Lexique Provençal

Dans cette rubrique, des poèmes sont offerts à la lecture des internautes.

En Chino 5.

Prenen nouésteis estrass’ e lèu
Sèns regacha soun mausoulèu,
S’embarran dintre la veituro
En pregant sai qu’à voues escuro,
Enfin retroubessian Lhassa
Ounte fai bouen si radassa !
Vilo santo, vilo mitico
Ount l’esperit e la fisico
Fouarmon la prim’ unicita
De l’ess’ uman, qu’en liberta
Póu enjansa uno pensado,
Un councèpt, uno rebecado ;
Tambèn aqui un mot groussié
Coumo de fango à n’ un souié,
Un’ escorno, dei vitupèri,
Dei mot que póugnon, fènt misèri.
Ciéutat sacrad’ ounte Bouddha
Es de pertout, sèns s’amouda,
Sèmpr’ agrouva subre d’un sèti
Que semblo d’avé bouen apèti !
Lou cuèrbon de cherp’ en teissu
De tant que n’es descounoueissu !
De cóup li mèton uno chincho
Que tant creirias que vous espincho.
Dins quàuquei tèmple es de drech
Em’ uno caro, un piés estrech,
Mèntre que dins touteis leis àutrei,
Estènt que l’avèn vist nous-àutrei,
Es asseta vo ajassa,
Quouro dourmènt acouidassa,
Quour’ esviha que fai risèto
‘Mé dins sèis ue dei beluguèto.
Alor dins questo poucisien
Que parèiss’ èstr’ en ravacien,
Vous doun’ envejo de lou sègre
Dins soun karma qu’es blanc e nègre
Ounte l’alfa e l’oumega
Dins un toutun soun asega,
Aqueste famous ingo-iango
Qu’eternamen danso, e tango.
E quand tiblo soun bedelet
Que soun vèntri fai barralet,
Dirias : vai s’espeta sus plaço
Au mitan de sèi quatr’ estrasso !
Mai va creirés se va voulés,
Emai Bouddha siegue balés,
Siéu bèn segur que la mangiho
Que li adùson sèis ouviho,
Noun sièr rèn qu’à nouiri lei buou
Sèi vaco, e bessai sèi muou !
Bouddha qu’es mèstre en sapiènci
Aprèn’ ei gèns que la doulènci
La fau de longo aprivada,
Coum’ un pau si ‘n amistada.
En l’esperit la fau remete
Pèr pousqué puei lèu escoumete
Que fouero lou couers, la doulour
Resquihara ‘mé soun amplour
Pèr rejougne, sàbi pas mounte
Que si li tènon lei racounte,
L’armo, la pensado, lou mènt
Qu’es acò que nous fai vivènt
En mai dóu sang dins nouéstei vèuno
Qu’a douna noum au flum’ Uvèuno
E aquest que li dian lou couar
Que quouro bate pus, sian mouart !
Bouddha fuguè un ome sàvi
Se cresen lei relat deis àvi.
E dins Lhassa es de pertout
Dins chasqu’ oustau subre de tout !
Lei tibeban li fan ‘no borno
E li adùson quàuqu’ óumorno;
E tant pus pau, s’ an ges d’argènt
Mai qu’istèsson dei bouen cresènt.
Fouero ; parié ! Dins d’androuno
Li es cinq cóup : sus dei coulouno,
Dins d’ancouno, sus d’uno fouent,
Sus lei pieloun d’avans d’un pouent.
E devinas : es dins lei pàti
Que semblo que rado lei dàti
Deis ome que vènon pissar
‘Mé sèi mantèu empelissar.
E vouei, Bouddha es un bouen paire
Pèr tout un pople ges doutaire,
Que crèi que dins un mouvimen
Sai sampitern’ ,en soufrimen
Lou couers mant’ un cóup póu renaisse
Qu’acò degun vai escarnaisse,
Enjusqu’à l’evoulunamen
De soun mentau, que majamen,
Tau sarié puei dins uno nèblo
Ount la matèri pu rèn rèblo,
Devèn un esse esviha
Qu’en subre tóutei va briha.
Bonàdi ‘cò, caro mouracho,
Vaigous, mai jamai en gamacho,
Van de soun pas, sai qu’atimbrat,
E de ges rèn soun encoumbra !
Vìvon viei viei s’an la chabènço
De pas bèure pèr prevesènço
Leis aigo bruto à Benarés
Dóu Gange qu’es qu’un passarés !
