Lexique Provençal

Dans cette rubrique, des poèmes sont offerts à la lecture des internautes.

En Chino 12.

Man dins la man, enfachina
Pèr ‘queste cèu enlumina,
Isterian nèc uno passado
Leis ue nega dins l’arpejado
Dei coulour de sang, de fue
Qu’avien aprecedi la nue.
Caminerian dins la carrièro
E adeja lei repetièro
Partien pèr lei marcat nuechen
‘Mé si bèrrio, sèi panié plen.
E quàuqueis uno ‘mé sèis ase,
Mandàvon sèi courau viedase
Pèr lei fa coure e s’avanqui
Que tan, si sarien relanqui
E coucha pèr mitan la caussado
Pèr peneca, pesca ‘no blado !
Li falié vèire dins l’escur
Coumo cridàvon fènt lou fur.
Touei lei gèns li fasien plaço ;
E sèns rèn far pèr antifaço
Arribàvon en long troupèu
Pèr bando gaio de repèu !
Semblav’ un grand passo-carrièro
En qu degun cercavo nièro.
Èron la Chino dei pacan
La vertadièro, ‘mé sèi can,
Sèi carrèto e sèi coustume,
Qu’à de rèng tau coum’ un flume
De davans nàutrei dins la pas
S’escoulantav’ à cha un pas.
Pourtàvon dei camié courtèto
Emé soun viesti sus l’anquèto,
Sarra, emé un poulit nous
D’un efèt dei pus ufanous,
Bèn talamen que quàuquei frumo
Li tancàvon un feisset de plumo,
De crèire que deis auceloun
L’ avien nisa d’escambarloun !
E sus sèi tèsto dóu péu rège
Que li rendié, si crèi, fourège,
S’empegàvon coum’ un capèu
Quouro nègre quouro pourpèu
N’en regussant la catalano
D’uno man fado ‘m’ engivano.
« - Sèmblon ‘quélei dóu Cous Julian »
« Qu’an lou nas un pau egipcian »
Diguèri lèu sènso manièro.
« - Mai de que an que soun parièro »
« Que ti faguèsson tan recouard »
« Ti remenant ansin lou couar ! »
E iéu leis ue redoun, plouraire,
Li racountèri, bouen jacaire,
Ço que ma mair’ en trento nóu
Avié viscu qu’èr’ un dijóu.
Si passavo peravans guerro
Que lei paìs fasien sa merro.
Chasque matin partié d’Alau
Sènso bisca, sènso sisclau,
E descendié à soun escolo
Emé d’amigo uno colo.
Carrièro Estello, à miejour,
Manjavo, gaio, cade jour
Encó de sa tanto Marcello
Qu’à chasque cóup dins sa padello
Li adoubav’ un bouen crespèu
Que li metié à tiro-pèu
Tóutei lei soubro que troubavo
Fènt uno mesclo qu’adoubavo.
Ansin de soun establimen
Que tóutei li disien Touren,
Partié tras tóutei lei carrièro
Qu’anàvon puei dins l’endrechièro
Dóu pu grand marcat marsihès
Que recampavo lei pagès
Lei rusticair’ e legumaire
Vendènt emé si quiéu bramaire,
Touei li liéume qu’avien proudu
Dins sèis ouàrtou souvènt coustu.
E ma maire lei regardavo
Lei partisano, que bèn bravo,
La saludàvon ‘mé sèi man
Que li floutàvon dei riban ;
Doumàci avien sus sa tèsto
Li dounant coum’ un èr de fèsto,
Un redort vo un cabessau
E quiha subre bèn adaut,
En coumpes uno canestello
Que tant touquèsse leis estello !
« …Falié lei vèire » ço disié
Leis ue mouisse de pouesié.
Ansin aqui qu’erian en Chino
Lei veguènt emé sèi gourbino,
Coumo fasien au Cous Julian
E qu’aro, es tout d’us encian,
Ai pas pouscu faire peissièro
À sèi remèmbre de carrièro !
Car dins la vilo de Pekin
Que lou cèu li es fouscarin,
Qu pourrié avé la pensado
De rescountra tal’ enregado
De gèns que van fa lou marcat
Emé sèi bèsti, soun eisinat,
Tóutei bèn viesti à sa modo
Sapa de mantèu e de blodo.
