Lexique Provençal

Dans cette rubrique, des poèmes sont offerts à la lecture des internautes.

Nouvè 2009 à Alau.

« Miracle, miracle », diguèri arrougant,
Au Guihaume tristas, lou nouestre capelan.
Éu gachavo lou cèu em’ uno mino basso,
Mèntre que de longo, la pluèio jamai lasso,
Toumbavo en troun de Diéu que zoubavon d’uiau
Lou terraire d’Alau que prenié l’aigo sau !
Desempuei dei semano, sènso degun relàmbi,
Emai sachèssi bèn que l’avié ges d’engàmbi,
De raisso d’aigo gèu, en courtino de sèdo,
Ginglavon, descadèno, sus lei couelo sèns fèdo,
Que lei bergié avien deserta l’a longtèms
Pèr leissa à la vilo sèi terro sèi sourgènt.
Arriba tout bèu just de querre leis agnèu,
Eilamount à Senas que sus lei pue la nèu
Pas luen toumbavo espésso, veguèri dins la glèiso
Sèns lume, sèns degun que li prengue sèis èiso,
Lou curat que parlavo, gama, souto lei vouto,
Á soun ajudarello aqui que tèsto souto
Si lagnavo dóu tèms que metrié en douliho
La Descènto dei pastre viesti de sèi roupiho.
« mai Pèire, avès pas vist ço que rajo dóu cèu,
Dirias que sout lei téule, amount dins l’escrouncèu
Leis aigo van tout’ aro aprefoundi l’óugivo,
Fendascla lei paret, arouina lei douei pivo
Deis arcàngi Michèu, Sant Grabié e Rafèu,
Qu’aqui tau coumo trei bouen custòdi fidèu,
Gardon lou tabernacle, rejoun en plen mitan
De l’autar que Puget faguè de maubre blanc. »
« moun Pèro, va vesès, vèni de la Vau cluso,
que li siéu ana prene, emai cò mi rebuso,
Leis agnèu pèr la mèsso au grand Baile Calamo,
Qu’es pastre amountagnaire, e que pèr Nouesto Damo
Dóu Castèu dounarié sèi braio sa camié,
Doumàci es un ome que rèn fai rebroussié.
Alouro, pensas bèn, que la raisso, l’ai visto !
L’ai màncou bèn tastado car es longo la pisto
Que mèno dins Marsiho, à z’Ais puei à Lambès
E que passo à Cazan pèr tras sèi vignarès.
L’ai agudo en mountant, li diguèri gibla,
Que picavo tant fouart de sèi degout tibla,
Que pensèri verai que d’arrié, la veirino,
Coum’ aquesto d’avans que tóutei doues soun clino,
Anavon s’espeta souto lou pés deis oundo
Tant plóuvié à tout fèndre que fasien la reboundo
Eis aubre de la routo ; piboulo e grand roure
Que de luen pareissien esbrandaia sèi tourre.
Talamen drud zoubavon leis eslùssi dóu cèu,
Que duguèri ’n moumèn recerca un bancèu
Pèr mi li aplanta e l’ista dins l’espèro
Escapa san e sauve d’uno talo galèro !
Après uno mièj’ ouro, cresèri pèr de bouen
Que lei niéu ventrescu que vessavon à fouent,
Si batien achini emé uno massolo
Tant si turtavon fouart coumo dei branquignolo
E si mandavon puei d’uiau plen d’eleitrico,
Que fasien dins leis aire deis zèdo en elastico.
Fin finalo, faguèri racountant moun istòri
Au curat que toujour si tenié ententòri,
Arribèri entié dins lou mas dei Calamo,
Aqui dins lou courtiéu qu’èro sounc’ uno lamo.
