Lexique Provençal

Dans cette rubrique, des poèmes sont offerts à la lecture des internautes.

En Chino 8.

Sabès que nàutr’ à la campagno,
La de Sant Ro ‘mé sèi baragno
Que sa capello despuei d’an
Si deruno un pan pèr pan,
Li anavian faire merèndo
Qu’adoubavian quàuquei bevèndo,
De pan ‘stadis e de cacau
E d’agriot’ un plen boucau.
Ma maire puei , ‘mé sèis amigo
E sèis enfant fasien ‘no rigo.
Se cresian d’èstre pèr Sant Jan !
Car tóutei si tenian la man,
E quàuquei cóup dins lou vilàgi
Que prenian sai à l’arrambàgi,
Fasian coum’ à l’entour dóu fue
Qu’esbarlugavo nouésteis ue :
Uno lóugièro farandolo
Que dansavian sènso cissolo
Coumo fa à Castèu Goumbèrt
Lou Roudelet qu’es un espèrt.
Dóu reste, quand dins lei carrièro
Fan sèi pas emé sèi bandièro
Dirias qu’ un’ èrso de la mar,
Coum’ un eigas dei toumpl’ amar,
Destrauc’ aqui que s’avalanco,
Lei dansaire tenènt eis anco
Sèi fiho en jupoun pica
Qu’encuei li vouéli dedica
‘Quéstei verset que van de caire,
Mai que bessai pourrien li plaire !
Tené,,, que mi siéu fourvia
E que mi siéu estravia
De moun itèm que tant m’agrado
Emai siegu’ uno rimassado !
N’en èri qu’ erian à Sant Ro
Que pas jamai fasian no-no.
L’avié bèn tróup de cav’ à faire,
E jugavian eis esplouraire,
Que càvon e mèton lou fur,
Cóume dóu chal’ e dóu bounur.
Furnavian dins la capelèto
E partian lèu à l’escampèto
Quand toumbavian nè sus d’un oues
Que souvènt èro lou simple troues
D’un cuou de pouet vo de boutiho
Qu’ adeja fasié meraviho.
Fuguè à la revoulucien
Qu’enfenouiè nouesto regien,
Que quàuquei gus e piha-càmpi
S’agantant pas jamai lou ràmpi,
Vendèron lou bèn de Sant Ro
E n’en faguèron qu’un soul blo !
Vaqui puei coum’ avans la guèrro
Aven agu aquesto terro,
Que moun grand n’aguè un moucèu
Sèns fa fèsto ni rigouncèu.
Prenguè lou tenamen tau qu’èro
‘Mé sa capèllo pèr fenièro.
Erian nombrous de li ana
Car poudian si descaussana.
Erian à l’oumbro dei platano
Dei plumachié e dei mióugrano.
L’avié Pèire de Jo Feraud,
Que li disian Pèire de Jo,
Qu’aro vuei es curat e prèire
De Sant Vitor ; qu va póu crèire !
L’avié tambèn Daniso Ruf
Que soun cousin fasié de tuf.
E puei Anèto la pastresso
Emé Titine qu’à la Messo
Li venié quasimen jamai
Tant avié fouesso grand trabai.
Mai pecairèto, èr’ uno santo
E la pargo, sai devouranto,
L’èro vengudo lèu daia,
Qu’acò avié desvaraia
Tout lou vilàgi, e lou pastre
Soun espous l’ami deis astre.
L’avié tambèn pèr merenda
Quitant puei de s’afasenda
À sa soucito poulitico
À soun drapèu e à sa Clico,
La Salicètti qu’un bèu jour
Sai miraclad’ en plen miejour,
Trevè la Glèiso, e sacritino
Si faguè sènso repoussino !
E tout aqueste frumelan
Qu’abarissié touei sèis enfant
Sèns trabaia dins un’ usino
Dins un burèu ‘mé treboulino,
Venien passa ‘qui à Sant Ro
Acoumpaina de sèi minot
Un moumenet uno vesprado
Au bèu mitan dei camp dei prado.
N’en fasié un de bèu troupèu :
Un troupèu d’àngi boufarèu
Que chascun puei t’avié dei gauto
Coumo se l’avien mes de mauto
Dintre la bouc’ au recantoun
Li fènt boudènfle dóu mentoun !
Èron bèn gènt aquéstei drole
E vivien sout lou countourole
De sèi mamè de sèi papè
Que souvènt quiha au jubè
Cantàvon lei Vèspr’ e la Messo
Em’ uno certo countentesso,
Au servìci dóu capelan
L’abat Mistral qu’èr’ abelan.
