Lexique Provençal

Dans cette rubrique, des poèmes sont offerts à la lecture des internautes.

L'amourié de Jerome.

Á moun ami qu'en febrié,
Mi demandè sèns trufarié,
De l'ajuda à derraba
De soun ourtet davans l'oustau
Un aubre que tout plèn saba
Es un dei pu bèus amourié,
Va refusèri, pèd arrié !

« Lou fau ressa » que si lagnè,
Un dilun que mi coumpagnè
Dins lei couelo de Garlaban,
« Vai querr' au tiéu uno destrau, »
Mi venguè puei lou baraban,
« Troucejèn- lou » que s'acipè
E que zóu mai si 'n óupilè !

« Mai que t'a fach aquest aubras »
« Que li vóugues coupa lei bras, »
« Lou pege e puei lou couèrs entié »
« E soun fueian e sèi rampau »
« Que soun cresten es tant nautié ? »
« Agacho coum' es largeiras »
« Coumo sa como fai de gras ! »

Mai moun couligo, soun counjur,
Lou reprenguè coum' un sabrur !
« Viés pas que soubre, li fa nue, »
« E qu'es pu rèn qu'un gibo-trau, »
« 'Mé sèi rasig' à visto d'ue, »
« Pierot, moun bèu, es bèn segur »
« Sa mouart es pas un grand malur ! »

Aqui l'aubre mi regardè
E tras sa rusco puei plourè !
Veguèri long de sèi signoun,
Dei lagrèmo qu'à bèlles pau,
Trescoulantàvon d'à clignoun,
E l'auviguèri, mi semblè,
Que dins sa traco paliguè.

Vous diéu : siguèri dessaupu,
E tout ço qu'aviéu percéupu
De l'armo d'aquest balivèu,
Mi faguè coum' un clapassau,
Que sus moun couar metè un vèu,
E caro-bas, proun resóuvu,
Assentèri puei à soun vut.

Mai aqui trastejèri pas !
Partèri lèu dins l'entrepas,
Agantèri lou trounçounur,
Tirèri coum' un malaut
La couardo, e lou moutur,
Petaradè dins un fracas,
Qu'encar' encuei mi fa percas !!!

E moun Giròme countènt d'éu,
Trepejavo coum' un cadèu !
Ni d'un ni d'ambo, encagna,
Lagrèm' espouncho, l'ue feraud,
Trouncèri sai escafagna,
Lei bround' ounte leis estournèu
Li fan sèi nis en amanèu.

Un cóup que l' istè rèn qu'un plot
Car aviéu tout coupa d'un blot,
Leissèri l'aubr' en soun subé ;
E iéu qu'aviéu un grand trebau,
Lei péu au boufe dóu labé,
Faguèri coum' un bartarot
Á moun ami un pau farot :

« Escouto, li mandèri puei »
« Que noun aviéu pas bèl escuei, »
« E s' ensen lou derrabavian »
« En li gardant soun carenau »
« E dei rasigo, que li sian … »
« Ansin, blèu, pourriéu tre encuei »
« Lou palica, que farié bruei ! »

« Ebè d'acouàrdi, top' aqui »
« Que mi diguè mèns tèsto-aqui ! »
« Metén-si lèu 'm' un picoussin, »
« E en doues our' à la barbau »
« Ajuda, faguèri, d'un roussin »,
« S'avèn de gaire bèn flaqui »
« A Barbaraou, tè, lou vaqui ! »

E desempuei d'aqueste jour,
Qu'a destrepassa la freijour,
Moun coulègo dise deman,
Sènso jamai faire lou trau,
E parié lou subrendeman !
Mai iéu testard li diéu toujour
Que pèr planta sian en tardour !

Cresiéu que li fasié plasé
Que soun aubre dins moun ourtet
Venguèsse puei reprene vanc
E tourna mai s'esparlarga,
Sus la garrigo e sèi rebanc.
Es pas bèn grèu soun mau-voulé,
A sèi rasoun, li gàrdi fé.

Mai lei mès pàsson, sian en jun !
E d'espera es pas tout' un !
La caud arribo, cremairis,
E sèco l'èrbo dei coustau.
Un jour sèns prene lou tourtis,
Demandèri rèn en degun,
E plantèri un rebroutun !

Metèri pas un amourié,
Preferiguèri 'n óulivié.
Mai l'ai pas dich à moun ami,
Que póu garda soun amourié,
E se l'istòri es coumi,
Au mitan de ma pradarié,
L'aura jamai soun amourié !

Pierre Dominique Testa, lou 21 jun 2021.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?