Va sàbi bèn ‘cò, car ma frumo
Chasqu’ an sènso fa de grumo,
Qu’eiço lou dise en degun
Qu’es bessai pas toujour tout un,
S’en vai emé quatre damoto
Fair’ eilalin sa passaroto !
Mai va creirés bessai vo noun,
Lei trei dono si fan demoun !
Mùdon sèis àbi de bourgèso
En un vièsti qu’emé susprèso
Vesen penjadis de pertout
Fouesso tróup grand subre que tout,
‘Mé dei coulour proun margaiado
Qu’an tout lou gàubi d’uno prado.
An puei mai l’èr d’estrassairis
Que si nouirìsson ‘mé d’arris,
Que dei frumello de la nauto
Que tan si fan tibla lei gauto !
Pèr reveni puei au Tibet
Mi fau l’ajudo dóu Labet,
Car l’a ‘ja dei cavo que fugìsson
E que tout aro s’esvalìsson
Sus d’aquest poulit sejour
Que l’isterian quàsi vint jour.
Uno d’aquéstei journalado
Que dins Lassha en proumenado
Erian touei quatre sus d’un rèng
Arriberian, e es pas rèn,
De davans la gigant’ intrado
Dóu Potala, sèns abrivado.
Aqui dei gàrdi, touei chinès,
Nous ragàchon l’èr caïnès.
En man tènon sèi mitraluso
E à sa cencho doues aubuso,
Qu’ ò ‘fan, soun vint à douna póu
Bèn talamen que vèrs lou sóu
Mandan leis ue coumo de dire :
Sias vàutrei que sènso sourire,
Sias demié tóutei lei mai fouart,
Va vouguessias, sian tóutei mouart !
Puei d’uno voues de countro-basso
Auturouso e proun marjasso,
« - Ausweiss, diguè l’un en patoues »
« Que li faguè lou mourre toues. »
Lhamour qu’èr’ uno rapourtièro
Dounavo d’èr, touto la tièro,
De lei counoueisse v’un à v’un,
Dóu generau que fai roulun
Quouro mando sèis ordr’ ei troupo
Quichant en man soun orso-poupo,
Jusqu’à n’ aquéu just arriba
Que quand va póu si vai riba.
Puei darrié, au mitan d’un pargue
Quatre sourdat quichant lou margue
D’uno maquino tugairis,
Bèn luen de despiga d’arris,
Nous mìron d’uno talo souarto
Que lei cresen far tanco-pouarto !
Alouro nàutrei tremoulant
Que sian touei quatre flajoulant
De davans questo sourdatesco
Que fan lei fouart lei bramo-lesco,
Beissan lei sue devèrs lou sóu
Coumo li dire qu’avèn póu.
Lhamour sourtènt sèi paperasso
Lei paro au capoulié en rasso.
Mai l’autre ‘mé soun èr autié
Guincho de l’ue qu’es baratié,
E aganto lèu uno bihèto
Qu’ èlo li douno à l’esquihèto !
Un cóup lou deim’ alor paga
Qu’acò n’ aguè estoumaga
Travesserian en ribambello
Lou sa pourta en escarsello,
Lou grand jardin dóu Potala
Qu’a l’èr sai que tresdavala !
Mai sian pas soul ( de qu’anas crèire ! )
Car un sourdat, pas luen, à rèire,
Viesti de verd em’ un kepi,
‘Mé d’estivau à s’espoumpi,
Tout bèu just, à uno cambado
Leissant perabas soun ardado,
Pounto sus nàutrei soun fusiéu
Emé d’ue gaire coumprensiéu !
E es emé uno trambloto
Coumo s’avian uno febroto,
Que coumencerian vesita
Sèns tróup dóu gus si soucita.
Tout èro sounco meraviho :
E lou palais que fai vegiho,
Sus l’envirouno ‘mé soun plan
Li règno tau un soubeiran.
E mèntre que l’autre n’ acousso
Emé soun armo fènt ligousso,
Mountan d’escaié gigantas
Bèn abriga dóu Levantas
Pèr dei paret de pèiro frèjo
Qu’an saia dur ‘mé dei poulèjo.
Aqui un cóup tout ascendu
Que vous n’en fau vuei lou dedu
Emai siguèsse uno pèço
Que tir’ en long e que v’ espèsso,
Au mitan d’un fub’ espes,
Intran dins un mèmbre tebes
Eitant aut, grand coum’ uno garo
Qu’à cha coustat sus sèis emparo,
Li penjo dei draparié d’or
Que rèn qu’acò es un tresor !
