Lexique Provençal

Dans cette rubrique, des poèmes sont offerts à la lecture des internautes.

Odo à Mirabèu ( archiéu CIEL d'Oc )

Oubreto dedicado à-n-un dei pu grand amiraire de Mirabèu e de tout ço que lou pretoco, En Moutet, jùgi de pas à-z-Ais óumàgi courau dóu vièi Felibre Martelly Mirabèu

Lou siecle fenissié. L’ardènto Tremountano
D’ounte devié sourti la Nacioun soubeirano.
Grouvo quatre-vint-nòu. Sus soun trone en desrèi
Louis Segen, esbranda pèr lei gràndei tempèsto
De la Revoulucien que li gueiro la tèsto
Balejo, esbalausi davans lou Pople-Rèi!
E lou Prougrès s’aubouro e seis erso anissado,
Buton la reiauta pèr lou flot gangassado
L’Autourita n’es plus qu’un risible simbèu;
La Courouno, un juguet que trampello e brandiho;
L’Arbitràri dei Grand toumbo emé la Bastiho
Quand dins lou treboulis aparèis Mirabèu!
Mirabèu te vaqui !! Salut tribun Tounerro!
L’uiau l’as dins leis uei; ta voues clairoun de guerro,
Entremoulis Clergié, Noublesso, Tiers-Estat.
Car la Revoulucien en tu s’es encarnada;
Es toun afougamen en que l’a descaussanado,
E soun courre impetous rèn pòu plus l’arresta!
Digo? Mai d’ounte vèn que despièi ta jouinesso,
Pèr la plumo e lou Vèrbi engrunes la Noublesso?
Perqué leis Oupressour lei gingles à-de-reng?
Sabiés-ti que lei Noble, espoumpi d’óupulènci,
Au jour deis eleicien poussarien l’insoulènci
Fin-qu’à te refusa d’enintra dins sei rèng?
Toun paire meme atribo afrouso ta naturo
Moustrous toun esperit; idouso ta figuro.
E dins soun ahiranço, avuglige imprudènt!
Ves pas souto lei clot de pichoto veirolo,
Enlusissènt toun frount d’un trelus resplendènt.
Pèr lou mounde siés laid, mai siés bèn pèr Sofìo
Que pèr tu laisso tout: ome, devé, patrìo.
Que pertout te seguis!.. O chale de l’amour!
Mai coumo fasias-ti pèr vous dire e mai dire
L’uscle sèmpre nouvèu de vouesto amo en delire,
De longo, flame nòu e lou meme toujour?
D’auvis as tout aprés, tout fa: matematico,
Lengo anciano e mouderno, armo, dessin, musico,
Eìsercìci dóu cors: pèr tu rèn n’es nouvèu.
Caractèro impetous, devoures leis óubràgi
Deis Art emai dei sciènci, e, mau-grat toun jouine àgi
Tei mèstre pouent plus rèn cougna dins toun cervèu.
Te maridon emé la pus enfourtunado
Eiretiero de-z-Ais! La doto es acabado.
Adounc pèr jujamen te veès enterdi.
Dóu tèms fas toun assai contro lou Despoutisme,
Ounte moustres dei Grand lou descourant cinisme
E, toun paire encagna t’assousto au Castèu-d’I.
T’esvades. De l’eisil prènes la caminado;
Escrives pèr gagna lou pan de ta journado;
Quand lou Grand Frederi mouere, siés pròchi d’èu;
En Oulando, pièi, vas t’escoundre emé Sofìo;
Besançoun t’escourchis, dóu tèms, en efigìo,
E, tei panflet sanglènt leis usclo lou Bourrèu.
Cantariéu proun tei viàgi en Prusso, en Anglo-terro;
Noumbrariéu teis escrit sus la Pas e la Guerro;
Teis escàrni toujour qu’aduson lou moussèu;
Diriéu que journalisto as englouria la Presso.
Mai, sarié pèr moun vers tróu longo l’entre-prèsso,
E, rèn dei grand fa vau garni mei pincèu.
II
Deis Estat-Generau s’alestis l’uberturo:
Toun ambicien pourra s’espandi; ta naturo
ardènto, en saludant l’aubo de Liberta,
Voudra renouvela la sabo de toun amo,
E, l’Amour Patriau purificant ta flamo,
Toun laid mantèu blesi saubras lou rebuta.
Te rounses dins l’areno en terrible louchaire;
Ei Noble espaventa craches lou mot venjaire