Lou baile Pèir’ au mitan souto sa limousino
Pourtant uno barreto fourrado emé d’armino,
Brassejavo countènt de mi vèire enfin
Doumàci avié ’gu pòu, encavo dóu gabin,
Que dins un’ esparrado, m’ aguèssi desvira,
E que d’èstou cabus m’aguèsson pas tira
Raport eis aigo fouelo que dins tóutei lei biau
Avien creissu subran e qu’aro fasien riau ! »
« Moun Dieu, moun Dieu … » ansin mandè lou capelan,
Mèntre que iéu toujour un pessut arrougant
Countuniàvi countènt emé un èr de croio
Coumo lei marsihès quand fan sa boueno-voio.
« Alor coum’ avès fa, perseguè lou Guihaume
Pèr èstre pountuau sèns rèn que vous espaume ? »
« Èbè vé, li diguèri … un còup dedins lou jas,
Aganterian cinq bèsti, li meterian d’enlas,
Lèu, leis embarrerian dins ma vièio badolo
E partèri zóu mai, sèns faire lou nasolo.
Mai defouero ’n còup mai, uno garço de raisso
Entreboulavo tout, e lei mount e lei baisso.
Es bèn verai, moun pèro, que tout long de la routo
Sus la veirino avans, es pas rèn qu’uno gouto
Que toumbè à l’asard coumo dins leis uba,
Es de gaudre d’eigas que duguèri cuba
A n’ uno mar entièro qu’en subre ma veituro
Descadenè subran sèis erso d’uno auturo
Tant nauto, coum’ un toumple invessa d’aut en bas
Que m’estrambouliguè de soun fouart brandabas.
Aviéu talamen pòu, qu’aguèssi uno óulivo
Entre lou cuou quichado sèns graisso ni salivo,
Qu’auriéu fach de segur bèn mai qu’ un litre d’òli
Que n’aguèsson vougna de Diéu leis apoustòli !
Prenguèri sus de iéu de mi carma lei sèns,
Doumàci aviéu mai l’envèjo à tout lou mèns
De fugi d’aquest’ ouro la chavano esglaiouso,
Que de juga l’eroi qu’ éu bravo dins Chastrouso
Lou banu que fai pòu ei mounge quand de nuech
Van fair’ en ribambello soun oufìci sèns fuech.
Moun pèro, aguessias vist la grando pòu qu’aguèri,
Que mi damandarias pas tant sus lou tempèri,
Mai pulèu coumo vai que mi n’en siéu sourti
’Mé lei troun leis uiau que s’èron refourti. »
« Mai Pèire, vous ai fach pas deguno rimarco,
nimai vous ai pas dich qu’erias un sautembarco !
Au countràri vouliéu m’entreva dóu vouiàgi
Qu’avès fach pèr la messo, sèns vous fa garrouiàgi.
Anas adounc pas crèire que vous vóugu’ acipa
E cercas pas lei nièro aqui mounte soun pas ! »
« Escusas-mi Curat, mai ai perdu l’arescle
Tant fuguèri trebla desalena sèns bescle.
Sabès, duviéu teni soulide lou voulant ;
Vouliéu pas m’estanca entàntou lou sagan
Que fasien lei granisso enaut sus lou palastre
Dóu téulat de moun càrri muda en char de pastre. »
Tout bèu just terminàvi moun dire sus la pluèio,
Que de davans la fouent, en plèn mitan dei suèio
Que fourmavon leis aigo que lacavon la plaço,
Un uiau vioulacet zoubo lou cèu, l’estraço,
S’espèto en troun de Diéu sus lou marge de pèiro
Que l’esclapo e l’afoundro coum’ un que l’on coudèiro.
Dins un vanc, tóutei tres, souto lou tabernacle
Toumban d’à genouioun dins l’espèr d’un miracle.
Au travès lei veiriau que traucon leis arcoulo
Subran un rai de lus nous tàncon lei mesoulo !
L’aurìgi calè nèt, pus d’aigo ni bourroulo,
Nimai d’eslùssi blu que dóunon la pahoulo !
