Lexique Provençal

Dans cette rubrique, des poèmes sont offerts à la lecture des internautes.

Darrié jour...

Dins lou sourne, sout leis estello,
Aqueste bèu darrié matin,
Vau querre mèi vaco mèi vello
E càrgui lèu moun viei routin
Car es pas uno farfantello
Qu’anue fa fre, sèns barratin !

Escarlimpant dins lei clapas
Sus lou camin que virouièjo
Au lume qu’esclairo mèi pas,
Vau d’aise, d’aise…E bluièjo
Eilalin sus Marsiho en pas,
Lou jour que tardivèjo.

Amount emé lei man ei bouco
Màndi ma crido de bargié,
E mi coutant à n’ uno souco
D’un aubre mouart, d’un amelié,
Espéri coumo sang de fóuco,
Que moun troupèu vengu’ en foulié.

Menut, dins lei nèblo, adabas,
Enténdi dinda lei campano,
Leis clarino, que sèns crebas,
Destrassóunon, divin’ arcano,
Lou silènci, sus lei ribas,
Qu’ anue mi douno la cartano.

Sus lou caminet que serpèjo
S’avanquìsson dins leis abroues,
E à chascuno que testèjo
Li vau de ma pu bello voues
Pèr li manda tre que banèjo,
Un cant d’amour dins moun patoues.

Alor quiha sus queste pue,
Ai de davans iéu uno scèno
Que despuei toujour dins mèis ue,
Miour qu’un plen tian de dardèno,
Fai regoula, perlo de fue,
Dei lagrèmo de sau bèn plèno.

Cóurri, cóurri lèu dins l’estable
Pèr lei vèire que à de rèng
Van s’istala qu’es enmudable,
Sèns faire degun vai e vèn,
A sa pouesto, infigurable,
Chascuno, acò dins qu’un tèms !

Que m’agrado moun escabot !
N’en ai puei la car de galino,
E tèsto embourso tau lou chot,
Lei regàrdi sus sa couchino
Que li van remoumia tantot
Mastegant l’èrbo dei roubino.

Es pas lou tout, l’a fouess’ à faire !
Mi fau puei móuse lou bouen lach
Que rajo drud en angl’ escaire.
E sus mei braio n’ai d’estrach
Que blanc devènon coumo vaire ;
Dirias dei degout de faufrach !

E d’un rire que làrgui fouart
Lei paret fan ressounanço.
Tant, ‘n óublidariéu la mouart
Qu’à ma pouarto ‘mé secanço
Tusto qu’a lou couquin de souart,
A mi douna la maleisanço.

Un cóup la mousto assouido,
Sus lou nai méti lou margòs,
Mèno d’embut, e de seguido
Empóugni lou barriéu dei gròs,
Cacalucha, qu’en reboumbido
Treboumbo dins un grand cavòs.

Netéji tout : e lei ferrat,
Lou coulaire, lei passadouiro,
Lei ling’ en fouarmo de coulat,
E lei coutèu, l’escumadouiro,
Sèns demembra lou caladat,
L’eiguié lei taulo e la batouiro.

Puei fau apoundre dins lei grùpi
Sout leis agach deis animau,
Lou fèn qu’emé sèis ue de sùpi,
Relùcon fins au founs dóu trau,
Coumo s’aguèsson pres un lùpi
Saupre s’es boun, se sente mau.

Fau alesti puei l’endeman.
Lei goum’ anant sus la maquino.
Li passa d’aigo en trei ban
‘Mé d’aigo claro, e d‘esquino,
Bagna lei rodo e sèi courban,
Fin que faguèsson boueno mino !

A, tè, bessai, fau far ‘no pauso !
“ Siés pas fouele “ , diguè ‘no voues
Que semblavo d’un’ auto rauso
Veni tout drech e tout à troues,
Mi rasouna emé dei causo
D’un autre mounde sènso z-oues.

E iéu que li cresiéu ; badau,
De feinianta, de fa proundièro
Dins un recair’, un escoundau,
Coumo n’i a tant que pèr carrièro
Fan passaroto, lei glandau,
En làrgei bando regassièro.

Mai si vèi pas encó dei pastre !
Doumàci nàutrei lei bargié,
Quand avèn leissa dins leis astre
Nouéstei pantai nouéstei foulié,
Sian bèn sus terro, pèr bounastre
De s’afana sai matinié.

Alouro de countùni, touart,
Voussu souto lou pes dei cavo
Espalo routo, entarro-mouart,
Bèu camentèri, dins la gravo
Cavan lou trau, larg’ embatouart
Mounte finiran nouéstei clavo.

Lei vac’ aquito, toujour lèri
Leis ue redoun, brafant soun fen,
Espèron sèns faire l’empèri
Que lei destàqui dóu seden,
E que lei souàrti de sèi fèrri
Pèr s’escapa dins lei mouven.

Lou jour s’avespro. Es proun tard !
La jounch’ es duro, s’eterniso.
Ai encar de rascla lei bard,
Sourti lou fèns, cafi lei piso
Dóu galinié souvènt chambard,
E li dousta lei milo briso.

Un cóup acabado ‘quest’ obro
Poudèn alena ’n moumenet !
Mai l’a encar’ uno manobro
De bachiquello un tantinet,
Qu’ai de la faire, que coulobro,
Es de couina pèr moun soupet !

Es l’ouro ‘ja d’ana au lié !
La nue sus touto la campagno
A depausa coum’ en soulié,
Soun vèu sourne, sa telaragno,
E iéu, emé moun candelié,
Vau m’encauna ‘mé la tussagno.

Car jour e nuech sèmpre defouero
Vous douno l’ànci d’un raumas.
Alor lou sèr coumo lei touero
Dintras au caud dins voueste mas,
Meten la barr’ en bouto-fouero,
E dins lou fue just un ramas.

O nuech, empouarto mi alin,
Dins leis espàci z’estelen,
E dins l’eterne remoulin,
Brego moun couers, taiso l’alen
Que mi fai vido … E pèr fin,
Mèno moun amo dins l’Eilen.

Pierre Dominique Testa, lou 28.10.2017

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?