E davans queste santuàri
D’un edat quàsi milenàri
Un pau rejoun mai proun carra,
Rau espeiòti, chimarra,
Gusejavian sout la couroundo
E tèms en tèms fasian la roundo.
Enaut sus d’un larje grasas
L’avié l’estatu dóu santas.
L’avien representa en móungi
Cubèrt de roup’ en soun vieióungi.
Soun chin segur èr’ à sèi pèd
Sèns jamai faire rèire-pèd.
Tenié un pan d’entre sèi bouco.
Ensen si metien sus ‘no souco
E pregàvon soun Diéu vivènt
Qu’enfin s’aplantèsse lou vènt
Que li jalavo lei mesoulo
E li dounavo dei sidoulo.
E vouei ! Sian esta abari
Dins quest’ encastre arrari :
Souto lei pèd d’un tressant ome
Qu’èro pas viei mai jouvenome.
Despuei mil’ an, la tradicien
L’avié fach pèr maginacien,
Emé lei tra d’un caminaire
Avieiastri mai vouiajaire.
De fa, èro un galant jouvènt
Un arderous mountpelieren,
Eissi d’uno grando famiho
Counoueissudo fins à Marsiho,
Que soun pair’ èro un doutour
Que sougnavo touto doulour
Tout mau, touto plago sangouso
Siegue lóugièro póudragouso,
Ansin que tóutei lei mau d’oues
E mau de tèsto e mau de voues.
Lou jouein’ eimavo lei foundigo
Miour que courre lei garrigo.
Vesitavo lei pàurei gèns
En qu dounav’ un pau d’argènt.
Mai un jour faguè ‘no gafo ;
Noun que demandèss’ un’ estafo,
À l’Avesque de sa cieuta !
Li diguè ‘m’ espountaneta
Que duvié basti un ouspìci
Qu’ei pàurei fuguèsse proupìci.
Lou Bisbo lou mourguè tant bèn
Que s’acipant, Ro mausabènt,
Partiguè pèr Roumo tout d’uno
Au Papo demanda la luno !
De segur li vaguè d’à pèd
Sènso cocho ni marcho-pèd.
Emé sus l’espalo sa biasso
Fasié sourire lei chaupiasso,
Car disié fouart soun capelet
E noun avié ges d’estilet.
Encar’ encuei long de la routo
Dins lei gres, dins lei garouto,
Si tènon drech ‘mé soun clouquié
Soun estatuo soun pesquié,
Quàuquei cachóusei capelèto
Ount l’estivenco dindoulèto
Fa soun nisau au mès de jun
Sout lei téule ‘mé de batun.
En Alau avèn la chabènço
De n’avé v’ un’ en souvenènço
De soun passàgi, que chasqu’ an
Lou trège de mai sèns boucan,
Dins ma famih’ uno pivòni
La depauvan en testimòni,
Que Ro venguè trepa aqui
Destarmina e sèns flaqui.
Ansin enfant dins lou campèstre
S’erian deliéure sèns cabèstre,
Ma maire nous tenié d’à mènt.
Doumàci basto d’un moumènt
Sèns regacha ‘m’ inavertènci,
Pèr qu’un enfant dins soun ardènci,
Sautèsse d’enaut d’un bancau
E qu’ailas si faguèsse mau !
E es aqui qu’uno vesprado
Cujèri bèn pren’ un’ ancado,
Quouro souto l’agroufinié
De la vesino que dourmié,
Veguèri dei bèllei cerièso
E que vouguèri pèr bestièso,
N’en rabaia un plen panié
Trena emé d’avelanié,
E rassouiva la grand’ envèjo
De rauba la tèsto vuèjo !
Segur sènso rèn demanda
E pousqué sai trouchamanda !
E quand, enca pichounet qu’èri,
Sus la clausuro mi clenchèri,
E qu’emé mèi fin det croucu
Tras quatre fiéu d’aram crancu,
Mi trasèri chipa la frucho
Qu’en mèi sarvello fasien cucho,
Ma grand acourreguè subran
Emé dei quiéu mai que furan
E faguè mino sus mèi gauto
De mi manda coumo de mauto
Uno caloto un bendèu
Qu’encar’ encuei dins mèi budèu,
N’en sènti tremoulant lou boufe
Que sas fasiéu gaire d’esbroufe !
Ansin ma grand faguè de iéu
Un ome pas ges raubatiéu,
Ounèste, quàuquei cóup umile
Qu’abourrisse lou rèn-utile.