Qu’ei Patrician larguè dei Graco lou darrié:
“Sèmpre lei Patrician, fas, quand dins la Noublaio,
Vèson quaucun dei siéu defèndre la Plebaio,
L’inmolon sus l’autar de la marridarié.
Toumbo, mai en mourènt adrèisso uno prièro
Ei Diéu venjaire e trais un pessu de poussièro
Au cèu. D’aquelo póusso es nèissu Marius,
marius, bèn mens grand, segur, pèr sa vitòri
Sus lei Tèuton, que pèr soun inmourtalo glori
D’avé baga de Roumo e Noble emai abus.”
Triounfles tout d’un tèms; toun noum de-longo esbriho;
Siés nouma deputa de-z-Ais e de Marsiho;
Chausisses Ais. Pertout, quand trèves un païs,
S’entènde un gai trignoun de campano dindanto;
Lou Pople es à tei pèd que t’adoro e te canto:
Siés lou Diéu que fai plóure e chascun te benis.
Fin-qu’aro avié briha lou parlaire amirable,
Encuèi vai s’auboura lou titan fourmidable,
Lou gigant qu’es tròu bas pèr èu lou fiermamen.
Siés la Revoulucien e siés la Deliéuranço:
Lou tuert pèr debaussa la Mounarchìo en Franço!
Siés tu! Siés Mirabèu! Siés un evenamen!!
Famous despuèi d’alor, de la Constituanto
Siés l’Istòri; ta voues quand restountis trounanto,
Lou grand cors emé tu se mesclo e se counfound;
Avès qu’un sentimen, qu’un èime, qu’uno idèio,
Vouesto gèsto es de-longo uno inmènso epoupèio
Ounte, subre-que-tout, esbrihaudo toun noum!
Jamai s’óublidara la sesiho reialo
Dóu Dous Jun, quouro ensèn, campa dins la salo,
Lei Tres-Ordre voulien en pas delibera.
De Deux-Brezé parèis, arrougant, pèr vous dire:
“Chascun deis Ordre fau qu’à despart se retire
Es un Ourdounamen dóu Rèi! Acò sara”.
Fas un bound de lioun; eirisses ta creniero;
T’enarquihes feroun; drèisses ta tèsto autiero,
E crides au varlet, em’ un gèst venjatiéu:
“Entourno-te! Vai dire au Mèstre que te mando,
Qu’eici sian, pèr la voues dóu Pople que coumando
E que sourtren que pèr la forço dei fusiéu!”
Adounc desmemouria, la cujanço abaissado,
Deux-Brezé maucoura de sa tristo embassado,
Coumo davans un Rèi souerto de reculoun.
La Reauta despièi, sus sei pounchié trantaiho.
Mirabèu, as gagna ta premiero bataiho,
D’un saut as trepassa lou pus aut escaloun!
L’endeman dóu grand jour que toumbo la Bastiho,
Anounçon que lou Rèi vendra dins la sesiho
E que faudrié li faire un magnifique acuèi:
“Noun, diés, dins lou malur espargnoun lou Mounarco
Dóu pu morne respèt dounen li que la marco
Lou silènci dóu Pople es liçoun pèr lei Rei !!”
Quand dei conspiradou la taifo maufatano
Vèn pèr envertouia lou Rèi dins seis engano
“Digo li bèn, li fas, que lou vòu d’Estrangié
Que vuèi nous investis a chourla lei caresso
E leis eicitacien dei Prince e dei Princesso
Que meton mai que mai la Patrìo en dangié,
Digo-li que la nue passado, aquelo enjanço
Anounciavo adeja la rouino de la Franço
Asservido e liéurado à l’enemi catiéu,
Que meme soun Palais a vist en fin-finalo
Mescla sei Courtisan eis òrrei saturnalo
Qu’an precedi, tous-tèms quauco Sant-Bourtoumiéu!”
Qu’ères bèu quand disiés davans l’auto assemblanço:
“Leis escarni jamai lassaran ma coustanço:
Eri, siéu e sarai, fin qu’au darrié badau,
L’Ome dei Liberta ‘me dei Lèi naciounalo,
E mau-grat leis esfors dei Noble e sei cabalo:
Leis abus passaran! Lou Pople es eternau!!”
Mesfiso-te pamens, dei jalous, de l’envejo,
La Poupularita, proun de fes, voulatejo:
Un jour, coumo l’as di, s’en vai, l’autre revèn,
La Roco Tarpeiano es près dóu Capitòli