E nàutrei lei regachavian ;
De sèi tengudo rèn perdian :
Lei coulour viéuvo deis estofo
E dei capèu emé sèi gofo,
Lou fuoutre, dous, lisc’ o bourru,
E l’anamen sai pansaru
Deis ome tirassant sèi miolo
Parpa de lus, parpa d’auriolo.
Qunt roumavàgi dei chanu
Avian ti pas, despercebu
Dins la vastour d’aquesto Chino
Qu’es èlo soulo un’ estellino,
Un countinent, un oucean,
Dei vièiei sciènci l’arcoulan,
Que briho encuei en primo plaço
Coustié de Trump e sèi palaço.
Nàutr’ avian de devans leis ue
Aquest paìs dins touei sèi fue.
E coum’ eici quand fasèn fèsto,
Seguerian touei doues à la lèsto
Sus ‘quest inmense balouard
Lou pople que fasié un souart,
Talo la póusso quand ventèjo
Vo lou blesin quand plouvinèjo.
Coustejerian lou grand palais
Emé lou fube que falais,
S’adraiavo sènso relàmbi,
Leis un ravoi e d’àutrei gàmbi.
Fourmàvon pèr cair’ e cantoun
Dei moulounado de santoun,
Qu’emé sèi bras, un pau blagaire,
N’en disien mai qu’un barjacaire !
E ansinto, n’en faguerian
Dei kilomètre de damian !
Bèn talamen qu’après un’ ouro
Sènso si mete à la bourro,
Arriberian sus lou relarg
Sus ‘queste plan qu’es tant preclar
La pu grand plaço de la vilo
Que tout lou mounde si faufilo
Ounte trono au mitan Mao
Qu’uno musico de piano
Sènsa aqui si l’esgaièjo
Li douno vido e lou caièjo !!!
Au cap d’aquest inmense plan
Clot, sèns pendis coum’ uno man,
S’esperloungavo la carrièro
Ounte lou sèr à la sournièro,
Se dabanavo lou marcat
Emé sèi vèndo sèi barat !
Nàutrei la semano d’à rèire
Que l’avian vist, sai enclausèire,
Fuguerian pres d’un quicho-couar
E zóu mai, fasènt lei fouart,
Li tournerian en counouissèire
Emé nouest’ armo en plen desèire !
Mai quéstou cóup tasterian rèn :
Sus lei croumpo faguerian fren,
Pèr noun despenda de mounèdo
En di teissut fila de sèdo
Meravihous e fin trabai
Qu’en Chino fan sus tout rabai.
Croumperian just’ uno boutiho
Qu’aganterian à la rapiho
A un fieraire que ‘n vendié
Que soun mestié èr’ eigadié.
L’ isterian ‘qui uno passado.
Fasian un tour, e à vegado,
Cambiavian pèr rire, de sèns
Jusqu’à que l’aguèss’ un demèns
Dei gèns fasènt la passaroto
Lou cuou rieja en redingoto !
Fin finalo dins ‘quest ambiènt
Que tout èro dins lou bouiènt :
E lei vendèire e lei croumpaire,
Lei counouissèir’ e lei badaire,
E lou cèu nègr’ e l’estelan
Lei lumenié gair’ abelan,
Preguerian puei lou tèms de viéure
Pèr prouficha un pau deliéure,
Aqui dóu tout bèu darrié ser
Que se nous èro un pau esquer
D’acaba noueste vouiàgi
Erian countènt sèns badinàgi
Zóu de tourna à nouest’ oustau
Qu’avian leissa tant lèu atau !
Tèsto d’en bas e tristounèto,
Au mitan de nouesto chambrèto
Dóu Novotel Peace de Beijing
Que sènso peco sènso sing
Nous avié aculi trei semano
À n’en perdre la tramountano,
Alestiguerian nouéstei sa
Un tantinet, tant, cabassa
Pèr tóutei lei bèlleis eisino
Qu’avian croumpa pèr lei vesino
La famiho e leis ami,
Que n’i avié, verai, dei coumi !
