Lexique Provençal

Dans cette rubrique, des poèmes sont offerts à la lecture des internautes.

Incèns...

Dins l’arc-vóut de la glèiso mounto mounto l’incèns.
En aut, sout l’escrouncèu floutèjo entandoumèns,
Uno nèblo lóugièro, mouvedisso escarrado,
Que semblo retipa de pèr sèis escleirado
Lei caro fouscarino de quàuquei Sant dóu Cèu,
Que móuvèjon sèi couers inveirènt sout l’arcèu.
Quèste celest’ eimàgi fa vira lei visàgi
De touto l’assemblado coumo dins un jugàgi.
Lei tèsto pèbre-sau, castan’ en péu courtet,
Grisal’ e blanquinasso vo sauro un pau petet,
Si clènchon de galis e fan dei redoulèto,
Talamen que dirias que fan sèis estirèto,
N’i a que pèr vèire miés, si drèisson sus sèi pèd
Sènso si rèn gèina qu’an un brave toupèt !
D’àutrei tiblon soun couele d’espeta sa crougnolo,
Que li fara parti pèr Santo Repausolo !
Lei mai cachous, pecaire, elèi, es tout bèu just
S’àuson tesa lou suc, desplecant sèis ajust.
Mai d’àutrei vers lou sóu regàrdon d’un èr cande ;
An pas besoun de tubo nimai de prene d’ande,
Pèr saupre qu’es verai qu’au mié deis abadié
Lei vapour d’ouliban an de particuié
De permete de vèire à nouesto vist’ umano
Dei cavo fouero nouarmo que jamai rèn tresano.
A saupre ço que soun ? D’esperit farfadet
D’esse subre-naturo qu’an pas jamai la set,
Nimai la fam de tout, uno quauqu’ un’ envèjo,
Mai que vívon pamèns coum’ en un’ entremièjo
Entre Diéu e leis ome dins un entremitan
Que soul póu l’adesa aquest qu’es ermitan.
Lei viéu aquéstei fado que dànson dins l’óugivo.
Tènon entre sèi man un rastèu dei cènt pivo.
Sèi fouarmo puei s’enausson. Madri, leis ue en aut
Dins lei vouto de pèiro à n’en èstre malaut,
Lei ràdi recampa la póusso deis estello,
Refurna dei trau nègre lou founs ‘mé sèi pagello.
Eilalin au mai luen que nàisse touto lus,
Lei vaqui que rastèllon lou mèndre deis endus
Que pouart’ en sa courpouro un nùcli de matèri
Pèr li pourgi counfus lou tressant batistèri.
Ve-lei, courron encaro, sèns ouesse nimai d’ue
Soun coum’ en un linçóu sènso jour sènso nue,
Dins un dous estamen vouletejant dins l’aire
Celésteis incensié, càsteis estubassaire.
En sampiterno danço, dins un treble balans,
Van vènon courredis toujour em’ enavans.
Soun quéstei Damo blanco qu’alin dins lei mountagno
A Lourdo en Pirenèus, au mié d’uno baragno,
Au cimié deis Escrin, si fan vèir’ ei bergié
Que gàrdon sèi troupèu maugrat la brefounié.
An dich lei pastourèu, qu’èron dins la neblasso
Qu’amount sus leis auturo si mud’ en segarasso
A pas pu rèn li vèire à douei pas adavans,
Qu’acó vous esbravacho e vous dousto l’envans.
Es toujour à d’ enfant emé sèi regard cande
Qu’aparèisson lei fado dins lei prat, sus lei rande.
Ansin dins uno glèiso au founs d’un mounastié,
Soun aquito parièro, qu’emé sa moudestié,
A l’en cóup dins lou Cèu e un pau sus la terro,
Gènto, tènon d’à mènt leis ome sèns esperro.
Bessai que dins l’Eterne soun coutrío dei Sant,
D’aquélei que soun mouart. Alor de quant en quant
Soun cargado de vèire, gandido pèr d’arcàngi,
Ço que fan lei vivènt que sas, soun pas deis àngi !
Incèns… incèns sublime… meravihous incèns
Dins tèi grand ple de sèdo, lind’ e flusse balèns,
Coum’ un fin cabedèu, debanes en fielagno
Uno tèlo lachouso que jueg’ eis escoundagno.
Tu, coungrèies dei fado, si bidaussant au vènt
Dins l’aire fènt l’arèto, que bàion l’espavènt,
A quéstei que soun gus, marrrit catiéu vo aule,
Mèntre qu’ei dous e just pas jamai gatamiaule,
Pouarjon la pas inmenso, la trefounso mansour
Que duerbe la grand vío de l’eternau Amour.
O vapour celestialo, estèrs’ evanescènci
Qu’ei prous ei courajous, baies toujour l’ardènci.
Que moun armo pesoujo, saurrado de soun pés
Un jour avenidou s’escape sèns sèis oues
Qu’aniran acaba sa courrido en de póusso.
Diéu li emboufara de sa poutènt’ escousso,
Lou gran d’Eternita, lou sampitern’ eigas
De Vido en reboumbello qu’aturo tout ragas.
O fado encantarello, douço nèblo cousmico
Que sias quouro esperit quouro fouarmo fisico
‘Mé vouéstei grand mantèu inmacula de nèu,
Moustras mi lou camin que mi dara lou Cèu
E permetés qu’ encuei, aièr, deman ma visto
Siegue mai espalargo, que seguigue la pisto
Que counduse tout drech au cóume dóu bouenur,
Qu’es de viéure toustèms, acò n’en siéu segur,
Emé Diéu e leis Sant. O incèns estubaire,
Enarco tèis anèu : soun emparadisaire,
E mi bàion quand vouelon e s’acò s’endevèn,
Matèri à pantai qu’es moun soul agramen.
E s’un jour, si saup pas, siéu tau coum’ un susàri,
‘Mé la car’ avalado souca en plen desvàri,
De vouesto vedigano, venés touca mèi car
Fin que d’uno boundado fugiguèssi l’amar,
Pousquèssi avera lou Paradis celeste,
Que li soun counvida lei crouiard lei moudeste.

Pierre Dominique Testa, lou 16 de mai 2015.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?