Aquest istóri vertadié
Es de marca au calendié
De ma lóugierèto memòri
Qu’a bèn besoun d’un ajutòri.
Mai ‘cò m’avié tant pretouca
Qu’encar’ encuei de v’ envouca
Mi fai de mi sèntre un pau jouve
Iéu qu’aro en lai siéu pulèu brouve.
Tout eiço pèr vous esplica,
E pourrés lèu va judica,
Que dins ma vid’ un raubatòri
Que n’en tirèssi quauquo glòri,
Noun n’en ai jamai jamai fach
Ansin puei que d’àutrei mesfach.
E pèr fa ‘mé Pekin lou liame,
Acò fara un bouen levame,
Doumàci n’en erian adès
S’avès que vous en souvenès,
Qu’après lou marcat dei bestièto,
Que n’ avié douna la mièto,
Avian decedi ‘mé moun fiéu
Sa frumo, ma neboud’ e iéu
E puei segur ma car’ espouso
Qu’avié la facho dourmiouso,
D’ana un pau s’ arrelanqui
À l’arrisco de s’ananqui.
Au recantoun d’un’ avengudo
Fuguèsse pas un’ esmóugudo
Quand veguerian coum’ un saloun
Cafi de gèns fasènt mouloun,
Qu’en subre de sa bandinello
En bèllei lètro croucarello,
L’avié « HAAGEN DAZS ICE » d’escrich
Que nous metè toueis enterdich !
E dintre l’inmenso boutigo
Lei gèns fasien tau lei fournigo.
Se raderian em’ uno gau
Que sounc’ au Cèu a soun egau !
E nous venguè la bavariho
Rèn qu’à pensa à dei brouquiho
De cacau fin, de caramèu,
Que dins la glaço ‘mé de mèu,
Si barracanàvon lusènto
‘Mé quàuquei rusco de serènto,
Emé puei d’amèl’ en brigau
E d’avelan’ en barlingau.
L’avié un mounde à pas rèn dire
Que s’apreissavo sèns sourrire,
E que fasien la couo lèu lèu
Pèr si mete sus d’un taulèu
Quauqu’ ùnei glaço coulourado
‘Mé dei bescuech à l’anisado.
Fin finalo li dintrerian
Touei cinq, que si couloumerian.
Erian quicha coumo d’anchoio,
Barc’ à travèrs, de biscamboio.
L’un darrié l’autre, lei chinès
Qu’èron tóutei pas gair’ espès,
Parlàvon pas, fasien silènci
Coum’ enjuia pèr la noulènci
Dei crèmo de touto coulour
Que li dounàvon lei vapour !
N’ i avié dei vèrd’ à la pistacho
Que vous metien sai en gamacho,
Quouro vesias tout à coustat,
Dei glaço jauno pèr mita
Recubèrto de paspaièto
D’aràngi coundi ‘mé d’eigrèto.
E dins d’anap fach de cristai
Escrincela de poulit tai,
Dei bèlli boulo pichounèto
Semblàvon quàuquo rasinèto
Chascun’ en prefum diferènt
D’un bèl efet fouart coulourènt.
E pèr douna bèn mai apèti
Avien mes coumo dei counfèti
De cacau róugi, vioulet, blu
Dins dei finjan proun cafouru
Pèr pousqué puei li pita dintre
Qu’aurié ‘cò regala un pintre.
L’avié dei glaçoun au carra,
A l’angle escaire, chimarra
Pèr dei sirop que regouiràvon
Sus sèis abord que caleiàvon,
E que dins dei pichoun sietoun
Fasien coumo dei fouletoun
De coulour viéuvo, acoulourido,
Meravihouso regalido,
Vous emplenant leis ue de lus
Quand èro pas qu’avias lou tus !
Vous diéu qu’acò : n’avian à vèire
Qu’encuei va dire, es pas de crèire !
E nàutrei cinq devisavian
Que toueis ensen galejavian.
Leis àutrei toujour l’èr menèbre
Nous mandàvon d’agach arèbre,
Que tout aro nous fasien póu
Emé sèis ue vira au sóu.
Fin finalo que tout s’acabo,
Emai aguessian pu de sabo
De parl’ à tort e à travès
Passerian d’arrié d’un chinès,
E croumperian chascun trei glaço
Que manjerian aqui sus plaço.
Isterian eici asseta
Uno mièj’ ouro, mouqueta
D’entendre lou vóu d’uno mousco
Que si n’en meterian en bousco.