Dourmirian gaire. La nuechado
Fuguè longo. E à vegado,
Dins nouest’ inmense e large lié
Si raderian ‘mé ma mouié,
E redisian, l’ estènt encaro,
Lei moument lei pu fouart fin qu’aro,
Que deja devenien recouard
Que nous amoulissien lou couar.
Après dei bais e d’embrassado
Si fènt leis ue de cassounado,
Trouberian puei li bras d’Ourfiéu
Mai fuguè gair’ espountaniéu.
Sièis ouro, pìcon à la pouarto
D’uno man segur’ emai fouarto !
Es la chambourd’ e lou varlet
Emé soun èr cascarelet
Que vènon nous douna ‘judo
Toujour bèn d’aise e à la mudo
Pèr prepara nouéstei bardat
Tau coumo fan touei lei sourdat.
Trei saco, emé quatro tasco,
Tout en varai, en misco masco
Que duvian pourta à d’abas
Sèns de tróup met’ un brandabas.
Dins lou silènci de l’aubèto
A pas feutri, ‘mé dei roudèto,
Faguerian ‘squiha tout acò
Mèntre que iéu dins d’ « alor ò »
Respoundiéu à uno damoto
Sus soun lindau, que cafignoto,
Dins un francès mai que pounchu
M’arresounavo d’un « Moussu » !
Passèri lèu que fasié rire
Quand assajèri de li dire
« - Nautr’ à Marsiho lou francès »
« N’en fasèn pas noueste recès. »
« E iéu refùsi coumo fouesso »
« De l’emplega à far d’estouesso. »
Dóu cóup la frumo mi lachè !
Mai de galis mi regachè,
Coumo que fuguèssi un ladre
Cavaliscant lou Sante Padre !
E sènso faire d’estampèu
Disènt Adiéu au Nouvotèu,
Sauterian dins uno veituro
Qu’à touto boumbo, fè veluro !
Après un’ ouro de trejit,
Fuguè un brav’ endemesit
Que d’ arriba à touto zuèrto,
Vous va diéu ‘cò sènso faubèrto,
Dins l’inmense areoupouart,
Que qu lou vèi, póu fair’ un mouart !
Pecaire, lei nouéstrei de Franço
Emai l’aguèss’ ameiouranço
Pèr counjoungla moudernita
Eisanço e teinicita
Sèmblon rèn que d’areoudrome
Mena pèr ‘no pougnado d’ome
E quàuquei frumo qu’un bounet
Leis assiéuno un tantinet.
Marignan’ es uno masado
Quouro Pekin d’un’ amirado,
Vous aparèiss’ èstre un dragoun
Uno regien en parangoun !
Anas pas crèire de seguido
Que preferìssi lei trepido
Lou sagan lou boulegadis
D’aquest fouele barrejadis
Que de longo pertout en Chino
Mete varai e treboulino.
Nounoun pardi ! Va pénsi pas,
Iéu recérqui souco la pas !
Mai carmume fau recounouèisse
Segur que nous làisso perplèisse,
Que lei chines soun resóuvu
Maugrat tout à l’escoundu,
De deveni uno poudènci
Ecounoumic’ en aparènci,
Sai que toutuno dins lei fach
Que pourrié faire dei mesfach
À nouesto giro oucitendalo
Que s’entrassoun’ e plègo l’alo !
Dounc intrerian dins ‘cò gigant
Qu’es francamen embriagant.
Proumié lou trepadou, de fouero,
Es eicigne de buto-fouero ;
Es mai larg qu’aquest dóu Viei-Pouart,
Qu’à Marsiho que sian tant fouart,
Li pourrian quàsi en renguièro
Li mete quatro Canebièro !
A Pekin pèr cènt, pèr milié,
Lei tàssi sèmpre en foulié,
Fan ‘qui d’avans sa farandolo
Emé sèi càrri, sèi badolo,
Emé sèi bèllei mercedès
‘Mé si Rolls’Royce que tant, adès,
Si li poudié vèire dei Damo,
Dei grand Moussu d’un’ auto famo.
Aro tout lou mound’ es parié,
Siguèsson eissi d’un paié,
Vo neissu dins uno bastido,
Dins un castèu em’ uno crido,
Vo encaro dins un palais
Tout plen daura d’un poulit biais.
