Lexique Provençal

Dans cette rubrique, des poèmes sont offerts à la lecture des internautes.

La vaco de la Crècho de Nouvè.

Èro-ti un buou vo uno vaco,
A Bètelen quour' à l'estaco,
La Vièrgi Maire arribè
Emé lou brave Sant Jóusè,
Si remisa dins un estable
Pèr partouri d'un Diéu amable ?
Encuei cantèn : '' Gau de Nouvè '' .

Pauro vaco que dins la paio
Remóumiavo de menudaio,
Emé davans la grùpi, l'ai
Que l'espinchavo d'ar' en lai,
Coumo uno bèsti quàsi santo
'M' uno courpouro de giganto.
Encuei cantèn : '' Canten Nouvè '' .

T'avié au cóu uno timbourlo
Coumo lou brus pachin-pachourlo
D'un devis que viro catiéu
Qu'aurié desreviha un Diéu
Endourmi demié leis estello
Leissant oubra la Daiarello.
Encuei cantèn : '' Jouious Nouvè '' .

Es pas un buou, diguè lou pastre,
Car 'mé seis ue rado leis astre.
A dei pousso que pèr lou cóup,
Tout' aro van touca lou sóu ;
E pèr ço qu'escounde sa coue,
Lei frumo n'en sarien gieroue !
Encuei cantèn : '' Es puei Nouvè '' .

Siguèss' un mascle, soun estampo
Sarié facho pèr la cisampo
Que couparié de soun autour
Coumo farié tout bouen pastour,
Fourmant pèr ansin dir' un bàrri
Que noun pourrié passa un gàrri !
Encuei cantèn : '' Carme Nouvè '' .

Mèntre qu' aquesto bello bèsti
Que s'enraubo d'un poulit vièsti
Maurèu taca d'un blanc de nèu,
T'a lou regard d'un duganèu,
Manse, redoun coum' uno luno
Qu'a rèn de rèn de la ferruno.
Encuei cantèn : '' jòli Nouvè '' .

A un parèu de bèllei bano
Que li pourrien uno rejano
L'entourtouira pèr l'agandi,
La diregi sèns la bandi,
Car es segur adoumegido
Que la poudèn mena d'eisido.
Encuei cantèn : '' Anue Nouvè '' .

E puei, sa coue espessouso
Que si n'en sièrve, pourcassouso,
De fouit e de casso-mouissau,
Se vous n'en mand' un petassau,
Vous diéu qu'acò, tè, lèu vous truco,
Bèn talamen que vous ensuco !
Encuei cantèn : '' Tressant Nouvè '' .

Regachas la, coum' es poulido,
La bello vaco, l'elegido
Que despuei mai de doues mil' an,
Si n'en parlo, verai, chasc' an,
Quour' en Prouvènço, fèn la Crècho
Qu'es dóu nouestr' uno pèiro-drècho !
Encuei cantèn : '' Cèu de Nouvè '' .

Tre que lou Sant Parèu çai dintro,
Lou mound' entié es dins sa cintro.
Va sènton fouart la vac' e l'ai
Quatecant, d'aquest' ouro en lai,
Si desparmóunon sèns relàmbi,
En boufant sèns ges de garàmbi.
Encuei cantèn : '' Buf de Nouvè '' .

E la jacudo partourisse...
Dins la doulour si coumbourisse.
Mai dins l'estable la calour
Doun' à la Vièrgi qu'es en plour,
Un pau de mansour dins l'aurasso,
Pèr mete Jèsu en bourrasso.
Encuei cantèn : '' Pas de Nouvè '' .

Alouro la Santo Famiho,
Reviestido de sèi roupiho,
Si pauv' un pau sus d'un paié
Qu'a fach à modo de soun lié.
De cha coustat, l'ai e la vaco,
De longo càufon sa bassaco.
Encuei cantèn : '' Lié de Nouvè ''.

Soun aqui pàsi sout la vouto
Luen dei trafé e luen dei routo.
En plen campestre, isoula,
Lei tres Santoun afangoula
An mume pas quauquo mangiho
Ges de pan e de mercandiho.
Encuei cantèn : '' Fam de Nouvè ''

An set tambèn que voudrien bèure.
E dins sa voues, vertadié grèure,
Prounóuncion just '' aigo d'adous ''
Que bastarié lei rèndr' urous ;
Quour' au mitan de la calamo,
Dins la noulènci dóu veramo,
Encuei cantèn : '' Jour de Nouvè '',

Lei pastourèu lei pastourello
Subran emé sèi canestello,
Sèi flàscou d'aigo e de vin,
Dìntron plega entanterin,
E metènt au sóu soun óuferto
Pouàrjon tambèn uno cuberto.
Encuei cantèn : '' Laus de Nouvè ''.

E nouesto vaco sèmpre boufo ...
E lei pastre emé sèi coufo
Que toujour vuèjon à de rèng
Souàrton de longo un quaucarèn,
Que pourrié servi à la Maire
Dins aquest jour tant renouvaire.
Encuei cantèn : '' Rèi de Nouvè '' .

L'ai e la vaco dins l'estable
Ìston de drech, e embrandable
Caufant l'aire de soun alen
Á la lusour d'un viei calèn,
Sèmblon dóu Paradis leis Ángi
Quand làuson Diéu 'mé leis Árcàngi.
Encuei cantèn : '' Ur de Nouvè '' .

Deja eici dins lei famiho
D'Alau, dóu Plan e de Marsiho,
Lei gèns souàrton de sèi cartoun
L'ai e la vaco e lei Santoun,
Pèr li leva un det de póusso
Car lou tèms prèisso que s'acousso.
Encuei cantèn : '' Brave Nouvè ''.

Fan puei dei plan sus la coumèto
Pèr prevèire lei bastidèdo.
D'ataié, dei fouent e d'oustau,
Dei lavadou, un ospitau,
Segur qu' óublidon pas la croto,
Lei lisso pèr lei passaroto.
Encuei cantèn : '' Fe de Nouvè '' .

Es tèms de mete dins la baumo
E nouesto vaco e nouesto saumo.
'N i a que diran : mai : ... e lou buou,
Que dìson que venié d'Auruou ?
Vous diéu que sèi bano pounchudo
A empacha sa benvengudo.
Encuei cantèn : '' Buou de Nouvè ''.

Parié la vaco es puei banudo
E s'es einouarmo e poussarudo,
Souto soun vèntri, radas bèn ;
Lei santounié an fa 'mé suen,
Un piés, mai ges de bassaquèti
Em' un mamèu qu'es boufarèti.
Encuei cantèn : '' Piés de Nouvè ''.

Vaqui l'encavo qu'en la Crècho,
Pèr tèms de Nouvè, sèns coustrècho,
Poudèn en plaço dóu gròs buou,
Noun pas li mete mum' un muou,
Mai uno vaco dei pu bello
Que recaufe la capitello.
Encuei cantèn : '' Muou de Nouvè '' .

Pierre Dominique Testa, lou 24 de nouvèmbre 2024.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?