Degun charrav’, e z’ue redoun
Si goudiflàvon, groumandoun,
Que prenien plasé de la gousto,
Mant’ un fasènt d’ue à la sousto.
Un cóup qu’aguerian risoulet
Feni noueste coucourelet
Qu’avian lipa pèr pas rèn pèrdre
Que sas, va faguerian pas luèrdre,
Decediguerian tout subran
Sènso si tafura lou cran,
De si met’ encar dins la couo
Pèr acheta glaç’ e versouo.
Mai iéu troubèri pèr de bon,
Qu’acò tiravo un pau de long !
E puei coustièro, ma neboudo
Qu’àimo bèn quouro tout s’amoudo,
Elo qu’ a pas jamai de tèms
( veses pas ‘qui coum’ un blastèms )
Mi trai soutarass’ un’ uiado
Que n’en viéu lèu l’escruveiado !
Alor d’elo puei si quichan
Car d’un vueje n’aproufichan.
Prenen alor ensen ‘no glaço
Que la lipan quàsi sus plaço.
En luego d’ ana pèr paga
Que n’en siéu tout estoumaga,
Cresèri pas que va faguèsse,
Que pèr acò leis estampèsse,
Sourterian pàsi dóu membras
Sèns avé l’èr de maufaras,
Emé lou rouj’ eis arcanèto
Coumo s’avian fa repimpèto !
E nàutrei, sus lou trepadou
Que nous fasié ‘n ajoucadou,
Si raderian ; puei d’un’ uiado
Pensant à nouesto boufounado,
S’espeterian d’un rire gras
Coumo souvènt lei jougueiras !
Encar’ encuei es pas de crèire
Que siguèssi ‘quest maufasèire,
E que duguèssi puei chipa
Un pau de glaço à lipa.
Fuguè lou soul cóup de ma vido
Que perdèri la calamido !
E aqui qu’erian tout galoi
D’avé auja fa leis eroi
En bravejant un’ enebido
Que sai proucur’ un’ espoumpido,
Iéu, que mi venguè coum’ un rencur,
Vouguèri, que siéu pas ges voulur,
Ana paga nouéstei dessèri
Car mi sentiéu mai qu’un arlèri !
Mai ve, elèi vouguèron pas
E d’enintra, l’anèri pas !
Après ave bafra lei glaço
Qu’acò durè ‘no boueno passo,
Prenguerian lei grand balouard
Que coum’ eici an lou counfouart
Dei grand lume ‘mé dei grands aubre
Emé d’ alèio tout en maubre.
Ounte lei gèns pouédon marcha
Sènso jamai rèn s’escarcha,
Car leis abroues soun dins dei banco
Bèn rebrounda vo dins d’estanco.
Enfin vaguerian si coucha
E mi vesiéu, iéu, reproucha
Pèr ma grand e segur ma maire
D’avé juga l’escourniflaire,
D’avé rauba un quauque bèn
Qu’à iéu segur noun apartèn !
D’aqueste sèr dourmèri gaire
E mi revirèri de caire
A cha quart d’ouro de la nuech,
E quand dourmiéu, vesiéu de fuech
Ounte grasìhon l’arpiaire
Lou maufasèir’ assassinaire,
E lou fenias, lou messourguié,
Lou marjasse lou trufandié,
E lei putan emé sèi marlo
Mai tambèn lou que de tróup parlo !
Puei clencha sus lou revelin
D’aqueste trau sèns ges de fin,
Veguèri d’om’ en raubo blanco
Em’ uno couardo sus leis anco,
Qu’assajàvon de lei saia
En li mandant tout esglaia,
Uno traio, un cau de fèrri
Emai siguèsson deis arlèri,
Pèr leis sauva d’aquest infèr
Mounte li règno Lucifèr !
L’un li cridavo « - Oouuu, coulègo… »
« Agués pas póu, car pèr ma fègo »
« Es lou sauvaire, lou Boundiéu, »
« Que vous voudrié sai renadiéu »
« Aqui d’enaut emé leis àngi, »
« Emé lei Sant e leis arcàngi ».
« - Mai poudèn pas, fa l’enganiéu »
« Car avèn renega soun Fiéu. »
« - E puei, fai un autr’ un pau triste, »
« ‘Mé dins seis ue un regard miste »
« Que lou fasié quàsi courau »
« Emai fuguèsse inmourau, »
« Sian jamai esta à la Messo »
« E puei encar mèns à Counfesso. »
« Sian coumo dìson d’aganau »
« Un pau gournau, mai raciounau ! »
« - Mai noueste Diéu es coum’ un paire »
« Li recassè lou sant guindaire. »
« Vóu sa famih’ en Paradis, »
« Que tèn la man dei negadis »
« Emai l’aguèsson sèns termino, »
« De long’ à n’Èu vira l’esquino. »
Dins moun pantai diguè pas mèns !