E d’éstei bellissìmei cocho,
Sourtien dei facho de bambocho :
Qu bèn sapa dins sèi jargau,
Qu desbraia, esparagau,
Emé dei min’ espeloufido
E dei quinquet en regalido.
Courrien, fouele, apetuga,
Emé leis ue plen embuga
De si senti dins ‘questo prèisso
Quichado à si frega lei cuèisso !
À cha minuto, en viravóu,
Si couloumàvon en tau vóu,
Qu’aurias pouscu d’acò acrèire
Qu’avien lou fue à soun darrèire !
E nàutr’ aqui arriberian
Tout plan planet tau coumo sian,
Emé nouéstei valiso plèno
Que l’ avien mes uno cadèno.
Mai cafido de tant d’óujet
Que li fasié un bedelet,
Semblàvon mai à dei boumbono
Qu’ei tasco d’uno bravo dono !
Lou cofre lou desfarquerian
E dins lou fube parterian!
Capoun de souart, tout aquest mounde
Que s’embrivavo en abounde,
Souto milanto luminié,
Que dins dei giscle pèr milié
Asoundàvon aqui l’intrado
Ount si negàvon leis ardado
Dei gèns que dins sèi avioun
Rejougnien enfin si meisoun.
Arriberian dins uno salo,
Grando, d’un’ aussad’ infernalo,
Que retipavo au miour
D’un’ abadialo l’interiour.
Fasié coum’ uno catedralo
Qu’aurié faugu cinquant’ escalo
Pèr pousqué jougne l’escrouncèu
Que demasia, en cabucèu,
Engouloupavo de sèis alo
Milo couround’ en espiralo !
Nàutreis avian leis ue en l’èr
Tout esbléuja, car èr’ esquèr
A nouesto visto, aqueste lùssi
Au mié dei gèns eitant destrùssi !
N’en fuguerian tout espanta,
Pensant tourna que pèr fianta
Aqui en Chino, en renguièro
Fasien dins uno beselièro,
Eis ue e davans touei lei gèns
Sènso si soucita dóu pèns
D’un estrangié qu’ es en vouiàgi
E que lei prèn pèr dei sauvàgi !
« - Aquéu de cóup » mandèri fouart
Coumo pèr ‘scounjura lou souart !
De fach ‘queste païs de Chino
Qu’es uno terro de coumbino,
Saup asata en estourcien
Leis us encian de sèi regien,
Lei mours de tóutei sèis etnìo
Vivènt coumo pouédon coutrìo,
E l’esclairo moudernita :
Tout acò saviament mescla,
Dins uno voio ‘strambourdanto
Que l’Óucidènt vèi subroundanto.
De vèir’ acò dins ‘quest’ ingrès
Nous leissè à l’ en cóup pantès
E un pessut aquestiounaire
Sus la cujanço de l’afaire !
Mai, bon, coumo tout s’endevèn
À qu saup espera lou vènt,
Fasèn tira que vèiren Berro,
Emé sis aigo emé si terro.
Subran nous prenguè uno fam
Que n’en aurian manda lou bram,
Tau coumo fan puei lei grand cèrvi
Parié dins Marsiho lei nèrvi !
Mounterian un escalator
Qu’aqui aurié fa barbo d’or
Uno vendèiris de l’Estaco
‘Mé sèi chichì bagna de raco.
Aqui leis escaié sèns brus
Zóu s’entieràvon, e lou flus
Dei passagié dins la quicho
Si devessavo sènso dicho.
L’avié un silènci de mouart
Emai l’aguèss’ un tal assouart !
Noun èro pas gaire de crèire
D’entendre s’envoula d’à rèire,
Un parèu de pichouns aucèu
Que jugàvon sout leis arcèu !
S’entaulerian sus ‘no terrasso
Qu’en plastico, douei grand parasso,
Fasien sensa un pau d’oumbrun
Pèr si para dóu calabrun !
Proumié prenguerian ‘no cervèso
Disènt dóu tèms quàuquei fadèso.
Puei braferian un plat d’arris
‘Mé dei pignen dóu capèu gris,
Qu’avien uno mino bèn tristo
Dins ‘questo pauro sausso pisto.