E sus lou fiéu d’argent que travèsso lei vouto
Veguèri sus lei arc que lou vieiun descrouto
La póusso dansarello faire sa barandolo,
Juga emé lei sant que puei dins sèi gleisolo
Regachon fissamen la crous que sus l’autar
Esbrihaudo la nau e lou cur e lei bard.
Coum’ anàvi crida ma joio e ma suspresso
Un autre roumbadis pus péuje que s’empresso,
Espésso mai lou cèu de sèi belugo bluro,
Qu’ aquèstou còup d’aqui mi trauco e mi tafuro.
« Pèire, vai, es egau, faren pas la Descènto,
es pas grèu, es lou tèms qu’encuei nous despoutènto. »
Subran dins soun bloudoun, s’auviss’ soun pourtadis
Qu’ emplempougno au mitan d’aquèu barrejadis.
« Pèire tè, devinas, èro Napoleòni
Que m’acertavo ansin d’un èr proun malancòni
Que Moussu lou Prafet dounavo plus l’aubiso
De descèndre d’amount à mèns qu’à sèr, la biso
Boufe fouart à cassa lei niéu e sèis uiausso.
E que lou troun de Diéu esvarte luen sa sausso ! »
« Aaa, jamai de la vido … », cridèri counvinsu
Que Dieu leissarié pas lou jour que l’es neissu
Soun pople ourfanèu de sa nuech qu’es magico
E de soun sant courtègi viscu dins l’autentico.
« Nounounoun vé, faren, maugra la brefounié
La Descènto au mitan dei pastre, dei panié
D’aquéleis bràvei gèns que vendran emé voio
Prega soun Crist enfant e li moustra sa joio.
Vai, moun pèro, veirés, d’Aubagno, de Marsiho,
Courriran leis enfant segui de sèi famiho,
Vendra de z’Ais e d’Arle, de mouloun de curious
Qu’à nuech regardaran bessai proun dubious
Lou clouquié que nous mouestro eilamount leis estello :
Lou soul camin segur que duèrbe la pourtello
Dóu Paradis de Diéu, qu’anuech leis enmantello
E fa briha sèis ue d’uno lusour nouvello. »
Lou prèire mi radè bèn dins lou founs deis ue
Que iéu li dessoutèri lei belugo d’un fue.
E subran sus sèi gauto uno fino rajolo
Escampè douei lagrèmo mèntre que un’ auriolo
Sus sa tèsto reclino si pauvavo lóugièro
L’encourounant ansin d’uno bello manièro…
E la pluèio de longo de longo puei toumbavo…
E sèns degun relàmbi lou troun, que luen roumbavo,
Dounavo à la nue nègro qu’ aro puei negrejavo
Soun menèbre ressouen que tant moun couar temavo.
Partèri pèr l’oustau, alin à Barbarau
Ounte Fino e Cesar avien cava soun trau.
Arribèri tristas, mai segur à l’en còup
Qu’aqueste marrit tèms bèn lèu farié soun bòu.
S’entaulerian touei tres, moun fiéu emé ma frumo
E iéu toujour fisèu, coum’ à moun acoustumo
Diguèri sentencious sèns’ ufano ni croio
« vai, pourgiren à la messo, lei quatre pachichoio,
Li liéume, lou marlus, lou peis e lou cassun.
E segur tout acò, sèns destourba degun,
Lou faren en courtègi au travès dei carrièro
Car Diéu fara ’planta dóu cèu soun estrivièro.
Zézé emé Felipe adurran puei leis èrbo,
Pèire e Genevièvo que reston à Menèrbo
Auran pres ’mé lou peis dei muscle, dei clauvisso,
Mèntre que la Bregito, douei mètre de saussisso
Pourtara pèr óufrèndo au Bouen-Diéu qu’es neissu
Embourrassa de lano esquicha d’ un teissut.
Christello Manjo-aiet prendra un suço-mèu,
Leis Alèssi lou vin, lou rasin lou pu bèu,
Gérard emé sa chato dins uno grando lamo
Depauvaran soun lach au sòu dins la calamo.
