Lexique Provençal

Dans cette rubrique, des poèmes sont offerts à la lecture des internautes.

L'usino.

Lou mounde es ansin fach que chascun a sèi peno,
Sèi trebau sèi malur sèi segren sèi cadeno.
Aqui dins moun couvènt dei fenèstro riejado
Degun noun pòu sourti manda sèis arrajado,
Doumàci dins lei cèlo l’a pus ges de soulèu
Pèr recaufa lei couar e fa foundre lou gèu.
Siéu arriba d’aièr leis amo adoulentido
Leis ue plega d’en bas, e lou frount sènso vido.
Toujour la paret blanco, uno taulo, un cabes
Emé uno cadièro rambado de travès.
La meteisso courtino de soun verd que fa pòu
Qu’encuei mi semblo bèn de curbi ‘mé soun dòu
Lou membre malouna de bard d’un toun grisau
Que vous mète leis àrci à vous jita de sau.
O Diéu, de que qu’ai fach pèr avé talo fusto
Ai-ti passa moun tems à far de falibusto ?
Ai-ti defournia l’auceloun de soun nis,
Vo bandi l’estrangié sèns li douna d’arris ?
Bessai encaro qu’ai, degu dins la nuech nègro
Dansa ‘mé lou banu, invouca sèis alègro ?
Pamèns rèn mi revèn d’aquétei souveni.
Jamai leis arougant ai vougu sousteni.
De que soubro pèr iéu dei joio qu’ai viscudo
Deis ami emé qu fasian dei courregudo ?
M’eimavon dounco rènque, pèrqu’ aviéu la fabrico …
Lei poudiéu embaucha, fuguèsson-ti d’Africo …
N’en ai vist que plouravon qu’avien ges de trabai
E que noun sabien pu si rampli lou gavai.
D’àutrei d’èstre caumaire, n’en èron escarni,
Si fasien mau-trata, dins sa voues lou creni
D’uno resso marrido semblavo li douna
Leis èr las d’un galiot que l’an abarrouna.
D’ùnei pèr arriba de nourri sèis enfant
Chipavon quand poudien de nougat plèn la man
Que plancavon trebla dins lou founs de sèi braio,
Pregant, que paure iéu, jamai sèis escoundaio,
Lei veguèssi couflado de ço qu’avien voula,
Pèr la souleto encavo d’ana desfangoula
Sèi nistoun, sèi mouié, que dins de gràndei tourre
Esperavon soun paire dóu visàgi moudourre.
E aro de que siéu, aro qu’ai tout perdu
Siéu ni pastre ni baile, encuei siéu à noun pu.
Siéu pas un fin cantaire, nimai un escrivèire,
E siéu tout juste bouen de fa mèis à revèire.
Pamèns en nonant’ un, mi n’en souvèn encaro
Ai fach alin au Merle, sènso mena tantaro,
L’escolo dei bargié, qu’aprenon lou mestié
Que disié lou Bouen-diéu, màncou s’èro fustié,
Qu’èro lou mai sacra, pèrque dins leis estello
Recampavo lei bouen lei marrit lei gounello.
Verai li ai cresu, qu’un jour dins lei coulino
Pourriéu m’espaceja amount ei Coundamino.
Mai moun paire faguè subran un estampèu
Cresènt que l’anirié l’usino, de cantèu.
Ai oubra coum’ un fouele, d’annado e d’annado
Sènso pas ges dourmi just’ uno miejourado.
De nuech coumo de jour, falié à adematin
A uno ouro picanto, lèu si remete en trin.
Leis ue tout davala, embournia de lassìgi
Buviéu un grand cafè, e quand l’avié l’aurìgi,
Istavo aqui toucant la vitro d’empega
Assaja de pensa, mai èri ennega
Pèr la souem que prenié toujour fouarto l’ensubre
A mi destrantaia e mi douna l’ugubre.
D’à cha pau, descoura mai toujour voulountous
Partiéu puei dins l’escur, leis èime à l’aigre-dous,
Rejougne abas Founvièio. Aqui de moun clavié
Cercàvi un moumen la clau que mi falié,
Doumàci n’i en avié penjado à n’ un ganchet
Uno boueno pougnado fasènt de miraiet.
Dintràvi dins lou sourne que soulo leis eissido
Gancihavon soun lume fousc e sèi lusido.
Travessàvi gibla, lou capelet en man
Sachènt que l’avié res, e tau coum’ un trevan
Anàvi à la chaspo m’ajougne dóu fournèu.
Alor lèu l’atubàvi sèns vèire de garèu
Se quauqu’un enintravo, fuguèsse lou proumié
De la colo dei joueine qu’èron pas coustumié
que tròup s’atardivèsson emai que siegue nuech
e que pèr d’ouro e d’ouro sarien davans lou fuech.
Un còup lou mèu couina em’un kilo de sucre,
Que l‘avien apoundu lei pistacho sèns lucre,
Mandavian douei ferrat dei pu bèlleis amèlo
Que fasien lou freni d’uno tarabastèlo.