Fasiéu la bèbo. E cap bas,
Lou nas courbu coum’ un rabas,
Mi languissiéu dei bouen ‘chpaguèti
‘Mé dei sauçisso bèn à brèti,
Lou tout ‘mé dei paumo d’amour
Que li pensa, ‘n ai la cremour !
Li vouliéu róugi bèn mesclado
‘Mé de fourmàgi à palado,
Vo en moussèu vo bèn raspas :
Vouei, n’en vouliéu un moulounas.
E au moumènt que pèr dessèri
Prenguèri rèn cregnènt d’urcèri,
E bessai tambèn lou mau-couar
Lou vertigot coumo lei pouarc,
Un boumbassas d’un autre mounde
S’espetè soudan emai brounde.
Dins l’istant ; oust, pus ges de jus
Nimai de lume, nimai lus
Estènt que dins ‘cò gigantesque
Qu’es demasia e proun foulesque,
Qu’a nimai èstr’ e countro-vènt,
Mai sounco dei bournèu poutènt,
La lumièr’ es artificialo
E de soulèu, tè ve, que d’alo !
Chascun mutè, faguè chutus,
Pas degun brus, franc quàuquei tus.
Eiçó durè uno passado ;
Douei trei minuto de pausado.
Puei coumo si roump’ un reclaus
Que siegue fach sié de balaus,
Sié de queiroun, siegue de pèiro,
Vo que semblèss’ uno barrèiro,
Vo un einouarme tapurlet
Emé d’encrèn’ e dei merlet,
Subran dei quiéu dei creidadisso
Faguèron qu’ uno bramadisso.
Fouesso courrèron pèr sourti,
Mai lei pouarto ‘mé sèi pourti
S’èron pestelado soulide,
Fènt lei mecanism’ envalide !
Erian leca coumo d’aucèu,
E dins lou sourne deis arcèu,
Aurian cresu vèire sourire
Lei douei pijoun que sèns coussire,
Adès au travès dei treiau,
Jugàvon de davans lei trau
Qu’avien fa souto lei téulisso
E d’ount fasien sèi toumbadisso.
Sus ‘no paret, pèr un condus
De la veirino de l’en sus,
Dei tavan un plen eissame
S’enfouniè ‘mé sèi voulame
Carga de soun verin amar
Que vous lou garç’ emé soun dard.
Bèn mai, lei gèns pres de foulìgi
Patusclàvon davans l’ aurìgi
Que prouvoucavo aquest aplant
Qu’embestiant metié d’un lans,
Tóutei lei mecanic’ en panno
Coumo se fuguèss’ uno dano !
D’ùnei davans lou grand pourtau
Sus la veirino à cóup brutau,
Picàvon que prenien la ràbi
De si senti dins uno gàbi,
Encarça sèns pousqué sali
Emé d’agach bèn empali.
Nàutr’ avian just leva la tèsto,
Que mi gratusàvi la crèsto !
E vesènt lou fube desrescla
D’eici d’eila entre-mescla,
Mi demandèri fènt leis usso
S’èro de loup vo de marlusso !
Puei coumencèri d’avé póu
Davans aqueste ramagnóu
Dei gèns que pres pèr l’esvapenso
Avien de mau à tira l’enso.
Lei frumo ‘mé lei maire-grand
Lèu amassàvon sèis enfant,
Que s’anavo toumba dei boumbo
Vo quàuquei niéu en grando troumbo !
Leis uno ‘mé si bèu mantèu
Qu’adès jugàvon de l’artèu,
Moustrant sus si taloun d’aguio
Dei boutèu fin d’auto chanuio,
Aro bramàvon cuou au sóu
Escarteirado en trantóu.
