Lexique Provençal

Dans cette rubrique, des poèmes sont offerts à la lecture des internautes.

Aurìgi.

Ai ploura de la póu quand la pluèio, à raisso,
Toumbè sai coum’ un ruscle sènso degun’ amaisso,
Si couloumè espesso, drud delùvi catiéu,
Tau coum’ uno vengènci d’un diàussi, d’un faus diéu.
Subran d’uiau loundan, couchous, m’ escalustrèron
De sa lus proumierenco que puei m’esbravachèron.
Alor si faguè nuech e lou cèu nivoulous
Semblè touca la terro tant bas qu’èro neblous.
L’aguè pu pas un brus, pu deguno lumièro,
Tout èr’ en tenebrour, assouludo sournièro.
L’aguè un vènt d’aurasso, un vènt de brefounié,
Que faguè si plega leis aubre, lei canié.
Lei fuèio de l’autouno, jaunastro, gaire verdo,
Tremoulèron d’esfrai, cachouso de sa perdo.
Dansàvon tristounèto coumo pèr s’escapa
E defugi leis aigo qu’ anavon esclapa.
Touto la sóuvagino adès èbri, courriolo,
Avié despareissu dei fourni, dei gaiolo,
S’ amatant eilamount bessai dins dei brugas,
Que l’ arriscàvon pas lei dengié d’un eigas.
Tout si palafiquè e la naturo touto,
Esperè que lou tèms faguèsse sa revóuto.
E iéu dintre l’oustau, asseta dins l’ingrès
Vesiéu si davança alin lou segarès,
Lei courtino de pluèio, feissant leis avalido
De sèis aigo pesoujo, preissado reboumbido.
Aurias dich un chivau que courrié au galop
Qu’engoulissènt lei terro de tant plouvié à bro,
Arribè çai davans emé soun èr mourgaire,
Eneigant lou camin, caucigant de tout caire.
Brafavo leis erbèto, lou brout dei roumanin,
Chapoutavo lei bouis, li gréu lei pu menin.
E toujour que mai gròsso, toumbavon puei leis aigo,
Entirant de soun pes, emé lei bourtoulaigo,
Li liéume bèu darrié, que pouàrjon d’aquest mès
Lei radièrei cougourdo, lei pebroun marsihès,
E lei rin de rasin qu’enmescla à sèi vise,
Ei vigno fasien mino d’èstre dins un nebise.
Ouuu…..Qunt’ orr’ espetacle…..Qunto desoulacien !
‘Questo fouelo suberno : qunto marodicien.
La raisso coum’ un dai embrenigè leis aubre
Que sèmpre quicho-siau, semblàvon dei long maubre,
Qu’aqui sèns boulega, si leissant despuia
D’aquest mès autounau èron ‘ja desfuia.
Noun poudien pas parti, s’enfugi dóu malastre !
Avien bello creida, de regarda leis astre,
Lou cèu noun l’èro pus, avié despareissu.
L’avié pu pas ‘no lus, la nuech avié creissu
Bèn tant qu’en plen miejour, emé l’escuresino,
Si sarian sai cresu noun dins dei nivoulino,
Mai dins li vair’ escuro, tout au founs de la mar,
Ounte leis aigo nègro prènon soun goust amar.
E lai, en plen mitan dóu courtiéu de la fermo
Un uiau s’espetè aubèn de sa lumièro,
Que zoubè l’aire fousc, çai de davans l’oustau,
Mi dounant l’espavènso coum’ un cóup qu’es fatau !
Cujèri n’en mouri à pèrdre la ciboulo,
Tant aguèri la póu. ‘questo grando pahoulo
Mi fènt m’embardassa e sai m’estavani
Coum’ un pau se m’aguèsson à grand tra de gani
Trasfura la ventresco, espessa la crougnolo,
Que sai m’aurié manda à santo repausolo !
N’en plourèri d’esfrai, vous va diéu sèns bestour
Que sas, vous v’ afourtìssi mi venguè la matour,
Qu’à cha pau en lagrèmo rajè long de mèi gauto
Parié qu’aguèssi fach uno peco uno fauto.
Plóuguè bessai tres ouro, uiaussè tout dóu tèms
Que jamai s’aplantè, tant bèn qu’un marco-tèms
Aurié de tout segur espeta en brenigo,
Que m’aurien malastrous espessa l’embouligo !
E iéu, de long’ aqui çai davans asseta
Lou nas couentro la vitro, pega d’afrouseta,
Bandissiéu dei senglut, redoun coumo dei cèse
À mi far bidaussa coumo s’aviéu dei rèse !
E puei à l’avalido, eilalin sus l’asuèi
Un’ estrechouno faisso, bluro d’un bèl escuei
Butè pau à cha pau lei niéu de la chavano,
Sèns pas ges s’abriva, sènso degun’ ufano.
Mai subran, puei coumo pèr mi destrassouna
Un troun de Diéu petè, coumo pèr boufouna,
Pèr de dire que soul de touto sa poudènci
Regimavo lou tèms e sèis endevenènci,
L’univèrs dins soun tout que l’enjè dóu cavòs,
Lei vivènt z-e lei mouart, lei pichoun z-e lei gròs.
Encar’ un cóup de mai, aguèri ‘n escaufèstre,
Perpensant que bessai lou Tres Soubeiran Mèstre,
Voulié marca la fin d’aquest dur eiglavas
Qu’avié fouita la terr’ à grand cóup d’estrivas,
Em’ uno ercarso pougno, em’ un tau brustaligi,
Que m’avié tant trebla à creba moun gounflìgi
Emé puei dei lagrèmo, grosso tau coumo d’uou
Que sas, m’en fóuti pas que noun siéu pas d’Auruou !

Pierre Dominique Testa, lou 23.10.2019

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?