Aqui esperavian un ped subre lou plot
E lei doues ue rebla, galoi un brin farot,
Que la pasto subran vivènto petejèsse,
E qu’en rènqu’un istant soun oulour embaumèsse
Puei touto la fabrico, e lei quartié d’Alau,
Que sachien tant matin, que Nouvé vo Nadau,
S’adoubavon aqui abas coum’ à la Glèiso,
Que l’a toujour que mèns de gèns que si li sèison.
Avans de tout vessa dins de mouele de boues
Lou nougat que bouiènt fai un tant bouen renoues,
Cridàvi fouero iéu, d’uno voues que traucavo,
Que la gamo s’asclavo e qu’èlo s’enraucavo,
« alor minot, fès lèu … mandas leis erbouriho
Que l’ a ’cò que fai tout, qu’es uno meraviho.
Moun fraire Jòrdi, èu, dóu tèms, fasié lou blanc
Dins un pèiróu moustras qu’em’ uno sasso en man
Tambèn jitavo à bóudre leis amèlo plan plan,
Lou secrèt que falié lou bèn garda estanc,
Pèr que chouièsse pas e que si boudenflèsse
D’un moufu melicous que vous apetissèsse
Un regiment d’óussard revenènt de la guerro
Vo dei jóueinei pacan que rusticon sa terro.
Tout bèu just arribavo que tout èro previst
La colo dei jouvènt qu’anavon de galis
Tant n’en avien soun coufe de si leva matin
En luego de dourmi bessai jusqu’à pu fin !
Puei d’àutrei mai, vaqui que de longo arribavon
Pèr groussi lou troupèu que toujours badaiavon.
Doues parèu de joueine viravon lei casié
Sus lei long rai de fèrri en qu iéu creidasssié
Li fasiéu « … boulegan, que lou fue si davanço
E avèn tout bèu just vista la coumençanço. »
« - vouei patroun, siguès siau, vous soucitas pas tant
Mi respoundè lou Serge, va fasen quatecant. »
Doues àutrei puei après, emplempougnavon mai
Lei péugeis atahut qu’èron fach ’mé de plai
Vo bessai en nouguié, vo bèn dins un viei roure
Que falié faire mèfi de pas l’ana de mourre !
Qu m’ajudavo aqui dins lei pèiróu de couire
Que l’avié sèmpre v’un que li prenié la fouire…
Qu tapissavo eila dins lou sourn’ ataié…
Qu netejavo au sóu tóutei lei pourcarié …
Qu encar’ adoubavo l’archimbell’ e la resso
Lei coutèu lei rasclaire, lei pés deis anso besso…
Souvènt iéu li mandàvi, « òoo fada e lei biho
Mounte soun mai passado ? Jugas eis escoundiho
Au furet, au cluquet … anen zóu boulegan,
Que li disiéu creidant, bando de maufatan !!! »
Alor risian eitant que ço que trimavian.
E de jour e de nuech lou nougat ve cousian,
Que siegue lou bèu tems, vo que siegue la nèblo,
Si levavian matin à l’ouro que desrèblo,
A l’ouro que souvènt, n’i a que soun pas coucha,
Quouro dins la Chastrouso, tout embabaroucha
Mei fraire dins sèi fouarmo prègon Noueste Segnour
Dins dei saume s-encian que soun dóu Bouen Pastour
La voues tèndro e divenco que dins lei mauparado
Vèn nous teni la man e bandi l’acipado.
Vèrs vuech ouro lou jour arribavo cachous
Viesti de soun blu nègre que vesian estrechous
Au travès dei veirino que l’avié au téulat
Coumo tras lei fenèstro garnido d’un fielat.
Alor qunt ’estrambord si fasié à la pouarto
Mount’ un poulit chatun creidavo de voues fouarto :
« òoo leis ome, ou-ou, vaqui sian arribado
venès lèu nous durbi que defouero l’arado
emai tóutei lei couelo soun blanco de la nèu
que se nous auvès pas, saren mouarto dóu gèu. »
Ou atou, s’apreissa li anavian-ti pas !
Que soun rire sa joio emé soun brande-abas
Ero pèr l’ataié coum’ uno dindouleto
Que dintrèsse lóugièro mandant sèi còup d’aleto,
Mudant çai aqui dintre lou rafòli dóu fue
En uno farandoulo levant lou capafue.
Ansin tout la journado màncou s’erian de courre
Si galouiavian tant, que deis ouro, à pourre,
Si n’enchalian pas mai que de barbo à la luno
Vo coumo se la lus mounarcavo la bruno.
Au burèu à l’estànci, èro dóu tout parié
Doumàci la journado, dins lei grands escaié
Mountavon, davalavon, prenènt à bèllei quatre
Leis escaloun de boues d’un biais que cresien batre
Dei sourdat fantasti que leis agarriguèsson
E que dins quàuquei gourg leis aprofoundiguèsson.