E l’autre sèmpre nous aprèisso.
Coumo quand un can vous aquèisso
Quàsi courren que sian noumbrous
Mai n’i a pas v’ un qu’es escabrous !
Bessai avian un pau la tèmo
Davans sa facho de carèmo,
Car siéu que nous trauca
E coumo de blad nous cauca,
Li fasié manjoun e linguèto
Que li mountav’ eis arcanèto !
Enfilerian cènt un membroun
Que n’aguerian pas jamai proun.
Èron dei cambro d’anticambro
E dei saloun tout cubèrt d’ambro,
Que dóu sóu enjusqu’au plafound
Trasié la lus d’un finimound.
Puei au mitan de l’entierado
Coumo lou nùcli d’un’ aussado,
Destrauquerian dins un endrech
Gaire bèn grand, un pau estrech,
Emé dei pèiro preciouso
E dei courtino lussiouso,
Teissudo d’or emé d’argènt
Que cresèri qu’au firmament
Acò pourrié èstre l’intrado
Dóu Paradis ‘mé soun ardado
D’Àngi d’Arcàngi e de Sant
Que li demoueron sèns’ aplant.
De fach, aquesto cambrounèto
Nougau d’un mounde que s’espèto,
Èro lou mèmbr’ ounte dourmié
Lou Dalaï Lama, au mié
D’aqueste Potala qu’abravo
Lou couar dei gèns d’aquest’ enclavo.
E à l’entour dóu pichot lié
Que li sesié douei candelié,
Dei blèto d’insèns tubàvon
Que touto cavo lei nimbàvon
De quaucarèn coumo sacra,
Coum’ à la Glèiso counsacra.
Arriberian en ribambèlo.
E iéu vouguènt sai pèr cautèlo
Ista aqui un moumenet
Veguèri un recantounet
Que mi li metèri pàsi.
Alor subran dins un estàsi
Mi maginèri lou Lama
Que fasié rènque de chama
Touei lei Boudist’ esparpaia
Fin que pousquèsson coussaia
Touei lei chinés qu’envahissèire
Avien, l’a d’an, fouess’ empegnèire,
Envasi soun pais montagnous
De soun biais aule regagnous.
Mi l’ensupèri lou magistre
Viesti d’armino ‘mé lou ristre,
Maugrat qu’encaro bèn jouvènt
Duvié pecaire, inchaiènt,
Eima juga, legi dei libre
Sèns si douta de l’amar cibre,
Que béurié en cinquanto nóu
Quand lei Chinés de pèr lou sóu
Lou traguèron coum’ un traïstre
De davans tóutei sèi ministre.
Aiaiai, d’acò li pensa
Coumo ti l’an, sai, óufensa,
Mi dounè la car de galino
Que dei pèd juqu’eis esquino
Mi venguè coum’ un tremolot
Parié quand sian d’à cavalot !
Mai, ve, moun sòmi durè gaire
Car un sourdat d’un èr bramaire,
L’ue pichoutet en gran d’arris
A vous baia un estourris,
Mi faguè ‘mé sa baiounèto
Ges de coutigo ni baisèto,
Mai lou geste clar, mi butant,
Que mi trauquarié dins l’istant,
Lou vèntri lou couar la budaio,
Se noun partiéu pas sèns chamaio
D’aquest recair’ ounte soulet
Iéu pantaiàvi risoulet.
Òòò….’fan dei pèd, qunto pahoulo
De mi reçaupre uno doulo
Mi prenguè pas subitamen
Sentènt sa pounch’ à quest moumen !
Vous diéu qu’acò que patusclèri
Coumo se fóussi un arlèri.
Arribèri tout susarènt
Pròchi moun fiéu que calourènt
Mi demandè ‘mé benvoulènci
D’ista em’ elèi en silènci.
Faguè soun èr un pau testard
Emé l’ue clus coumo flaugnard !
Car noun mi vesènt dins la troupo
Avié capich moun entrouloupo
Moun envèjo de li leissa
Sènso segur leis adeissa,
Quouro mi vouguèri rescoundre
E d’entre paret, sai, mi foundre !
Adounc reprenguèri lou trin
E de lei sègre à pu fin
Sourisènt, li va proumetèri
Mai va diguèri proun oustèri !

Pierre Dominique Testa; lou 8 de jun 2016.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?