pradot
Qu’es lou quartié dei moussurot.
E parlen-n’en de a coupolo ;
Es la l’obro d’un branquignolo
Doumàci a dóu Panteoun
Trei fès l’aussado, e dei pieloun,
Que se falié cana l’auturo,
Faudrié cènt an pèr la mesuro !
Qu’aqui soubre, sian pichounet !
E lei chinès que soun nanet,
Au besoun de grandidesso
Respóundoun sèmpr’ em’ ardidesso.
Que dire deis escaladou
Que van demié lei mountadou,
En milo crousamen de fèrri,
Emé dei gànchou, ’mé dei bèrri,
Qu’aqui l’a dei lume à milien
Agusant la maginacien.
Après d’aquesto meraviho
Que noueste couar escarrabiho,
Es pèr fournado qu’à de rèng
Pèr la grand pouarto puei sourten.
E s’avias vist la troupelado
Si couloumant d’uno abrivado
Si butassant d’eici d’eila
À crèire qu’èron d’eisila….
….Pèr s’aganta aqui un tàssi,
Aurias pas dich « Òoo Milacàssi »
Au menaire que despatient
Tenié lei gèns dins lou bouiènt !
Fin finalo à la voulado
N’en prenen un dins l’enregado.
Sebastian avié respicha
Au Novotel pèr prouficha
De la famouso capitalo
Qu’èro nouesto proumièro escalo,
Douei seguido qu’en intrant,
Mi cresèri pèr castelan !
« ’Fan d’oustèl, disiéu à ma frumo »
« Que quatecant si n’acoustumo, »
« Li passessian aqui un mès »
« Que pourrian pus dins nouéstei grès »
« L’ana tourna sèns escoussuro,
« Pensa à la demasiaduro »
« Qu’en Chino mèton en avans
« Pèr escaraia soun envans. »
Adematin dins la salo
Grando tau coum’ uno abadialo,
Dejunan emé de cafè,
Siervi emé dei pèd paquè !
…Enfin…uno mèno que li sèmblo,
Fregi, qu’à n’ un couissin tout sèmblo.
L’avié fouesso mèisse tambèn
Que counoueissian gaire proun bèn.
Mant’un èron fassi de carno,
E d’ùnei en pichóunei darno,
Fasien ensèn sus lou taulié
Coumo la tèlo d’un pintourlié.
Ai vist dei cavo tant escarso
Pareissènt à moun avis marso,
Que quouro lei sentiéu de près,
Fuguèri lèu bèn entreprès,
Car à modo de bouen’ oulènci,
Dins uno tal’ endevenènci,
Avien l’óudour de l’escaufi
Pulèu que d’un poulit farcit !!!
Fin finalo d’uno tisano
Emé lou jus d’uno mióugrano,
Faguerian noueste dejuna
Que jamai a evouluna.
Davalavian puei tóutei quatre
Sènso jamai, pas gès si batre,
Doumàci lei grands escaié
Èron tant larg tant aut, parié
Á n’aquéstei de Sant Carle
Vo ’quéstei deis arèno d’Arle
Que poudian pas rèn si touca,
Nimai quauqu’un si l’embouca !
Ero un palais coumo Varsaio
Qu’es gigantas de pèr sa taio,
De pèr tambèn soun anamen,
Sènso parla deis ournamen
Pastant tout d’aur de luen de pròchi
Dei tèsto, dei chichilomòchi,
Dei couround’ e milien d’arcèu
Dei dèmo, fouent, deis escrouncèu,
Que rèn que li pensa, mi nègui
Dins un canestèu de pessègui
Qu’es lou fru lou mai gradiéu,
D’à moun vejaire próupr’ à iéu.
Sàbi qu’es long aquest vouiàgi
E soun raconte un abenàgi !
Mai, vesès, m’a marca la Chino
E dirai tout jusqu’à la bouino.
La capitalo de Pekin,
Beiji li dìson qu’es pu fin,
Es uno vilo pau coumuno
Car au mitan de sèi derruno,
Bastisse d’imoble gigant
Coum’ à New-York que tant digant,
Es uno vilo agourrinido
Que la fau prene à l’assalido.
L’Estat Uni lou fau vega,
Sèis estajan esqueirega !
Qunt prougrame pèr uno Chino
Qu’engaugno tout jusqu’à la mino
De sèis ome, lei direrié,
Que si viestìsson tout parié,
Emé gravato emé camiso,
’Mé d’abiquet ’mé endeviso !

Pierre Dominique Testa, lou 12 de setèmbre 2013.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?