Pèr miejour sèns relàmbi de longo à cha sièis,
Emé iéu que toujour segur pèr faire crèis
M’aplantàvi jamai crènto de pas proun faire,
Countuniavian de fèr sèmpre que davançaire.
Lou tantouest se cousian èro cavo arrarido,
Car falié que la pasto fuguèss’ atebesido,
Si que noun, poudian pas lou trenca tròup caudas
Doumàci lou bouen mèu coulavo mouligas
Sus lei lamo dei resso qu’avian autoumatico
Que leis avian croumpad’ en novo mecanico.
Ansin dins la vesprado èro pas tant brusant
Qu’au matin l’avié tout que fasié soun sagan.
Car aleva dei bruch manda pèr lei machino
E dei quiéu trounadis quouro tròup anarchico
La bando s’esgaiavo desticulant dei man,
Vo qu’à de couiounado jugavon sacamand,
Iéu soulet m’encagnàvi que n’èri fouero iéu
E li creidàvi aisse tau un glavas d’abriéu
Qu’èro pas lou moumen de faire leis agasso,
Qu’aviéu pòu dóu nougat que faguèsse fougasso.
« tout s’endevèn patroun » disié Jaqui Illouso
que m’agradavo tant de l’espincha la blouso.
« tè, Pèire, fasié puei la Mariso Pointu,
es quàsi acaba de mete dins l’estu
lei barro de nougat, lou blanc emai lou nègre.
Vesès, pèr lou trabai l’a rèn coumo l’alègre. »
Verai que li anavon tóuteis à la manobro
Emai quàuqueis un rènque, siguèsson de tout obro.
Devèrs sièis ouro e mièjo sa jouncho puei finido
S’envoulavon chascuno souvènt à nuech falido.
Leis ome à cha doues segound soun arribado
S’èron ja escapa d’uno soudo abrivado
Enjusqu’au lendeman que sarien mai aqui
Ansin que n’es deis àutrei que s’èron aflanqui.
Soulet dins la fabrico à vouech ouro passa,
Un còup quàsi lou mounde parti pèr s’ajassa,
M’achinissiéu ’mé Gu, lou joueine Guguielmàchi,
E soun brave coulègo que disian Frangoulàchi,
A escouba l’usino que pertout leis óublido
Trinassavon au sóu en sounc’ un’ escarpido.
Un còup tout bèn próupret, lou pàti neteja,
N’enanavian ensèn sènso s’amareja
D’avé tant trabaia adeli de sèi nèrvi
De de fès trapavian sus lei labro dei bèrbi.
Mai èro pas finido pèr iéu esto journado,
Falié que dins l’estable, mousèss’ à la filado
De mèi cabro lou lach e aquest de mèi vaco
Que despuei lou matin istavon à l’estaco.
A la lèsto fasiéu un einouarme froumàgi
Qu’ adoubàvi soulet au founs de l’estràgi,
Metiéu un pau de sau, viravo lou d’aièr
E ansin destesa d’un anamen esquèr
M’anàvi repausa coutié de ma mouié
Que puei mi regardo emé malancounié.
L’endeman à un’ ouro, zóu mai mi desriviho
Aquest pico-matin que mi trauco l’auriho.
L’embandìssi à pourre, mai eitant voulountous,
Touèrni mai à l’usino sempre que soucitous
De saupre quant de tèms pourra dura ma vido
Dins lou ciéucle infernau qu’a pas gès de salido,
Que gausìssi mei jour, mei pu bèllei annado
Iéu qu’auriéu bèn vougu, bagna d’aigo-signado,
Servi la Santo Glèiso vougna ‘mé lou Sant Chrèmo
Ista pròchi Diéu viéure dins lou Carèmo.
E Vaqui qu’à cha jour l’a tout que recoumènço
Mé sèi rire, sèi plour, emé sèi souvenènço.
Lei vinto doues annado que li passèri puei
Sèns coumta moun enfanço qu’es sèmpre moun asuei,
Soun esta dins l’espèro d’un eterne sejour
Qu’encar’ aqui d’encuei, n’en sènti la calour.
Mai aquesto vido plèno à fach dei envejous
Dei gèns que pròchi iéu èron pas tant gaujous.
Dins ma quìto famiho coumo dins chasque mounde
L’a de gèns que l’argent, fai que tout si counfounde.
Alor m’an cauciga coumo soun leis espigo
Dins lei gràndei bladièro, non pas dins lei garrigo,
Mai en paìs de Crau quand lei gai meissounié
Emé sèi long voulame sènso ceremounié
Sègon, à plèn de garbo lei vaste camp gibla
Pèr lou pès de soun gran que faudra puei cribla.
Que m’an fach deveni si que noun aquest’ oumbro
Que si founde la nue dins lei nèblo souloumbro.
Siéu devengu un rèn que pus degun n’en vòu
Qu’espèri qu’un moumen pèr dins un degoulòu
Mi traire ansin pèr founs, retrouba la calamo
L’Eternita de Dieu e recoubra moun amo.

Pierre Dominique Testa lou 13.5.2009, le beau jour de ND de Fatima.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?