E de la braso entandóumèns,
Uno cadèno de lumièro
Saiè en fouero la sournièro
Lei pecadou deja rima
Qu’avien sèi pèd tout enlima,
Lei poupo cuecho pèr la braso
De la mouart la proumièro faso.
Ansin sourtien toueis à cha un…
Dins moun pantai, l’un d’arrié d’un,
Jamai decessavo la filo
Qu’aurié plena mai d’uno vilo.
E à dicho que sus lou sóu
Pauvàvon pèd sèns avé póu,
S’enauràvon puei dins leis aire
E semblant bèn si li coumplaire,
De bescucha qu’èron sèi couers
Qu’acò poudié vous fair’ escouer,
Devenien tau coumo d’estello
Que dins lou cèu, sai balarello,
Anavon venien dins la lus
Coum’ animado pèr lou jus,
Celest’ energìo courènto,
Liame sacra, celest’ empènto
De coulour blu coumo l’asur
Que chascun segur n’en a l’ur,
Que mèno à Diéu tóutei leis amo
Dins uno pas, dins la calamo
D’ un’ eternita sènso fin
Que li vieuren jusqu’à pu fin.
Vaqui coumo dins queste raive,
Qu’èro precis un pessut vaire,
Doumàci sai touto la nue,
Li aviéu vist rèn que de fue,
Veguèri clar la ribabello
Que mount’ au Cèu tau leis astello
Dóu grand soulèu que nous tèn caud
Que quand desfauto, fa tant mau !
Mi languissiéu que lou jour vengue
Car aviéu póu que l’un mi prengue,
À tout lou mèns moun esperit
Qu’es quouro gènt quouro marrit.
E pèr ço que n’es de moun amo
Iéu la vouliéu pèr Nouesto Damo,
Ansin que fan lei marsihès
Quand à la Gàrdi pèr lei grès,
Móunton descaus faire proumesso
D’ista Crestian em’ ardidesso.
Pèr fin duguèri m’endourmi
Enfin es ço qu’ai presumi,
Car ma mouié tre sa levado
Mi moustrè ma min’ abafado,
Mèis ue redoun proun davala,
E mèi gaut’ à la babala
Que disien qu’aviéu fa ‘no vèio
Fasènt de iéu uno despuèio !
« - Èbè mount’ ères ‘questo nue »
« Qu’as boulega coumo s’un fue »
« T’aguèsse crema la figuro »
« Embrandant ta cabeladuro »
« - Mi siéu fach un ‘fan de pantai »
« Respoundèri durbènt lou tai, »
« Que mi làisso quet dins lou dùbi »
« Tout parié que, ve, n’en siéu cùbi ! »
« Talamen qu’es mi demanda »
« Se pouédi tout bèn garanda. »
« - Douno-mi se vos quauqu’ esplico »
« E espepisso tèis indico »
« Que sachèssi ço que n’en es »
« Estènt qu’ères tout de traves. »
Alouro iéu li desbalèri
Que dins l’infèr l’a la misèri,
Un fue gigant, un grand brasas
Mounte li coui lei marrias,
Lei piha-càmpi, lei lavènti,
E toueis aquèlei que fan turmènti.
Mai li racountèri tambèn
Qu’à un mau, l’a toujour un bèn.
E que subran deis estellino
Luen dins lou cèu coumo d’oumbrino
Venguèron d’om’ en àbi blanc
Emé deis alo que d’un vanc,
Vouguèron póutira dei flambo
Lei pecadou ni d’un ni d’ambo.
E puei qu’en uno proucessien
Devenènt aubènc, en fusien,
Partien pèr leis celéstei rauso
Mounte s’endevèn touto causo.
« - Ouuuu, faguè ma frumo ‘mé póu »
« Ist’ aqui, vai, bèn sus lou sóu »
« Sèns t’embandi fouero matèri »
« Que sas, ti pourrié bèn douna lou mèri ! »
Après feni ‘quest’ entretèn
Que car mume durè proun tèms,
S’entaulerian pèr dejuna
Doumàci de s’empaluna
Dins dei discuto sèns termino
Va voulian pas d’esto matino.

Pierre Dominique Testa, lou 4 de febrié 2017.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?