« - Aaaa, soun poulido lei bourgèso »
« De Sant Ginié quand de sèis èso »
« Souart’ un parèu de mamèu »
« Parié ei fiho dei bourdèu ! »
« - Tàiso ta mourgo, vai moun Pèire »
« Faguè ma frumo emé desèire. »
« Mai as rasoun, sian touei parié. »
« E que siguessian en d’arrié,
« Neissu dins un quartié pescaire, »
« À Sant Jan, que lei barquejaire »
« ‘Mé lei peissounièro, matin, »
« Fan si varai sus sèi pountin »
« Dins l’inmenso pescarié novo »
« Que lei couchòu fan dei girovo, »
« Empacho pas d’èstr’ eitant bèn »
« Que lei richas que soun tambèn »
« Dei marsihès en part entièro »
« Em’ un parla fa de saumièro…. »
« - Ooou, mai ma bèllo, li siés pus ! »
« L’a longtems que la sau, l’an pus »
« Dins soun parla dous de carrièro ! »
« Car vuei quouro fan si filièro »
« Sus lou bèu cours Pèire Pujet »
« E que fouàrmon de bèu couquet »
« D’avans lou palais de Judìci »
« Bourda de tout plen de brutìssi, »
« Prènon deis èr sèns’ avé d’èr,
« La gauto longo, piés austèr,
« E puei de sèi mino pounchudo »
« Dei gèns pasta de retengudo, »
« Leis ue pleca, lou nas croucu »
« Màndon dei mot tant rascagnu »
« Chipa ‘n jour dins la capitalo, »
« Qu’an lou tramblun à l’ourbitalo !!! »
Disènt tout acò gaire gènt
Sus lei dono qu’an fouess’ argènt,
E que si prenènt pèr Barouno,
Emai restèsson dins d’androuno,
Engàugnon l’acènt de Paris
Que n’en fan puei pamèns lou tris,
Iéu m’aubourèri d’uno tracho,
Vèire se ‘questo malafacho
De manco d’eleitricita,
Ourrour de la moudernita,
S’anavo atermina proun vite
Que desenant èro necite,
Lei gèns estènt pres de la póu
D’ista en Chino mai que fóu.
Acabàvi puro ma fraso,
Quouro d’en aut tout d’un s’abraso
Dei ramo de lume pèr milié
E lei lampèto dei lumenié
Que penjàvon ‘qui dins lei vouto :
Tout de vitraio qu’erian souto.
Fuguè qu’un quiéu, qu’aplaudimen
Que seguièron l’atupimen.
Tóuteis à la barin baraio
Emplempougnant soun artifaio,
Si couloumèron dins la gau
Sus lei pouarto, sus lei pourtau,
E prenguèron à l’assalido
Lei guisquet de despartido,
Ounte duvien puei embarca
Sèns rouspeta sèns s’enarca
Dins sèis avioun que tout de fèrri
Mi gounflàvon leis trèg’ artèri
Tant n’en aviéu póu à mouri
E que poudiéu pas trecouri.
Dóu cóup pauverian lei bagàgi
Sus d’un tapis fach en goumàgi
Que s’esperdié dins un pertus
Fasènt dei mountad’ e dei crus.
Lou mound’ oublidous de la panno
Que ‘n avien grosso desengano,
Prenènt de soun embarcamen
Soun papeiret gaujousamen,
S’anèron seta dins d’estalo
Que tapissàvon la grand salo.
E aqui tóutei bèn carra
Sus ‘quéstei sèti amarra
Dins lou sóu emé dei clavèto,
Deviserian sus lei pouèto
Que si crèson d’èstr’ escrivan
Emé sèi vèrs gènr’ espravant,
E sus leis autour de la nauto
Qu’auturous fan que de pauto.
Li passerian un long moument
Sus la tièro dei mounument
Que leissàvon dins l’escrituro
Lei grand de la literaturo.
E èron bessai mai noumbrous,
Que ço que n’en disien isprous
Lei counouissèire de la cavo,
Qu’avien d’elèi que quàuquei clavo.
Qu escrivié sounco dei vèrs,
Un à l’endrech douei à l’invèrs…
Qu racountavo sa vidasso
Dins dei memòri sai bouscasso…
Qu chifrougnàvo dei sermoun
Qu’anounciàvon un finimound…
Qu s’assajav’ au journalisme
Enmesclant dei francihoutisme…
Qu trachavo dins un rouman
Leis amour de doues aimant…
E qu puei mountav’ en escagno
Dei dicounàri ‘mé loungagno
Qu’encuei si li referissen
Car dóu dessaupre sóufrissen.
