Lexique Provençal

Dans cette rubrique, des poèmes sont offerts à la lecture des internautes.

Recouard aisse.

Sian vuei debuto de desèmbre,
E dins moun armo, 'quest remèmbre
D'èstr' esta un jour escarni
Pèr un curat, m'a estarni ;
Pèr toustèms m'a leva l'envèjo
Dóu sant servìci qu'à barrèjo,
Fasiéu despuei tout pichounet
Dins la Glèiso sènso cournet.

Mi n'en souvèn : èr' en desèmbre
Que s'erian vist puei dins un mèmbre
Encò Jirome pèr soupa
'Mé mèis ami, engouloupa
De sèi mantèu de fourraduro
Que n'en regussant la couluro,
Si jalàvon tant fasié fre
Que n'en istèron plan barè.

Reparlerian de Nouesto Damo
Quand dins lou vèspr' à la calamo,
Touto la colo dei gardian,
Faguè un rambai de damian ;
D'uno descunchouso manièro
Digno dei nèrvi de carrièro,
Mai àtou pas de nouéstei gèns
Que d'acoustumo an de bouen sèn.

M'avien tibla 'n atrapatòri !
Sèns mi va dire, endourmitòri,
M'avien tóutei doues counvida
Á biais de miour soulida
Nouest' amista, nouesto freiresso,
Degaiado pèr l'orresesso
De sa tengudo eilamoundaut
A la Capello de frejau.

Pensèri bèn, quand sus la plaço,
Lei vesiéu faus tau dei limaço
Que soun óujeitiéu gair' esters,
Èro de segur coum' un bers !
E mi metèri dins la tèsto
D'ana au couar de la batèsto
Pèr destousca sèis entencien,
Que sara 'no marodicien.

Vous pàssi leis espepissado
D'esto tristo malemparado,
Quour' ai croumpa lei doues pizza
Lou vin e lou coca-cola.
Si sian parga dins la carrièro
Davans l'oustau dins la sournièro,
Car adeja si fasié tard,
Moumen proupìci pèr lei couard !

S'entaulerian ansin touei quatre
Sèns saupre qu'anavian si batre,
Á tout lou mèns emé dei mot
Qu'an lou trenca d'un massicot,
Que mi desengrenarié l'iro
'Mé la justesso d'uno biro
Recebudo au mitan dóu couar
A vous baia lou couele-touar !

Subran lou curat sus sa cadièro,
Coumo s'espèto la peissièro,
Mi mando 'no fraso à mouri
Emé dei mot lei pu marrit,
Negacien e mum' antitèso
Dóu Sacerdòci, de sa mèso,
Mi diant qu'èri rèn emai rèn,
Qu'aviéu just dre d'ista enfrèn !

Arrougant coum' es pas de crèire,
T'avié l'ue aisse, empegnèire ;
Parpelejavo de plasé !
E pèr coume de soun lesé,
Si boutè quàsi de sourire,
Un riset gras que vóu tout dire ;
Tout countènt d'éu de m'umilia,
Countuniè de m'escarounia.

Panti, destrantaia e blave,
Ço que diguè, èro dei grave !
Pèr Noueste Diéu, lou pu pichoun,
Siguèsse mum' esquerinchoun,
Gibous, autié, goi vo foulastre,
Un bréu fada qu'es dins leis astre,
Es tout pèr Éu : chascun es tout
Ounte que siègue, de pertout !

Noueste Segnour prène lou mounde
Tau coum' es, li baiant l'abounde.
Chasc' ome que sus terr' es na,
Jamai pèr Éu sara dana :
A tout pecat misericòrdi,
En Diéu : la pas e la councòrdi,
Chascun es tout dins soun Sant Couar
De sa neissènço à sa mouart !

Éu, 'queste desounouro-raço
Emé lei roueito sus sa faço
Si deleitavo, auturous,
De si senti tant pouderous
Á chaupina sènso vergougno
Pèr faire provo de sa pougno,
Un paure viei que dins qu'un briéu,
Passo d'ouviho à rèn-pèr-diéu !

