Lexique Provençal

Dans cette rubrique, des poèmes sont offerts à la lecture des internautes.

Nouvé dei Ripoux !

Áujon festa Nouvé, lei desounouro-raço,
Aquélei sacamand escracho-poupulaço !
Au luego de la pas, an semena la guerro,
De pertout mounte soun sus nouesto pauro terro,
Aubóuron dei legnié, àbron dei grands incèndi,
E encaro n' es rèn, car es sounc' un coumpèndi !

Áujon festa Nouvé que fan dei proucessien !
Noun vous l'enganas pas, sa soul' afiscacien,
Es de moustra sa tufo, de manda dei riset
Quouro puei dins l'andano, camìnon petouset,
Reclinant puei sa tèsto pèr parèisse mai gènt,
Mai ailas ço que cèrquon es vous pipa d'argènt !

Áujon festa Nouvé aquélei tusto-brando,
Empegant lei paret d'un mouloun de garlando
Qu'an croumpa au marcat, qu'èron puei à bas couèsti
Sènso saupre, lei nèsci, estènt dei bruto-bèsti,
Que lei fouran fan marje, car soun dei curo-piastre,
Qu'an sèis ue ei bóussoun pulèu que dins leis astre !

Áujon festa Nouvé quand dins lou Sant Cancèu
An fica dins la glèiso que toco l'escrouncèu
Un abet qu'es tan grand flouca de rigouncèu,
Que puei sa pouncho fino trespasso leis arcèu !
E talamen l'an mes dei lume de coulour,
Que si vèi pu l'autar nimai lei vas de flour.

Áujon festa Nouvé aquélei turto-bàrri,
Que n'en mèton dei boulo, dei vèto, dei papàrri.
N'i a que soun recavad' emé d'osco daurado,
Mèntre que d'àutrei puei an soun orvo gibado,
Mai tóutei tant que soun, à n' un fiéu retengudo,
Esbrihàudon que mai que 'n es uno escasudo.

Áujon festa Nouvé emé milo santoun,
Qu'an sourti tout bèu just de sèi boueit' en cartoun.
Bèn de davans l'estable, an mes la pregairis,
E que pouart' uno dourgo tambèn la pourtairis,
Segui dóu viei avugle, de soun fiéu Safourian,
Que cantej' en marchant deis inne gregourian.

Áujon festa Nouvé 'mé dei milié de lume,
Mèntre qu'à l'Abadié en Arle, à Sant Trefume,
Vuei s'esclàron encaro d'emé si viei calèu
Quand noun es pas dei cire que sus lei bas-relèu
Fan juga sèis oumbrino long dei douge pieloun,
Ount s'acòton lei joueine que fan lou tourdouloun.

Áujon festa Nouvé que van faire la crècho,
Dins uno davalado qu'es tróup souvènt l'esplècho
D'aquest' incarnacien qu'an anouncia leis àngi,
Ajuda de Miquèu, de Grabié, leis arcàngi,
E que recamp' au sèr d'aqueste vinto quatre,
Touei lei gèns que proumèton de pu jamai si batre.

Áujon pourta l'Agnèu, 'quéstei truco-taulié !
Fan mino d'èstre sant mai soun dei bandoulié !
E quand dins lou vilàgi, davalon en parèu,
Pourtant sus soun espalo l'agnelet jugarèu,
Pouédi pas m'empacha de vèire dei cafèr
'Mé sèis àrpio taiudo, revertant dei cifèr !

Áujon festa Nouvé, aquéstei biscamboio...
Mount' es lou paure pastre de la cambo garoio,
Lou vertadié bergié qu'an cassa emé croio.
L'an umilia, lei can, l'an trepeja, lei boio,
Mai va regretaran, 'questo malo bóudroio,
Qu'un jour n'en patiran qu'àimon rèn que la roio.

Aujo canta Nouvé, anouncia puei la pas,
Aquesto taifo laid' à facho de gipas,
Emé sèis estubaire, 'mé sèis ue de rabas,
An rèn de fervourous, siguèsson caro-bas !
Pèr encuei esperan d'avé quauque soulas,
E festejan Nouvé luen d'aquélei judas !

Pierre Dominique Testa, lou 16.12.2022.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?