Lexique Provençal

Dans cette rubrique, des poèmes sont offerts à la lecture des internautes.

Chàmbri ! ( le Cancer )

Oooou d'aquest Chàmbri fèr ! Aqueste gatamiaule
Que mi brafo lou vèntri sènso qu'ague l'èr aule,
Doumàci sènti bèn que l'a rèn que mi dòu,
Mume se de va saupre, mi garç' un pau la pòu!
Coumo tout lou masclun, anèn à l'uroulògou ;
Lou miéu es gènt, bravas, verai, a rèn d'un dògou !
Lou duviéu ana vèire en debuto d'ivèr
M'entournant de l'aupàgi plen de moun desesper.
'' Vai li aro que siés deliéura dei froumàgi
E qu'as enfin de tèms pèr tèi patricoulàgi
E que pos dins toun lié l'ista un pau tardié,
Sens que dùgues preissa, coumo tout meinadié,
Anue coumença d'ouro l'obro de ta journado,
Que sas, l'as meritado, tu, la retirado ! ''
Ma mouié, l'escoutèri. Prenguèri rendès-vous.
Lendeman de matin, de drech au gardas-vous,
Dins un membre gigant au mié d'un' assemprado,
M'atroubèri 'sperant, soulet à la filado
Que lou mège Breteau mi reçubèsse lèu
Dins soun burèu tout blanc, qu'un fourège soulèu
Dei raioun arari escleiravo tout juste,
Sènso rèn, degun moble que fugue tust' e buste !
Puei après mai d'un' ouro, sa pouarto si durbè
Que dins l'encadramen, siau apareissè !
Mi parè lèu sa man mi la quichant 'mé fouarço
Que cresèri verai que mi fagu' un' estouarço !
E quàsi mi butant devèrs un cadieras,
Mi l'assetèri soude sèns' èstre groussieras
Que quinquèri pas pus ! L'aguè un grand silènci,
E mi demandè puei s'aviéu uno doulènci
Que mi tavanejèsse davans coumo darrié,
Au nivèu de l'enguet, quour' emé vigourié
Fasiéu peta brunet 'mé ma mouié, d'amigo
Qu'acò es gaire bèu de fourvia sa bigo !
Li diguèri que noun, qu'aviéu pas agu mau
Dins 'quéleis escasènço. Puei pau à cha pau,
L'ambient si destesè que prenguèri fisanço,
Li disènt tau coum' èri, fasènt ges d'abusanço ;
L'escudelèri quàsi, parlant à souto voues,
Que l'estiéu dins Queiras en raso de tout boues,
Dins leis aupàgi naut, amoundaut dins lei nèblo
Gardàvi moun troupèu maugrat ma cambo fèblo,
En cavo qu'uno vaco qu'avié soun roumagau
M'avié d'un cóup de bato manda ei bourdigau,
La tèst' ensaunousido, uno cueiss' escrachado,
'No couesto derrabado e mil' estafilado !
Mi regachè risènt e d'un bound de droulas
M'ourdounè despacient, coumo sai brutalas,
De mi vira de cuou e de mi met' en boumbo
Tau coum' un ai basta que l'an mes 'no bourroumbo !
Escarteira, tout nus, sus lei couid' à ginoui,
Noun parlàvi pas pus, tout bèu just un marmoui,
Pèr li dire d'un boufe d'acaba sa furado
Au pu lèu que poudié e à tout' abrivado,
Doumàci sus la taulo, dins 'questo pousicien,
Mi sentiéu coum' un pouarc en desenebicien !
Esperèri pas gaire que dins qu'uno sagoundo,
M'emboursant soun gròs det à modo d'uno soundo,
Mi lachè quatecant sènso lou mèndr' empes
Qu'ailas aviéu lou Chàmbri emé sèi descoumpes !
Dóu tuert, estavani, istèri coumo cùbi,
Sèns pousqué mi viesti, cauca de milo dùbi.
Pu deguno paraulo de ma bouco sourtè.
Èri coumo neca, quand mi counfourtiguè