Vendra après Cathy que mèno leis óulivo
E Michel la farino se pèr un còup s’abrivo.
Catì la cantairis, adurra lou nougat
Gregòri l’ourtoulaio que soubro dóu marcat.
Marìa caud vistido que rest’ à Sant Vitour
Metra lei cire vert emé fouesso d’amour,
Car saup qu’aquéstei cièrgi dei troun e deis uiau
Aparon l’oustalado e rèndon l’ome siau.
Nicole mountara enaut sus l’escaié
Pèr pauva lou marlus lou caulet sèns l’aiet.
Christiano qu’es sa fiho, un platèu de froumàgi
A garda pèr Jesù, mera dins l’estramàgi.
Christian lou municìpou, d’uno gouerbo de fruch
Estalouirara lou toutun à grand bruch.
De seguido vèndra la bello Benédito
Que dóu Baussit’ enmèno lei man dintre sèi mito
Lei boulo de carboun pèr si caufa l’ivèr
Quouro defouero pèlo à vous rusca lou cuèr.
Lou Cristian de Marsiho gantara ’no galino
Mèntre que Ludouvì que Flourènç’ es sa nino,
Carrejara douei dourgo coumoulo d’aigo claro
Que bessai si roumpran si li prene pas garo.
Mari-paulo e Charloto, un mourtié à la man
Regardaran toujour devers lou capelan.
Pèr enfin s’envendran lei bèu pastre d’Alau :
Sebastian qu’es moun fiéu au cóume de la gau,
Si proustèrnara la fàci countro terro
Davans lou Nouvèu-na que mudara lei guerro,
En un sant Paradou duradis e eterne
Ounte li regnera soun Amour sampiterne.
L’aura François-xavier qu’es un joueine pouèto
Tout plèn de nouvèuta, qu’ uno tièro coumplèto
De pèço bellissimo n’a cafi un recuei
Que si n’en parlara en delai de l’encuei.
L’aura Pierre-enmanuèl qu’ escais-noumon Pitou,
Que de la Bèn-quihado es lou darrié degout.
Fin finalo Matéo, lou pus bèu pastrihoun
Vendra s’agenouia sèns n’avé jamai proun
De canta emé nàutrei aqui davans l’autar
Que li metra soun amo mai tambèn tout soun couar. »
Vaqui pèr aquest an, lei gèns de la couralo
Qu’an vougu celebra de Diéu sèns faire calo
La mess’ à mièjo nuech que voulen prouvençalo
Pèr l’encavo qu’ei gèns douno encaro deis alo.
Verai que soun noumbrous li que vers lou clouquié
Viron sèis ue redoun. E tau un abéié
Que vòu segui soun baile, si couloumon ravoi
Vers Jesù lei pauras lei richas e lei goi.
Li veirias que destraucon qu’arribon dóu Piloun :
Soun coum’ uno soubèrno, s’aprèisson à mouloun,
Fouarmon coum’ un eigas dei milanto visàgi
que plouron de bounur, courrènt à l’arràmbàgi
noun pas de soun argènt, de sa plaço au soulèu
mai d’èsto santo nuech que si l’incarno Dieu.
Soun coum’ aquest troupèu que vèi de luen soun jas
E que bèlo ufanous de retrouba soun mas.
Mai encuei pèr Nouvè, es pas pèr sa bastido
Que desboundon subran, dins rèn qu’uno assalido.
Vouèlon vèir’ arriba, quiha sus la barando
Que si li soun pigna pèr famih’ e pèr bando,
Lei pastre, lei mestié que dins un grand courtègi
Enintron dins la glèiso noun pas coumo d’eirègi
Mai coumo de santas, qu’ aujon moustra sa fe
Bèn maudespié sèi dèco, sèi manco, sèi trafe.
Aqui sian de milié davans la grand’ intrado
Qu’esperan lei darrié que vengon d’abrivado.