Noun n'en cresèri mèis auriho
Tant l'escorno faguè la piho
Dins ma paur' armo de servènt
Qu'entàntou d'an dins lou bouiènt,
Beilejè soul nouesto couralo
Dins la glèiso, leis abadialo
Bèn mai de quaranto vuech an
Sout lou gouver dei capelan !

Jamai despuei bèn quatr' annado
Siguèss' esta à mié badado,
N'a prounouncia un soul regrèt
Siguèsse raste, gair' escrèt.
Coumo s'adoubo vuei qu'un prèire
Siègue tant faus e maufasèire
E que presicant lou perdoun
Noun lou demande d'escoundoun ?

Pèr iéu, roumpè soun Sacerdòci
E si viéutè dins lou negòci
Dei clinclan, boundieusarié,
D'ount sourtè sa caïnarié,
Doublidous dei quatre Vangèli
Que lou menè à 'quest nequèli
Couloumant l'ensen dóu clergat
Dins lou ciéucle dei renegat !

N'en apelèri au Vicàri
Qu'éu, faus, pèr tout elucidàri,
Virè tèsto dins lou savèu
Tau l'estrùci dins lou gravèu.
Diant qu'aviéu just de passa subre,
E d'engouli moun mau d'ugubre,
Sènso far un tal estampèu,
Pèr quatre mot, crus de repèu !

Qunt gatamiaul' aquest moufiànti ;
E pèr la Glèiso : qu'un rouquànti !!!!
Pèr soun manco d'autourita,
Pèr fausso soulidarita,
Leissè lou jouve dins sa fango
Soun ministèri dins lou trango,
E la parròqui dins l'errour
La mesprentur' e l'amarour.

N'en apelèri l'Archivèsque
Qu'à Marsiho, l'a ges d'Avèsque !
Éu coumo l'autr' e tout parié,
Noun respoundè à moun doursié,
L'avènt manda countant l'istòri,
Esperant que sié ententòri.
N'en fuguè rèn ! Noun quinquè mot,
E s'embarrè dins soun fourtot !

Éu tambèn, resquihè la póusso
Sout lou tapis sènso rescousso
Pèr 'queste paure capelan,
Qu'aro semblav' un fiéu-pelan,
Caminant de longo d'à rèire
Si sachènt gaire retrasèire,
Dei Sant que despuei douei mil' an,
Avien touei mes lou Cèu à brand.

D'abors qu'èron touei doues sourdingue,
Noun pareissiènt dins quauqu' embringue,
Escriguèri au soubreiran
Au Papo, à Romo, plen de cran,
Pèr li esplica quà Marsiho,
Dins la Glèiso, leis ouviho,
Pouèdon dóu jour au lendeman,
Èstre rèn d'un revès de man,

Sènso que puei lei douei vicàri,
Qu'an l'autourita sus sèi pàri,
Oubligèsse aqueste curat,
De presenta sènso barat,
Sèis escuso dei suplicouso,
Pèr 'quest' escorno bourdescouso,
Que fasié taco dins Alau,
Esperant dounc soun quicho-clau.

Mai lou sant père santissime
Dins soun palais dei bellissime,
Parié tambèn noun respoundè,
Que bessai pas mi legiguè,
Tant s'óucupo de sèi vouiàgi
Qu'à l'ouro d'uei n'en fan usàgi
Pèr vangelisa eilalin
Dins sa veituro de gandin !

E nàutrei, 'qui, avèn lei rèsto
Que pèr menti rèn leis arrèsto.
Mai mounte soun lei clerc moudeste ?
Nous soubro que lei desouneste,
Leis arougant, leis auturous,
Lei fièr, leis afre, leis irous,
E 'n i a tant pau que soun amable
Que quand 'n i a v'un, es estounable !

Faudra qu'un jour mi leis empàssi,
'Quéstei mot de sant patiràssi.
Éu istara dins soun pecat,
'Questo bourdiho, lou cournat,
E iéu, pecaire, seco-dàti,
'Mé 'queste tour d'escaferlàti,
Rèsti amar e cambitort
A tout jamai fouel' e bistort.

Pierre Dominique Testa, lou 6 de desèmbre 2024.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?