Qu'èro grèu e que lèu, duviéu 'no terapìo
La sègre prestamen, bessai uno serìo
De quimio-terapìo, qu'éu mi farié aqui
M'avertissènt segur que n'en sariéu flaqui !
Ni quant vau ni quant couesto, lèu mi reviestiguèri.
M'enganant, mèi debas à l'invès lei metèri,
Aviéu lou vertigot, la tèsto mi doulié,
E moun vèntri redoun coumo pres de foulié
Gargoutav' eitant bèn que lou marmoui d'un' oulo,
N'en menàvi pas larg' e aviéu la pahoulo
De mouri l'endeman, rousiga de l'adins,
Que sas, dins 'queste cas, es jamai anoudin !
Sens pu rèn reteni au dintre ma budaio
Que mi tóussiéu de mau quicha dintre mèi braio,
Mi prenguè de la trouio uno dei cagarié,
Que jamai noun l'aguèri tant soudo aqui d'arrié !
Mi couloumèri lèu mounte sabiéu un pàti
Que sas, li arribèri qu'aviéu lou bàti-bàti !
Lou mounde m'agachavo, mai ve, mi n'en chaliéu
Tant èri aprèissa, car sentiéu qu'aquest briéu
Que tout' aro rajesse se noun lèu m'aliéujèssi,
Anavo s'espeta sènso que rèn pousquèssi !
Èri desmemouria. Lou tuert èro dei fouart !
Aviéu 'questo sentido que ma souerre la Mouart,
Voulié mi traspourta d'en lai aqueste mounde,
Mount' es sounco la pas, ount tout es en abounde.
Quouro sourtèri las, d'aqueste cagibi
Ounte bèn maugrat iéu, m'èri 'n pau eisibi,
L'a tout que mi viravo, lou sóu mi desfautavo
Èri desparpela, ma caro rougejavo,
Lei roueito sus mèi gauto embradàvon mèis ue
Talamen que semblavo qu'encoundien coum' un fue !
Partèri que courriéu tant vouliéu à ma frumo
Li devela l'acip sèns tróup faire de grumo.
Prenguèri ma veituro, coundusèri à founs
Qu'arribèri au miéu coumo róumbon lei troun !
Li espliquèri tout, fin fin d'un' abrivado
E tout dins lou menut emé d'espepissado.
Fuguè estabousido à pas pousqué quinca,
E cresè pèr de bouen qu'aviéu tout maginca,
Pèr sai mi faire plagne, pèr faire lou marjasso,
Pèr jouga au malaut cercant rèn que la jasso !
E dins rèn qu'un raisso, mèi lagrèmo rajant,
Mainè puei quatecant d'un agach foudrejant,
Que disiéu la verta, cruso emai doulènto.
Veguèri que sèis ue, emai siègue valènto,
S'embuguèron plourous. Mi quichè dins sèi bras.
Noun parlè quàsi pas. E iéu que charreiras
D'accoustumo barjàvi, pèr lou cóup mi teisèri.
Touei doues envertouia, dins aquest treboulèri
Que venié nous mata, si quicherian que mai,
Móugu pèr nouest' amour, bèu, pu fouart que jamai.
Mi prenguè pèr la man caudo d'escoumóugudo
E de sa voues treblado, coum' un pau estignudo,
Mi diguè velousado dins soun dous paraulis
Qu'aqueste Chàmbri emé soun bourroulis,
« l'aurèn, t' en fàgues pas e li farèn soun coumte,
Doumàci pèr gari, l'a mai d'escapamounte
Que saurèn lei trouba, duguessian n'en pati,
E bessai si penja au couele lou Viati !
Alouro tout fisènt, buta pèr l'esperanço,
Prenguèri ma mouié qu'avié tant d'amenanço,
E la caranchounèri à la pu pas lacha
Car venian d'aquest Chàmbri quàsi l'escracha.

Pierre Dominique Testa, lou 21 de julié 2026.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?