Lexique Provençal

Dans cette rubrique, des poèmes sont offerts à la lecture des internautes.

Soulèso pèr Candelouso.

Siéu soulet dins la campagno entàntou quàuquei jour,
Abandouna de tóutei, siéu feissa de freijour,
Doumàci quand s’en van mon fiéu e ma mouié,
Es coumo se subran toumbàvi ‘n agonié,
Tau coumo se la terro, en mai de m’aclapa,
M’engoulissié tout viéu sèns mejan d’escapa.

L’un es parti alin, eilalin sus lei mar
Au mié d’un oucean qu’à modo de gulard,
Prenguè sounc’ uno tasco douei banèu un cuissau,
Sa nòvio uno raubo un’ èso, un brisaud,
Car pèr soun long vouiàgi qu’es lou pan de sa noço,
Vouelon viéure deliéure e proun rouda sa bosso !

L’autrouno ma mouié, a parti fa d’esqui
Dins leis aup que li gièlo en luego d’ista ‘qui
E de davans lou fue amira la naturo
Istalad’ en cadièro luen de touto venturo,
Mi faire lou manja, adouba la menèstro
Que sas, es pas qu vóu que póu n’en faire mouestro.

Alouro d’assetoun à taulo pèr escriéure,
Descrìvi moun trebau, moun ancié, lou mau-viéure
De m’atrouba ansin soulet dins la bastido
Que pèr encuei vous diéu, siéu coum’ à nue falido,
E lou couar matrassa, mi sènti à l’agóni
‘Mé dei pensado nègro que mi fan malancóni.

Mounte soun mèi coulino que mi rendien gaujous
E mounte es moun troupéu ‘mé soun pas que couchous,
Fai brusi sèi esquerlo, sèi clapo sèi toupin,
Vieistissènt lou silènci que calo moun charpin.
Aiaiai qu’es marrit d’ista eiçadabas
Isoula dins soun jas sènso degun soulas.

S’à mèns venié ‘no chato que pouarte lou velous,
Questo fino courouno que pouarge tant d’atous,
Eis bèlleis arlatenco quand si fèsto Sant Jan
A fin de jun, l’estiéu, e que tout barbelan
Lei jouvènt de Camargo escambarlant sèis ègo
Li fan sèi reverènci èbri de fernetègo.

Mai noun, vendra jamai ma rèino moun amour,
Car es partido luen s’espaceja trei jour.
E iéu adoulenti, pantaiant soun sourire,
Mi retràsi mouquet, sa caro soun coussire,
Soun anamen dansaire e soun assiéunaduro
Que rèn que li pensa, mi vèn l’ envejaduro.

Pèr quant n’es de sa charro : uno douço musico
Que vous bresso redouno tau coumo la melico
Qu’eilamount dins leis aup, fan lei pastre d’aupàgi
Culissènt lei lavando, l’espi dei paturgàgi.
Quouro canto ma mìo, es uno sinfounìo
Que mi duerbe lou Cèu, celestial’ alquimìo.

Aiaiai, ó ma douço… Pèr de que as parti ?
Pèr prene dei vacanço si sian mai separti.
E iéu de ta presènci que mi defauto tant,
Mi fau dei fadejado qu’an verai que l’istant.
Alour’ en un desaire qu’a lou goust dóu subé
Cabùssi sènso vido dins un mound’ en varé.

S’à mèns, moun fiéu, ma nouero, mi sounàvon de sèr
Creiriéu en d’àutrei cavo qu’ei pouarto de l’ infèr,
Que li siéu adavans lei man lei pèd liga,
Lei sarvello en boulé, lou couar embreniga.
E siéu soul, adeissa… E ticous lou tèms filo.
Sèmpre descansadis, lou presènt vèn, s’engilo.

Plóu…Plóu…De longo plóu… e moun armo es en dóu.
La sau de mèi lagrèmo mi poun e mi rènd fóu.
Mèi nèrvi soun tibla. Pourrien bèn s’escouissendre.
L’a pas bric’ un’ amaiso. De carme : pas lou mèndre
Que pouesque amansi moun descouar, ma destrècho.
Car tout es tant amar que noun viéu que coustrècho.

Alouro mèis amour, tournas à la bastido.
Esgaias de mèi jour que soun sèns avalido,
Leis ouro, leis istant que fùson, que s’abrìvon,
E que sènso coussire, noun jamai s’atardìvon.
Venès, venès ausi mèi cant, mèi pouesìo,
Venès mi regaudi fin qu’istessian coutrìo.

Pierre Dominique Testa, lou 2.2.2015 jour de Candelouso.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?