Lexique Provençal

Dans cette rubrique, des poèmes sont offerts à la lecture des internautes.

Papiste !

S’estràsson coum' dei chifounié
Coumo dei chin à l’agounié
Qu’aurien póu, verai que soun oues
Li passèss’ à un tout pichot troues
Souto soun nas, e que sèns voues,
Si retroubèsson sènso coues ;
Doumàci soun oupourtuniste,
Mai iéu, m’en fóuti, siéu papiste !

Alour’ à grand cóup de papié
Garni d’uno flour de rousié
E d’un juguet de revóuvèr,
Sèns avé póu d’un mau-gouvèr
Pensant li passa à travèrs
Tau coumo soun lei gèns esquèr,
Nous fan crèire à d’estremiste,
Mai iéu, m’en fóuti, siéu papiste !

Vouélon la plaço de prouvié,
Mai soun toutei dei renouvié !
E franc de l’un qu’a de respèt
Que verai es un bouto-espèt
Leis àutrei fasènt roudelet,
Li couparien, sai, lou coulet !
Tóutei si dìson d’ umaniste,
Mai iéu, m’en fóuti, siéu papiste !

Chascun vóu la cancelarié
Que pèr l’avé, tant si batrié !
Mai ‘n i a que si fan marcho-pèd
Escrachant l’autre pico-pèd.
E quand si fan dei quicho-pèd
En si mandant dei cóup de pèd,
Devènon verai d’anarquiste
Mai iéu, m’en fóuti, siéu papiste !

La plaç’ es caudo. Es plen rendié
De beileja en primadié.
Un couns’ encuei es coum’ un rèi
Que si n’en garço bèn di lèi
Car es éu, sèis ami d’elèi
Que soun lei mèstre dóu tournèi !
Alor prènon l’èr bellissiste
Mai iéu, m’en fóuti, siéu papiste !

Avans, pròchi l’espiçarié,
Sesié la grand oustalarié,
Ounte lou couns’ en soun burèu
Qu’avié un’ èstr’ en badarèu,
Tenié sesiho risarèu,
Pèr touei lei gèns qu’avien de trèu.
Èron dei grands ome umaniste,
Mai iéu, m’en fóuti, siéu papiste !

Soun uno tièro de foulié.
Segur soun pas ges bandoulié,
Mai soun prougram’ en segarès
Vau lou dintre d’un passarès !
E quand faudra paga lei frès
Vous diéu qu’acò, l’aura pu rès,
E ‘n i a pas v’ un que sara triste,
Mai iéu, m’en fóuti, siéu papiste !

Dins quinge jour, ‘quéstei simié
Auran ‘no facho de tóumié,
De tant soun adeli dei nèr
De manda sèi cóup d’estoumbèr.
Mai degun d’elèi es austèr,
E mi demàndi en que sièr,
Que si diguèsson dei Gaulliste,
Mai iéu, m’en fóuti, siéu papiste !

Espéri bèn que lou proumié
Fara jamai rèn à demié !
E que venguèsson lei sambet
E lei sirèno e lou labet,
Leis escoutara qu’un brivet
E qu’istara sèmpre bravet.
Lou miéu es un patrioutiste,
Mai iéu, m’en fóuti, siéu papiste !

Avèn gasagna lei lausié
Creidaran emé courtesié,
Dins la grand salo dóu gouvèr
Que sara coumoulo d’avèrt,
E d’aderènt en àbi verd
Qu’aquèstou cóup an bouen avèrs.
Lou balèti sara pas triste,
Mai iéu, m’en fóuti, siéu papiste !

Auriéu vóugu qu’en abeié
Beilegèsson sèns remprouié :
La drecho lou mitan l’esquèr
Lei naciounau e qu’un gouvèr
Mescla, pousquèsse lei cifèr
Leis aluencha car soun dei sèrp
E que soun deis oupourtuniste ;
Mai iéu, m’en fóuti, siéu papiste !

Mèis ami, crési qu’es parié !
Doumàci quand soun au paié,
Lèu, li vèn un èr sus doues èr :
Nous vouélon toundre puei lou cuèr,
Que nous zóubon, ‘quélei cafèr,
Pèr nous far pèrdre tout espèr.
Mèis ami, istèn óutimiste,
Mai iéu, m’en fóuti, siéu papiste !

Pierre Dominique Testa lou 29.02.2020.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?