Lei tambourin pourmié entamènon l’aubado
Qu’es sèmpre : « Lei pastourèu an fach un’ assemblado ».
Un còup qu’aven canta lei coublo dins l’entié,
Assàgi desvista que mi siegon coustié
Tóutei mei car cantaire tóutei mei cantairis,
Que souvènt lei dimar li fasiéu tant de tris.
Uno còup la troupelado agrumado de iéu,
Si davançan chascun, à de rèng dins qu’un briéu
Dins l’andado mitano. E la glèiso, coumoulo
De tóutei lei roumiéu qu’au couentro deis arcoulo
S’esquichon coumo peis, pren leis èr ufanous
Puei d’uno catedralo quouro ’mé de grand nous
Li adournon lou cur lou jour qu’ un Archivèsque
Travesso ’mé sa crosso sènso que s’embourdesque !
Lou curat bèu d’arrié arribo, capoulié,
E sa troup’ eglesialo emé doues encensié
D’avans lou precedisse em’ un fum de clergjoun
Pourtant lei candelabre d’un anamen rejoun.
Soun bèn un vintenié que dins soun aubo blanco
Dins la nau dóu mitan fan coum’ uno palanco
Entre la terro maire e lou Cèu duradis
Qu’a ni counfin ni caire nimai d’entravadis.
Un diacre ’mé l’estolo aubouro leis Vangèli
Doues àutrei vènon puei sèns fa lei santibèli
Car pourton dins sèi man lou pan emé lou vin
Que tout’ aro saran sènso reviro-trin
Lou Couers e Sang dóu Crist noueste umile Bouen-Diéu
Que festejan anue soun mistèri badiéu.
La messo es cantado. Lei refrin de Sabòly
Soun repres pèr lei gèns que fan sènso rafòli
L’escò à nouéstei voues. E dins dei solfo nauto
Tout eitant dins lei basso toujour de cauto-cauto,
Entre alti e tenor, tóutei afourtissen
Qu’es poussible enca vuei de roumpre lou seden
Que nous tenié rejoun dins la vid’ à l’enciano
Sènso qu’abandounen nouesto fe luen dei dano.
Canten coumo dei fouele, disiéu à cha un cant !
Anen, tiren pas mouele, siguen estrambourdant,
Questo nuech es neissu l’enfant de l’esperanço
Que caucigo la pòu la doulour la soufranço.
Questo nuech es neissu l’Enfant s’ un pau de paio.
La mouart Éu l’a vinsu : cavalisco la Daio !
Mai ai pas dich la fin, l’istòri es tant bèu.
Au moumen que lou prèire souto lou grand tablèu
Passo darrié la taulo pèr incensa lou cibre
E que iéu de mèi cant resquichàvi lou libre,
Si reviro vèrs iéu, e mi dis’ esmóugu :
« Car Pèire, avias drech, emé ço qu’a plóugu,
qu’encaro plóurara, Dieu poudié pas leissa
Queste còup la Descento, si faire sèns fèissa
A l’Amour que l’animo à Nouvé pèr nous-autre :
Es pèr acò qu’adès pousquè pas faire autre
Que de li coumanda, ei troun e eis uiau,
De cala sèis oundado e de mete lou siau. »
Mai iéu d’aquéstei mot, noun pousquèri respouendre,
Tant aviéu lou couar gros que vouliéu mi rescouendre.
Alouro pèr douna mai d’and’ à la couralo
Enfounièri soulet que mi dounavo d’alo
La mèsso de Sartòri, qu’ èlo m’ avié douna
Pèr canta à Nouvé lou Diéu que nous es na,
Enjusqu’à luen ma mouart que pousquèssi pus gaire
Canta à miejo nuech e lou Fiéu e lou Paire.

Pierre Dominique Testa, lou 26.12.2009. La pluèio de brefounié calè just pèr Descento e pèr la durado de la Messo de Miejo-nuech … !

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?