Aaaaa qunt bounur, aquesto mauno
Que n’ an leissa coum’ en dei cauno,
Achilo Mir, lou grand Mistral,
Lou viei Ramoun de Miraval,
Pierre Bellot e Roumaniho
Desire Suou e sa maniho,
E Toussan Gros e puei Fallen
E touei leis àutrei plen d’alen ;
Tóuteis aquésteis escribaire
Que soun mestié de pantaiaire,
Sierve despuei la nue dei tèms
L’armo dei popl’ emai soun pèns.
Soun obro drud’ e subre-bello
Alargo, embellinarello,
Travèsso enca la soucieta
Pèr nous nouri… nous encanta….
Nous mena luen dins d’àutei jasso
Ount la lèngo si destrepasso.
Mai fau pas crèire qu’au jour d’uei
L’aguèsse sounco dei rambuei
E que dins la vido vidanto
Gaire d’estello proun toumbanto
Escriguèsson pas de soun las
D’obro pregnènto tirant d’as.
L’a que de vèire dins dei vilo
Ount’ à cha cènt ount’ à cha milo,
Coum’ à Bourdèus e Mountpelié
Nisso Marsiho Sant Valié,
Leis autour d’uei si despestellon
E sèns cadèno s’acimellon
Dins leis estèu deis aut roucas
Dóu tant celebre Mount Parnass.
Radas leis universitàri,
Coumo Gardy, emé sèi pàri
Liotard, Gouiran emé Foret,
Alèn Barbaza e Vernet,
Verny la nouestro Marijano
Que sa fe es en pèiro-grano,
E noueste Felipe Martel
L’istourian de Jaufré Rudel…
E d’àutrei que soun de counouèisse
E que soun noumbre vai de crèisse.
Vaqui de ço que charravian
Entanterin que gachavian
Que s’aubourèsson dins leis aire,
Leis avioun dóu couers voulaire !
Subran un parlo-fouart sublè
E uno voues restountiguè
Clarinello, puei melicouso,
Nous ourdenant, façoun cachouso,
De si gandi dóu cenadou
Ei pouarto d’un long courredou,
Qu’avié d’èstre tau un coulobre
A nous sourbi, e pèr cinobre
Nous manquèron em’ un craioun
Sus lei papié en virouioun.
Mai au moumènt que l’erian tóuti
Aguerian puei mai un dessóuti !
Lou jus encar’ un cóup petè
E dins lou nègre nous metè !
Treperian coumo dei bedigo
Que de sèi gudo fan lei brigo.
Coum’un uiau, car noun avian
Nouest’ artifaio, courrerian
Amount à la vai-vite vite
Car pèr nous-àutr’ èro necite,
Qu’aqueste long esmarradou,
Fuguèsse pas ‘n essaumadou !
Un cóup sourti en troupelado,
Tressusèri, e la pelado
M’agantè just au bout dóu nas,
Mi dounant l’èr d’un ibrougnas,
Iéu que just, bùvi rèn que d’aigo
Coumo lei plant de bourtoulaigo.
Fin finalo de tric o de trac,
Travesserian sus lou tarmac,
Que faguerian bèn cinq cènt mètre,
Quàsi segur un kilomètre
Pèr ajougne nouest’ avioun
Qu’avié rèn d’à reacioun.
Prenguèrian l’escalo manièro
Que passav’ entre doues arquièro,
E chacun soun sèti de cuer,
Espererian qu’avian lei nèrf
De s’envoula pèr nouesto Franço
Que sas, ‘n avian la desiranço.
Après bèn dès ouro de vóu
Que de longo, aviéu la póu,
Arriberian à Marignano
Mai l’isterian, puei pas pèr grano,
Car voulian retrouba lèu lèu
De Garlaban lei dous relèu,
De Marsiho lei brusejado
De Barbaraou la valounado.
Anas en Chino, vous va diéu
Mai anas-li, ve, sènso iéu !
Àimi Allauch e sèi coulino
Sa visto longo, sèi champino,
Sèi viei moulin sèi pinatèu
E Nouesto Damo dóu Castèu.
E iéu à la lunchenc’ Asìo,
Que n’ai tasta soun auquimìo,
Iéu preferìssi moun paìs
Car es bèn aqui qu’ai moun nis.

Pierre Dominique Testa, lou 19 de desèmbre 2017…

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?