Encuei t’aubouro au cèu, deman roumpo toun bòli
La Poupularita viro coumo lou vènt!!”
Pièi, qu saup, s’en soundant lei founsour de toun pitre
(Me lagno d’encapa tant douleirous capitre!)
Se li troubarian pas dins sei sóurnei countour
Lou raive qu’auriés fa, bessai d’èstre Menistre,
O, coumo l’aujo ametre un messoungié sinistre
L’espèr de counquista la Rèino à toun amour?
Car dien que lou Poudé te fasié tant ligueto,
Qu’auriés meme tasta La Marck e La Faieto
Pèr te li vèndre. Noun! Laisso-lei devaga
Lei mau-disènt jalous prejitant sei brutìci.
S’es verai qu’à la cour as rendu de servìci:
Te li siés pas vendu, quand te leis an paga!
E pièi veguen? Perqué meme s’ères coupable
L’Istourian dèu-ti rèndre un arrest implacable
Contro un ome tant grand, liogo de lou sousta?
Quand vòu pica tant naut la negro calounìo,
Toumbo sus lou cracaire, aflegis la Patrìo,
E n’es pèr la Nacien qu’uno calamita.
III
Perèu, dins lei trebau d’uno vido d’escousso,
Au bouen de l’àgi, quand la maladié te trousso;
Que de toun lié d’agòni entèndes lou canoun;
crides: “d’Achille es-ti deja lei funeraio?”
Mai l’infleissiblo Mouert meissouno ‘mé sa daio,
Aquèu qu’a coumoula lou mounde ‘mé soun noum.
La doulour de Paris esclato fourmidablo.
Se fan de funeraio ufanouso amirablo;
Es un apouteòsi, un trelus d’esplandour;
E la Nacien, toujour que ta glòri cativo,
Te fai un Panteon de Santo-Genevivo
D’ounte la Counvencien vendra te traire un jour!
Amount la Counvencien a councha toun cadabre;
Cap-d’obro de Trufème, un flame Cadet d’Ais,
Lei petacho cregnien que, dóu mabre surgènto,
La voues dóu Tribun Mouert, troumpeto enca vivènto
Eiguèsse en Jericò lei paret dóu Palais!
Bèn mai! au Museon, barrado dins sa caisso,
Toun estatuo, óujet d’uno óudiouso laisso,
Esperè que noun sai, la Grand Resurreicien,
La voues dóu Pople en-fin, t’aubouro à la Coumuno,
Ount, sus toun pèd-d’estau, poupulàri tribuno,
clames: “Sian inmourtau, sian la Revoulucien!”
Voues la Revoulucien sènso la Republico;
Lou Prougrès refrena ‘mé de lei mounarchico;
L’Egalita, nivèu dóu Noble e dóu Pacan;
Voues uno Liberta perdurablo e fecoundo;
(...) n’as jamai trahi tei counvicien prefoundo:
Siés constituciounau mai noun republican
.......................................................at, lei ferouge,
..........................................................., lei pu rouge,
...........................................................t que la Nacien
.......................................................grat seis arnaduro,
....................................................èiei blessaduro
.....lou baume.....................uno Counstitucien.
(Aquesto partido dóu tèste fuguè perdudo)
E pièi que nous enchau lou fin-founs de toun crèire!
Dóu Despoutisme siés l’invincible vincèire;
L’Apostro valerous de la Fraternita;
Lou Massaire arderous embrigant lei cadeno;
Lou Noble uscla dóu sang plebeian de sei veno;
Siés la Revoulucien e siés la Liberta!!
La Liberta la siés! e vaqui perqué t’àmi;
Siés la Revoulucien, vaqui perqué t’aclàmi;
Dei Prougrès souciau siés lou Pouerto-drapèu;
Siés l’oubrié patriau qu’a fa lei pople libre!
E, se me lagno tant d’èstre un marri Felibre,
Es de noun pousque mai t’aussa, Grand Mirabèu!!!
Ais, juiet 1893
Quatre-vint-nóu

F. Martelly :

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?